بۇگىندە وقۋ-اعارتۋ مينيسترلىگى اۋىل مەكتەپتەرىندەگى ءبىلىم ساپاسىن ارتتىرۋ باعىتىندا اۋقىمدى جوبالاردى قولعا الىپ وتىر. بۇل باستامالاردى ىسكە اسىرۋدا ادىستەمەلىك ورتالىقتاردىڭ ءرولى ايرىقشا. وسى ورايدا, «943 – ەلىمىزدىڭ ماقساتتى مەكتەپتەرىن دامىتۋ» جوباسى اياسىندا جوبالىق كەڭسە ادىسكەرلەرىنە ارنالعان قىسقامەرزىمدى تاعىلىمداما ۇيىمداستىرىلىپ, سالا ماماندارى كاسىبي قۇزىرەتتىلىكتەرىن شىڭداۋعا مۇمكىندىك الدى.
ءىس-شاراعا قاشىقتىقتان جاۋاپتى مينيسترلىكتىڭ ورتا ءبىلىم كوميتەتىنىڭ توراعاسى قانىبەك جۇماشەۆ, ى.التىنسارين اتىنداعى ۇلتتىق ءبىلىم اكادەمياسىنىڭ پرەزيدەنتى مىندەتىن اتقارۋشى انار تاڭىربەرگەنوۆا, وڭىرلىك ءبىلىم باسقارماسىنىڭ باسشىسى داۋرەن ءجۇنىسوۆ جانە ادىسكەرلەر قاتىستى.
وبلىستىق ادىستەمەلىك ورتالىقتىڭ ديرەكتورى عاليا مۋحمەتوۆانىڭ ايتۋىنشا, «943» جوباسى اياسىندا جەتىسۋ وبلىسىنان 57 مەكتەپ تاڭدالىپ الىنعان. بۇل مەكتەپتەردىڭ پەداگوگتەرى 11 ءپان بويىنشا بازالىق, نەگىزگى جانە ىلگەرى دەڭگەيدەگى بىلىكتىلىك ارتتىرۋ كۋرستارىنان وتكەن. سونىمەن قاتار, ادىسكەرلەردىڭ جەتەكشىلىگىمەن ماقساتتى مەكتەپتەردىڭ جەكە دامۋ جوسپارلارى مەن پورترەتتەرى ازىرلەنىپ, جۇيەلى باقىلاۋ جانە مونيتورينگ جۇرگىزىلۋدە.
تاعىلىمداما بارىسىندا ءار وڭىردەن كەلگەن 15 ادىسكەر ءوز جوبالارىن ورتاعا سالىپ, ءتيىمدى تاسىلدەرىمەن ءبولىستى. ادىستەمەلىك ورتالىقتىڭ اتاۋىن وزگەرتۋ تۋرالى ۇسىنىستار دا قاراستىرىلدى.
استانا قالالىق ادىستەمەلىك ورتالىعىنىڭ تالداۋ جانە مونيتورينگ ءبولىمىنىڭ باسشىسى انار دوسمۇحامەتقىزى جەتىسۋ ءوڭىرىنىڭ ادىستەمەلىك تاجىريبەسىن جوعارى باعالاپ, تاعىلىمدامادان كوپ نارسە ۇيرەنۋگە بولاتىنىن اتاپ ءوتتى. ول استانادان ارنايى كەلىپ, ءوز جوبالارىن — «شەبەرلىك ءتالىم» مەن «ماتەماتيكا كلۋبىن» تانىستىردى.
پلەنارلىق ماجىلىستەن سوڭ تاعىلىمداما شەبەرلىك-سىنىپ فورماتىندا جالعاستى. الاكول مەن كەربۇلاق اۋداندارى ءوزارا ءتيىمدى ارەكەتتەسۋ ماسەلەسىن تالقىلاسا, كوكسۋ مەن سارقان اۋداندارى «جوبالىق كەڭسەنىڭ ساپالى قۇرامى: ۇزدىك تاجىريبەلەر» تاقىرىبىندا ءوز دامۋ جوسپارلارى مەن وقىتۋ باعدارلامالارىن ۇسىندى.
پانفيلوۆ اۋدانىندا جالعاسقان تاعىلىمداما اياسىندا قاتىسۋشىلار اۋداننىڭ ماقساتتى مەكتەپتەرىمەن تانىستى. ولاردىڭ قاتارىندا د.قوناەۆ اتىنداعى مەكتەپ, اباي اتىنداعى ورتا مەكتەپ جانە №6 مەكتەپ-ينتەرنات بار.
ودان كەيىن ەسكەلدى, اقسۋ, تەكەلى جانە تالدىقورعان قالالارىنداعى ادىستەمەلىك ورتالىقتار وقىتۋ ساپاسىن ارتتىرۋ, پەداگوگتەردى تەستىلەۋگە دايىنداۋ جانە ءبىلىم ساپاسىن باسقارۋ باعىتىندا تاجىريبەلىك جۇمىستارىن كورسەتتى.
تاعىلىمدامانىڭ سوڭعى كۇنى ى.التىنسارين اتىنداعى ورتا مەكتەپتە وتكەن جوبالىق سەسسيادا پەداگوگيكالىق الەۋەتتى دامىتۋ جولدارى مەن تابىستى مەكتەپتەردىڭ تاجىريبەسى كەڭىنەن تالقىلانىپ, جول كارتالارى ازىرلەندى. قورىتىندىلاي كەلە قاتىسۋشىلار العىس حاتتار مەن ارنايى سەرتيفيكاتتارعا يە بولدى.
