فوتو: مادەنيەت جانە اقپارات مينيسترلىگى
مادەنيەت جانە اقپارات مينيسترلىگىنىڭ مالىمەتىنشە, بايقاۋ حورەوگرافيانىڭ ءۇش اتالىمى: بي, حالىق ءبيى جانە زاماناۋي حورەوگرافيا بويىنشا وتكەن. بايقاۋعا قازاقستاننان بولەك گەرمانيا, يتاليا, لاتۆيا, ليتۆا, ەستونيا, ۋكراينا, سولتۇستىك افريكا ەلدەرىنىڭ ونەرپازدارى قاتىسقان.
حالىقارالىق بايقاۋدا انسامبل ءسوليسى سانيا ساكەنوۆا ءى دارەجەلى لاۋرەات اتانىپ, ەكى التىن مەدال جەڭىپ الدى. ول بايقاۋ باعدارلاماسىندا انۆارا سادىقوۆا قويعان «اقبايان» قازاق ءبيىن جانە ەرنۇر قارىقبول قويعان «تەمۋلەن» موڭعول ءبيىن بيلەدى. سونداي-اق, انسامبل ءبيشىسى ورىنداۋشىلىق شەبەرلىگى مەن ارتىستىك ونەرى ءۇشىن امەريكا قۇراما شتاتتارىنداعى مارگو فونتەين اتىنداعى بالەت اكادەمياسىندا ەكى اپتالىق وقۋ ستيپەندياسىنىڭ سەرتيفيكاتىنا يە بولدى.
وسىلايشا, «گۇلدەر» ءانسامبلىنىڭ باس بالەتمەيستەرى انۆارا سادىقوۆا مەن سانيا ساكەنوۆا مارگو فونتەين بالەت اكادەمياسىنىڭ كوركەمدىك جەتەكشىسى كەننەت لاددەننىڭ ارنايى شاقىرتۋىن الدى.
سونىمەن قاتار, قازىلار القاسىنىڭ شەشىمى بويىنشا «گۇلدەر» ءانسامبلى «ۇلتتىق بي مادەنيەتىن ساقتاۋ جانە دامىتۋ» ارنايى سىيلىعىمەن ماراپاتتالدى.
