قوڭىر ايۋ «كولساي كولدەرى» ۇلتتىق پاركىنىڭ فوتوتۇعىرىنا ءتۇسىپ قالدى. ناۋرىز ايىندا بەينە ءتۇسىرىلدى. تيان-شان قوڭىر ايۋى قازاقستاننىڭ قىزىل كىتابىنا ەنگىزىلگەن. سوڭعى جىلدارى ۇلتتىق پارك اۋماعىندا ايۋلاردىڭ سانى جىل سايىن ارتىپ كەلەدى. ۇلتتىق پاركتە 19-22-گە جۋىق ايۋ بار.
كولساي كولدەرى مەملەكەتتىك ۇلتتىق تابيعي پاركى 2007 جىلى قۇرىلعان, تيان-شان اسپان تاۋلارىنىڭ سولتۇستىك بەتكەيىندە, ىلە الاتاۋى مەن كۇنگەي الاتاۋىنىڭ ەكى تاۋ جوتاسىنىڭ اراسىندا, قىرعىزستاننىڭ شىعىس شەكاراسىنا جاقىن ورنالاسقان.
مەملەكەتتىك ساياباق اكىمشىلىگى كەلۋشىلەرگە ايۋلارمەن كەزدەسكەن كەزدە قاۋىپسىز اراقاشىقتىقتى ساقتاۋ جانە جانۋارلاردى الاڭداتاتىن كەز كەلگەن ارەكەتتەن اۋلاق بولۋ ماڭىزدى ەكەنىن ەسكەرتەدى.
