تالاپكەردىڭ ايتۋىنشا, ۇشاق الماتىعا قونعاننان كەيىن اۋەجاي قىزمەتكەرلەرى كوما جاعدايىنداعى بالانى اربا ارقىلى تاسىمالداۋدى ۇسىنعان. الايدا بۇل اربا مەديتسينالىق تالاپتارعا ساي بولماعان.
بالامەن بىرگە جۇرگەن دارىگەر مەن اتا-اناسى ارنايى رەانيموبيل اۋەجاي اۋماعىنا كىرە الماعان. وسى سەبەپتى بالانى ۇشاقتان تەرمينالعا امبۋليفتپەن – قوزعالىسى شەكتەۋلى جولاۋشىلارعا ارنالعان قۇرالمەن جەتكىزگەن. بىراق بۇل تەحنيكا اۋىر حالدەگى ناۋقاستارعا ارنالماعان.
نەيروحيرۋرگتىڭ قورىتىندىسىنا سايكەس, بالا وزدىگىنەن قوزعالا المايتىن جاعدايدا بولعان جانە پاسپورتتىق باقىلاۋدان مەديتسينالىق پۋنكت ارقىلى ءوتۋى قاجەت ەدى. دەگەنمەن ول ستاندارتتى جولمەن – شەكارالىق باقىلاۋ مەن سۋرەتكە ءتۇسىرۋ ءراسىمى ارقىلى وتكىزىلگەن.
سوت شەشىمىندە كورسەتىلگەندەي, اۋەكومپانيا بالانىڭ جاعدايىنان حاباردار بولا تۇرا, اۋەجايعا رەانيموبيل قاجەت ەكەنىن ەسكەرتپەگەن. قىزمەتتەر اراسىنداعى بايلانىستىڭ بولماۋى قاجەتتى كومەكتىڭ دەر كەزىندە كورسەتىلمەۋىنە سەبەپ بولعان.
«شەكارالىق باقىلاۋ كەزىندە كەراتيتپەن اۋىرعان بالانىڭ كوزىندەگى قورعانىش تاڭعىشى ءماجبۇرلى تۇردە الىنىپ, سۋرەتكە تۇسىرىلگەن. كەلەسى كۇنى بالا اۋرۋحاناعا ەكىجاقتى پنەۆموتوراكس دياگنوزىمەن تۇسكەن. اقپان ايىندا ول قايتىس بولدى», دەلىنگەن سوت ماتەريالدارىندا.
سوت تالاپتى جارتىلاي قاناعاتتاندىرىپ, «ە» دەپ بەلگىلەنگەن اۋەكومپانيادان مورالدىق زيان ءۇشىن 5 ميلليون تەڭگە وتەماقى ءوندىرۋ تۋرالى شەشىم شىعاردى. الايدا بۇل ۇكىم ءالى زاڭدى كۇشىنە ەنگەن جوق.
ايتا كەتەيىك, سوت قۇجاتتارىندا اۋەكومپانيا مەن اۋەجايدىڭ ناقتى اتاۋى اتالماعان – تەك «ە» اۋەكومپانياسى» مەن «حالىقارالىق اۋەجاي» دەپ كورسەتىلگەن.
