سالماعى 3844 گ, بويى 46 سم بولىپ تۋعان نارەستەنى ەمحانانىڭ نەوناتولوگيالىق بريگاداسى كەسار تىلىگىنەن كەيىن بىردەن جاساندى تىنىس الۋ اپپاراتىنا قوسىپ, الماتى قالاسىنىڭ بالالارعا جەدەل مەديتسينالىق كومەك كورسەتۋ ورتالىعىنا جەتكىزدى.
بالا اۋرۋحاناعا وتە اۋىر جاعدايدا كەلىپ تۇسكەندىكتەن, جاعدايى بىردەن باقىلاۋعا الىنىپ, شۇعىل كومەكتى تالاپ ەتتى. ۋلترادىبىستىق زەرتتەۋ دەرەكتەرى بويىنشا, قۇرساقىشىلىك كەزەڭدە ولشەمى 12 سم-گە جۋىق ءتۇزىلىس بار دەگەن دياگنوز قويىلعان. بۇل بوسانۋ بارىسىندا ەرەكشە اكۋشەرلىك جانە حيرۋرگيالىق ءتاسىلدى قاجەت دەگەن ءسوز.
سونىمەن 24 ناۋرىزدا بالالار جەدەل جاردەم ءبولىمىنىڭ دارىگەرلەرى ىسىك ءتارىزدى تۇزىلىسكە پۋنكتسيا جاساپ, 500 مل-دەن استام سۇيىقتىقتى الىپ تاستادى. بۇل نارەستەنىڭ تۇنشىعۋ قاۋپىن ازايتۋعا كومەكتەستى. بالانىڭ جاعدايىن ءبولىم مەڭگەرۋشىسى ۇلىقپان بولاتبەك ۇلى السەيىتوۆ باقىلاۋعا الدى. ءسابيدى بالالارعا شۇعىل مەديتسينالىق كومەك كورسەتۋ ورتالىعىنىڭ جاڭا تۋعان نارەستەلەر جانساقتاۋ بولىمىنە جاتقىزىپ, وتا جاساۋعا دايىندادى.
ال 26 ناۋرىزدا وپەراتسيا ارقىلى ليمفانگيوما تۇبەگەيلى الىندى. وپەراتسيانى بالالار حيرۋرگى مىرزاحمەت ساماتبەك پەن اسسيستەنت جالعاس كۇنيازوۆ ەندوتراحەالدى انەستەزيامەن جاسادى. نەوناتولوگ, حيرۋرگ جانە انەستەزيولوگتاردىڭ ۇيلەسىمدى جۇمىسىنىڭ ارقاسىندا وتا ءساتتى ءوتتى.
بالا تاعى ءۇش اپتا بويى جانساقتاۋ بولىمىندە دارىگەرلەردىڭ باقىلاۋىندا بولدى. كەيىن جاعدايى دۇرىستالعان سوڭ ۇيىنە شىعارىلدى.
بۇل وقيعا - الماتى قالاسىنىڭ بالالارعا جەدەل مەديتسينالىق كومەك كورسەتۋ ورتالىعىنىڭ ۇجىمىنىڭ سيرەك كۇردەلى كەسەلمەن تۋعان نارەستەنىڭ ءومىرى ءۇشىن كۇرەستەگى كەزەكتى جەڭىسى. وپەراتسيادان كەيىن تىگىستەر جازىلىپ, ۋاقىت وتە كەلە مۇلدەم كورىنبەيتىن بولادى.
