فوتو: election.gov.kz
ءىس-شاراعا ازەربايجان, قازاقستان, قىرعىزستان, تۇركيا, وزبەكستان جانە باقىلاۋشى ەل – ماجارستاننىڭ ورتالىق سايلاۋ ورگاندارىنىڭ وكىلدەرى قاتىستى. سونىمەن قاتار, بەدەلدى حالىقارالىق ۇيىمدار – تمۇ, A-WEB (سايلاۋ ورگاندارىنىڭ دۇنيەجۇزىلىك قاۋىمداستىعى), تۇركپا جانە تۇركى اكادەمياسى باسشىلارى, سونداي-اق قازاقستاندىق پارلامەنت دەپۋتاتتارى, ساراپشىلار مەن وڭىرلىك سايلاۋ كوميسسيالارىنىڭ توراعالارى باس قوسقان.
تۇركى مەملەكەتتەرى ۇيىمىنا مۇشە مەملەكەتتەردىڭ ورتالىق سايلاۋ ورگاندارىنىڭ كونسۋلتاتيۆتىك پلاتفورماسىن قۇرۋ باستاماسىن قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ 2023 جىلعى 3 قاراشادا استانادا وتكەن تمۇ X مەرەيتويلىق سامميتىندە ۇسىنعان بولاتىن.
تمۇ مۇشە مەملەكەتتەردىڭ ورتالىق سايلاۋ ورگاندارىنىڭ كونسۋلتاتيۆتىك پلاتفورماسىن قۇرۋ تۋرالى شەشىم بارلىق تۇركى مەملەكەتتەر باسشىلارى تاراپىنان ءبىراۋىزدان قولداۋ تاۋىپ, 2024 جىلعى 6 قاراشادا قابىلدانعان تمۇ XI ءسامميتىنىڭ بىشكەك دەكلاراتسياسىندا كورىنىس تاپتى.
وسو كپ ەرەجەسىنە قول قويۋ راسىمىندە قر ورتالىق سايلاۋ كوميسسياسىنىڭ توراعاسى نۇرلان ءابدىروۆ مەملەكەت باسشىسى قاسىم-جومارت توقاەۆتىڭ ءىس-شاراعا قاتىسۋشىلارعا ارناعان قۇتتىقتاۋ حاتىن وقىدى.
پرەزيدەنت ءوز حاتىندا تمۇ X سامميتىندە ۇسىنعان كونسۋلتاتيۆتىك پلاتفورمانى قۇرۋ تۋرالى باستامانى قولداعان باۋىرلاس ەلدەردىڭ ارىپتەستەرىنە العىس ءبىلدىرىپ, بۇل باستاما ۇيىمنىڭ مۇشە مەملەكەتتەرىنىڭ سايلاۋ جۇيەلەرىن جەتىلدىرۋگە ىقپال ەتەتىنە سەنىم ءبىلدىردى.
«بۇكىل تۇركى الەمىنىڭ رۋحاني استاناسى سانالاتىن تۇركىستان قالاسىندا كونسۋلتاتيۆتىك پلاتفورمانىڭ ەرەجەسىنە قول قويىلادى. مۇنىڭ سيمۆولدىق ءمانى زور. سونداي-اق ماسەلەنىڭ ماڭىزدىلىعىن ەسكەرە وتىرىپ, مەن «تۇركى الەمى: سايلاۋ جۇيەلەرىنىڭ ءداستۇرى, تاجىريبەسى جانە دامۋ بولاشاعى» اتتى عىلىمي-تاجىريبەلىك كونفەرەنتسيا وتكىزۋ تۋرالى باستامانى قولدايمىن. بۇل شارالار تاريحى ورتاق, تامىرى ءبىر باۋىرلاس ەلدەردىڭ قارىم-قاتىناسىن ودان ءارى تەرەڭدەتە تۇسەرى ءسوزسىز», دەپ مەملەكەت باسشىسى ءوز حاتىندا دەن قويىپ, كونسۋلتاتيۆتىك پلاتفورماعا ناتيجەلى جۇمىس تىلەدى.
سونىمەن قاتار, قر پارلامەنتى سەناتىنىڭ توراعاسى ماۋلەن اشىمباەۆ پەن قر پارلامەنتى ءماجىلىسىنىڭ توراعاسى ەرلان قوشانوۆ ءوز قۇتتىقتاۋلارىن جولداعان.
ءىس-شارا بارىسىندا قر وسك توراعاسى اشىق دەرەكتەرگە سايكەس تمۇ مۇشە مەملەكەتتەردە 96,5 ميلليوننان استام سايلاۋشى بار ەكەنىن, سوڭعى ەكى جىلدا وسى ەلدەردە ءتۇرلى دەڭگەيدەگى 15 سايلاۋ وتكەنىن اتاپ ءوتتى. سونىمەن قاتار, ول ء«بىز بۇگىن بۇكىل تۇركى حالقىنىڭ رۋحاني استاناسى – تۇركىستاندا جينالىپ, تمۇ ەلدەرىنىڭ ورتالىق سايلاۋ ورگاندارىنىڭ كونسۋلتاتيۆتىك پلاتفورماسى تۋرالى ەرەجەگە قول قويىپ وتىرمىز. مۇنداي ديالوگ الاڭىن قۇرۋ سايلاۋ پروتسەستەرىنىڭ ساپاسى, تيىمدىلىگى مەن ينكليۋزيۆتىلىگىن ارتتىرۋعا ىقپال ەتەدى», دەدى.
