جيىن بارىسىندا شەتەلدىك جانە وتاندىق تانىمال عالىمدار ءماشھۇر ءجۇسىپتىڭ مۇراسىن سان قىرىنان سارالاپ, تەرەڭ تالداۋلار جاسادى. ونلاين قاتىسقان مامانداردىڭ ىشىندە – الماتى قالاسىنان اكادەميك, تاريح عىلىمدارىنىڭ دوكتورى, پروفەسسور حانكەلدى ءابجانوۆ ء«ال-فارابي جانە مۋزىكا» تاقىرىبىندا تانىمدىق ءدارىس وقىدى.
باسقوسۋدا ءسوز سويلەگەن Turk-san.com مادەنيەت جانە ونەر باسپاسىنىڭ ديرەكتورى, فيلولوگيا عىلىمدارىنىڭ دوكتورى, پروفەسسور ەللادا عاراي زادە ءماشھۇر ءجۇسىپتىڭ شىعارماشىلىعىن جوعارى باعالاپ, تۇركى حالىقتارىنىڭ رۋحاني تۇتاستىعىن ارتتىرۋداعى ماڭىزىن اتاپ ءوتتى.
ال ۋكراينادان قوسىلعان فيلوسوفيا عىلىمدارىنىڭ كانديداتى يرينا زەلينسكايا ۋكراين ويشىلى گريگوري سكوۆورودامەن ءماشھۇر ءجۇسىپ يدەيالارىن سالىستىرا وتىرىپ, ولاردىڭ فيلوسوفيالىق تۇجىرىمدارىنىڭ ادامزات قۇندىلىقتارىن باعالاۋداعى ورتاق جەلىسىن كورسەتتى.
ءىس-شارا اياسىندا عىلىم جانە جوعارى ءبىلىم مينيسترلىگىنە قاراستى فيلوسوفيا, ساياساتتانۋ جانە ءدىنتانۋ ينستيتۋتى بىرنەشە كىتاپتاردى تارتۋ ەتتى. بۇل ەڭبەكتەردىڭ مازمۇنى تۋرالى فيلوسوفيا عىلىمدارىنىڭ دوكتورى, پروفەسسور باقىتجان ساتەرشينوۆ تانىستىرىپ ءوتتى.
جيىن سوڭىندا جۇسىپبەك ايماۋىتوۆ اتىنداعى ەتنوپەداگوگيكا جانە ءبىلىم بەرۋدىڭ يننوۆاتسيالىق تەحنولوگيالارى عىلىمي ورتالىعىنىڭ باس عىلىمي قىزمەتكەرى, پەداگوگيكا عىلىمدارىنىڭ دوكتورى, پروفەسسور ەڭلىك جۇماتاەۆا قورىتىندى ءسوز سويلەپ, كىتاپتاردى ءماشھۇر ءجۇسىپ مۋزەيىنىڭ مەڭگەرۋشىسى اسەت پازىلوۆقا, ء«ماشھۇرتانۋ» ورتالىعىنا جانە «Beisembayev Library» عىلىمي كىتاپحاناسىنا تابىس ەتتى. سونىمەن قاتار, ورتالىقتىڭ عىلىمي قىزمەتكەرى ءنايلا انافينا ءماشھۇر ءجۇسىپتىڭ فيلوسوفيالىق, قوعامدىق كوزقاراستارىنىڭ بۇگىنگى كۇنگە ساي وزەكتىلىگىن اتاپ ءوتتى. بۇل جيىن – ءماشھۇر ءجۇسىپ مۇراسىن حالىقارالىق دەڭگەيدە ناسيحاتتاۋعا, جاس بۋىننىڭ تانىم كوكجيەگىن كەڭەيتۋگە باعىتتالعان ماڭىزدى قادامداردىڭ ءبىرى بولدى.
