فوتو: ەڭبەك جانە حالىقتى الەۋمەتتىك قورعاۋ مينيسترلىگى
وسى جىلى قانداستاردىڭ جارتىسى (48,1%) قىتايدان, 39,5% – وزبەكستاننان, 5,8% – تۇرىكمەنستاننان, 2,5% – مونعوليادان, 1,9% – رەسەيدەن, 2,2% تاعى باسقا ەلدەردەن كەلگەن ەكەن.
1 ساۋىردەگى جاعداي بويىنشا ەڭبەككە قابىلەتتى جاستاعى ەتنيكالىق قونىس اۋدارۋشىلار سانى 60,7%-دى, ەڭبەككە قابىلەتتى جاستان كىشى 31,1%-دى جانە زەينەتكەرلەر 8,2%-دى قۇراعان. ءبىلىم دەڭگەيى بويىنشا 17,9%-ى جوعارى ءبىلىمدى, 27,8%-ى ورتا كاسىبي ءبىلىمدى, 52,9%-ى جالپى ورتا ءبىلىمدى, جانە 1,4% ءبىلىم جوق.
قانداستاردى قونىستاندىرۋ تۇرعىسىندا ەڭبەك كۇشى تاپشى وڭىرلەر رەتىندە اقمولا, اباي, قوستاناي, پاۆلودار, اتىراۋ, باتىس, شىعىس, سولتۇستىك قازاقستان وبلىستارى انىقتالعان.
قانداستار جالپى ءتۇرلى وڭىرلەرگە قونىستاندى.
«قونىستاندىرۋ وڭىرلەرىندە 2025 جىلعا ارنالعان قانداستاردى قابىلداۋ كۆوتاسى 2 309 ادامدى قۇرايدى. 2025 جىلعى 1 ساۋىردەگى جاعداي بويىنشا قونىستاندىرۋ وڭىرلەرىنە 642 قانداس قونىس اۋداردى.
جوعارىدا اتالعان وڭىرلەردە قونىستانعان قانداستارعا كوشۋگە سۋبسيديا تۇرىندە مەملەكەتتىك قولداۋ شارالارى ۇسىنىلادى – ءبىر مەزگىلدە وتاعاسىنا جانە وتباسىنىڭ ءاربىر مۇشەسىنە 70 اەك (275,2 مىڭ تەڭگە) مولشەرىندە; تۇرعىن ءۇي جالداۋعا جانە كوممۋنالدىق قىزمەتتەرگە اقى تولەۋگە – ءبىر جىل ىشىندە 15-تەن 30 اەك (59-دەن 118 مىڭ تەڭگەگە دەيىن) مولشەرىندە.
جىل باسىنان بەرى 147 قانداسقا ءتۇرلى قولداۋ شارالارى كورسەتىلدى. اتاپ ايتقاندا, 94 ادام تۇراقتى جۇمىسقا ورنالاستىرىلدى», دەپ حابارلاندى ەڭبەك جانە حالىقتى الەۋمەتتىك قورعاۋ مينيسترلىگىنىڭ ءباسپاسوز قىزمەتىنەن.
سونىمەن قاتار ازاماتتاردى سولتۇستىك وڭىرلەرگە قونىس اۋدارۋعا قاتىساتىن جۇمىس بەرۋشىلەردى قولداۋ بويىنشا ينستيتۋتسيونالدىق شارالار قابىلدانعان. تۇرعىن ءۇي ساتىپ الۋ, سالۋ ءۇشىن نەمەسە يپوتەكالىق تۇرعىن ءۇي قارىزدارى بويىنشا باستاپقى جارنانىڭ ءبىر بولىگىن جابۋ ءۇشىن ەكونوميكالىق ۇتقىرلىق سەرتيفيكاتى تۇرعىن ءۇي قۇنىنىڭ 50%-ى نەمەسە ءبىر وتباسىنا 4,56 ملن تەڭگەگە دەيىن مولشەرىندە بىرجولعى وتەۋسىز جانە قايتارىمسىز نەگىزدە ەنگىزىلدى.
