فوتو: ۆيدەودان الىنعان سكرين
شەرزات پولاتتىڭ ولىمىنە قاتىستى ىستە 9 ايىپتالۋشى بار, ونىڭ ىشىندە 1 ازامات كامەلەت جاسىنا تولماعان.
بۇگىنگى سوت وتىرىسىندا 3 قازان كۇنى كەشكى كەزەكشىلىكتە بولعان تالعار اۋداندىق پوليتسيا باسقارماسىنىڭ قىزمەتكەرى د. قۇرامىسوۆ كۋالىك ەتتى.
ونىڭ ايتۋىنشا, مەندەلەەۆ كوشەسىندەگى «قاماجاي» دۇكەنى ماڭىنداعى توبەلەس تۋرالى حابار پوليتسياعا ساعات 00:42 -دە تۇسكەن.
«حابارلانعاننان كەيىن 7-8 مينۋتتا وقيعا ورنىندا بولدىق. وقيعا جەكە تەلەفونعا حابارلاندى. وقيعا ورنىندا 4-5 بالا ءجۇردى. نە بولعانىن سۇرادىق. ءبىر بالانىڭ باسى قاناپ تۇردى. جەدەل جاردەم شاقىرىپ كۇتە تۇر دەدىم. سول جەردە ۇلكەندەر, تۇرعىندار توبەلەس بولىپ, مىلتىقتىڭ داۋىسى ەستىلگەنىن ايتتى», دەدى كۋاگەر د. قۇرامىسوۆ.
سونداي-اق, كۋاگەر پوليتسيا قىزمەتكەرى د. قۇرامىسوۆ وقيعاعا قاتىسقانداردى ۇستاۋ تۋرالى حابار الىپ, رىسقۇلوۆ اۋىلىندا ۆولسۆاگەن گولف كولىگى قالاي تابىلعانىن ايتىپ بەردى.
«ۆولسۆاگەن گولف كولىگى رىسقۇلوۆ اۋىلىندا تابىلدى. ءبىز كەلگەندە ىشىندە ەشكىم بولمادى. كەيىن دارحان اسكەنتاي ۇيلەردىڭ اراسىنان شىقتى. كەلگەندە ۆولسۆاگەن گولف كولىگىنىڭ ارتقى جانە الدىڭعى تەرەزەلەرى سىنعانىن كوردىك. دارحان اسكەنتايدان الكوگولدىك ىشىمدىك ءيىسى شىعىپ تۇردى. ءبىر كوزى كوگەرىپ, ىسكەن ەدى. مەندەللەۆ كوشەسىندەگى «قاماجاي» دۇكەنى ماڭىنداعى توبەلەسكە قاتىسى بار-جوعىن سۇرادىق. ول قاتىسى بار ەكەنىن ايتتى», دەدى تالعار اۋداندىق پوليتسيا باسقارماسىنىڭ قىزمەتكەرى د. قۇرامىسوۆ.
قازىر سوت وتىرىسىندا جەلتوقسان ايىندا دەنەسى تابىلعان مارقۇم نۇرقانات عايىپباەۆتىڭ تەرگەۋدىڭ باستاپقى كەزەڭىندە بەرگەن تۇسىنىكتەمەسى كورسەتىلىپ جاتىر.
