بۇل مەرەكە مەملەكەت باسشىسىنىڭ قوعامدا وقۋ مادەنيەتىن قالىپتاستىرۋ ماقساتىندا ءۇشىنشى ۇلتتىق قۇرىلتايدىڭ نەگىزگى سەسسياسىندا بەرگەن تاپسىرماسىنا بايلانىستى بەلگىلەندى.
جاڭا مەرەكە كۇنىن ەنگىزۋ تۋرالى ۇكىمەت قاۋلىسى 2024 جىلعى 16 شىلدەدە كۇشىنە ەندى.
مەملەكەت باسشىسى قوعامدا كىتاپ وقۋدىڭ جوعارى مادەنيەتىن دامىتۋدىڭ جانە قازاقستاندىقتار اراسىندا ادەبيەتتى ناسيحاتتاۋدىڭ ماڭىزدىلىعىن بىرنەشە رەت اتاپ ءوتتى.
«شىندىعىندا, كىتاپ وقيتىن حالىق قانا زيالى بولا الادى. ءبىز وسكەلەڭ ۇرپاقتىڭ كىتاپ وقۋعا دەگەن قىزىعۋشىلىعىن وياتۋىمىز كەرەك. بۇل, اسىرەسە, الەۋمەتتىك جەلىلەر زامانىندا وتە قيىن ەكەنىن تۇسىنەمىن. بىراق ءبىز بۇل ماسەلەنى شەشۋىمىز كەرەك. باسقا جول جوق», دەگەن ەدى قاسىم-جومارت توقاەۆ تۇركىستاندا وتكەن ۇلتتىق قۇرىلتايدىڭ ەكىنشى وتىرىسىندا (2023 جىل).
پرەزيدەنت سونداي-اق قازاقستان نارىعىنداعى كوركەم ادەبيەتتىڭ 90 پايىزعا جۋىعى شەتەلدەن كەلەتىنىنە الاڭداۋشىلىق ءبىلدىردى.
«ەلىمىزدىڭ ەرەكشەلىگىن كورسەتەتىن, ۇلتتىق مۇددەمىزگە ساي كەلەتىن كىتاپتاردى بارىنشا كوپ باسىپ شىعارۋ وتە ماڭىزدى. ءبىز سمارتفوننىڭ بالاعا ارنالعان كىتاپتى الماستىرۋىنا جول بەرە المايمىز. بۇگىنگى تاڭدا ەلىمىزدىڭ مەكتەپ كىتاپحانالارىندا 130 ميلليون كىتاپ بار. دەگەنمەن, ولاردىڭ اراسىندا كوركەم ادەبيەتتىڭ ۇلەسى ماردىمسىز», دەدى پرەزيدەنت.
وسى ورايدا مەملەكەت باسشىسى «بالالار كىتاپحاناسى» باعدارلاماسىن جۇزەگە اسىرۋدى, قازاق ادەبيەتىنىڭ بالالارعا ارنالعان ءتۇرلى كەزەڭ مەن جانرلاردى قامتيتىن شىعارمالارىنىڭ ءتىزىمىن قالىپتاستىرىپ, قولجەتىمدى ەتۋدى تاپسىردى.
