كۇنى كەشە ەلىمىز ءۇشىن اسا ماڭىزدى وندىرىستىك جوبالاردىڭ ءبىرى – «ساستوبە يننوۆاتسيالىق كەشەنىنىڭ» ءبىرىنشى كەزەڭىنىڭ قوندىرعىلاردى ورناتۋ جۇمىستارى باستالدى. «ساۋتس-ويل» كومپانياسى قولعا الىپ وتىرعان بۇل كەشەن ىسكە قوسىلعاندا ەلىمىزدەگى ەڭ ءىرى اك ءوندىرۋشى بولادى. اتالعان ءوندىرىس ىشكى نارىقتى ساپالى ونىممەن قامتاماسىز ەتۋگە عانا ەمەس, ەكسپورتتىق الەۋەتتى دە ايتارلىقتاي ارتتىرۋعا مۇمكىندىك بەرەدى.
وبلىس اكىمى نۇرالحان كوشەروۆتىڭ قۇرىلىس الاڭىندا ينۆەستورلارمەن كەزدەسۋىندە تۇلكىباس اۋدانى اۋماعىنداعى «ساستوبە» يننوۆاتسيالىق كەشەنى» جشس جوباسىنا «2021-2025 جىلدارعا ارنالعان كاسىپكەرلىكتى دامىتۋ جونىندەگى» ۇلتتىق جوباسى اياسىندا قولداۋ كورسەتىلىپ, جوبالاۋ-سمەتالىق قۇجاتتامالارى ازىرلەنگەنى ايتىلدى. جوبا ەكولوگيالىق ستاندارتتارعا ساي زاماناۋي تەحنولوگيامەن جۇزەگە اساتىنى, بۇل – ءىرى ءوندىرىس ورنىنان كۇتىلەتىن باستى تالاپتاردىڭ ءبىرى ەكەنى دە جەتكىزىلدى.
كەلەسى جىلى ىسكە قوسىلاتىن زاۋىتتا جىلىنا 400 مىڭ توننا اك, 200 مىڭ توننا كالتسي كاربيدىن, 100 مىڭ توننا كاۋستيكالىق سودا, 120 مىڭ توننا پوليۆينيلحلوريد جانە 1 ملن توننا تسەمەنت ءوندىرۋ جوسپارلانىپ وتىر. قۇرىلىس, حيميا, مەتاللۋرگيا سەكىلدى ونەركاسىپتىڭ كوپتەگەن سالالارىنا سەرپىن بەرەتىن جوبا اياسىندا مىڭعا جۋىق جۇمىس ورنى اشىلادى.
