ۋنيۆەرسيتەت كىتاپحاناسىنىڭ ىرگەتاسى 1962 جىلى قالانعان. 1996 جىلى 23 مامىردا تسەلينوگراد پەداگوگيكالىق ينستيتۋتى مەن تسەلينوگراد ينجەنەرلىك-قۇرىلىس ينستيتۋتىنىڭ بىرىگۋىنە بايلانىستى ل.ن.گۋميلەۆ اتىنداعى ەۋرازيا ۋنيۆەرسيتەتى قۇرىلىپ, ولاردىڭ كىتاپحانالارى دا بىرىككەن. سودان بەرى بۇل مەكەمە وقۋ ورنىنىڭ زياتكەرلىك الەۋەتىن ارتتىرىپ, ەلىمىزدىڭ ءبىلىم بەرۋ كەڭىستىگىندە ەرەكشە ورنى بار, مازمۇنى باي, مۇمكىندىگى مول عىلىمي كىتاپحانا رەتىندە قالىپتاستى.
كىتاپحانا ديرەكتورى باقىتجان اسەتىلدا ۇلىنىڭ ايتۋىنشا, ۋنيۆەرسيتەت كىتاپحانالارىنىڭ ءۇش نەگىزگى ماقساتى بولادى. ءبىرىنشىسى – وقۋ ۇدەرىسىن ساپالى وقۋلىقتارمەن قامتاماسىز ەتۋ. ەكىنشىسى – ارنايى ادەبيەتتەر ارقىلى عىلىمي زەرتتەۋ جۇمىستارىنا قولداۋ كورسەتۋ. ءۇشىنشىسى – ستۋدەنتتەردىڭ رۋحاني-مادەني تۇرعىدان وسۋىنە قولايلى جاعداي جاساۋ.
«وقىتۋشىلار مەن ستۋدەنتتەردىڭ سۇرانىسى نەگىزىندە كىتاپتار ساتىپ الىنىپ, قور جىل سايىن جاڭارىپ وتىرادى. ۋاقىت تالابىنا ساي قازىر تسيفرلىق جۇيەگە باسا نازار اۋدارىپ وتىرمىز. ماسەلەن, كەيىنگى جىلدارى قاراجاتتىڭ باسىم بولىگى ەلەكتروندى رەسۋرستاردى ساتىپ الۋعا جۇمسالدى. ۋنيۆەرسيتەت 26 وتاندىق جانە شەتەلدىك ەلەكتروندى كىتاپحانا بازاسىمەن جۇمىس ىستەيدى. ولاردىڭ ىشىندە عىلىمي جۋرنالدار, ماقالالار, ديسسەرتاتسيالار مەن مونوگرافيالار بار. بۇل جۇيە ستۋدەنتتەرگە 24/7 فورماتىندا قىزمەت كورسەتىپ, بىلىمگە قاشىقتان قول جەتكىزۋگە مۇمكىندىك بەرەدى. كىتاپحانامىزدا ەلەكتروندى كاتالوگتەۋ جۇمىسى دا جەتىلدىرىلگەن. ءاربىر كىتاپتىڭ اۆتورىن, شىققان جىلىن, تاقىرىبىن تياناقتى جازامىز. سونىڭ ارقاسىندا قاجەتتى باسىلىمدى بىرنەشە سەكۋندتا تابۋعا بولادى. سونىمەن قاتار ءار ستۋدەنتكە جەكە لوگين بەرىلىپ, كىتاپ وقۋ ستاتيستيكاسى باقىلانىپ وتىرادى. تسيفرلىق جۇيەگە كوشكەندىكتەن, بۇرىنعىداي ۇزىن-سونار كەزەككە تۇرۋدىڭ دا قاجەتى جوق», دەدى ب.اسەتىلدا ۇلى.
قازىر كىتاپحانا تاڭعى 09:00-دەن كەشكى 23:00-گە دەيىن جۇمىس ىستەيدى. وقىرماندارعا قىزمەت كورسەتەتىن 830 ورىندى 10 وقۋ زالى, 150 كومپيۋتەرمەن جابدىقتالعان 2 ەلەكتروندى زال, 2 ابونەمەنت پەن 2 كوۆوركينگ ايماقتارى بار. ەرەكشە قاجەتتىلىگى بار ستۋدەنتتەرگە دە ارنايى جاعداي جاسالعان. قوزعالىسى شەكتەۋلى, كورۋ نەمەسە ەستۋ قابىلەتى تومەن وقىرماندارعا ۇيىنە دەيىن كىتاپ جەتكىزۋ قىزمەتى قاراستىرىلعان.
وسى كىتاپحانانىڭ تاعى ءبىر ماقتانار تۇسى – سيرەك كىتاپتار مەن قولجازبالار قورى. مۇندا بەلگىلى تۇلعالاردىڭ تۇپنۇسقا ەڭبەكتەرى ساقتاۋلى تۇر. اكادەميكتەر ءا.مارعۇلان, م.قاراتاەۆ, س.قيراباەۆ, جازۋشى س.بەگالين, پروفەسسورلار ت.كاكىشەۆ, و.نۇرماعامبەتوۆا, ا.سەيدىمبەك, ت.جۇرتباي جانە تاعى باسقا عىلىم مەن مادەنيەت قايراتكەرلەرىنىڭ قولجازبالارى بار. جۋىردا عانا قازاق ونوماستيكاسىنىڭ تەوريالىق نەگىزىن قالاعان عالىم تەلعوجا جانۇزاق ءوزىنىڭ ءومىر بويى جيناعان 800-دەن استام قۇندى كىتابىن ۋنيۆەرسيتەت كىتاپحاناسىنا سىيعا تارتىپ, ارنايى ونوماستيكالىق قور اشىلدى. مۇندا, ءتىپتى كونە شاعاتاي تىلىندەگى جازبالاردان باستاپ, الاش قوزعالىسىنا قاتىستى مۇراعاتتىق ماتەريالدار دا بار.
كىتاپحانا بۇگىندە تەك كىتاپ بەرۋمەن عانا شەكتەلمەيدى. مۇندا «Web of Science», «Scopus», «Springer», «Elsevier» سياقتى بازالارمەن جۇمىس ىستەي الاتىن ماماندار بار. ولار زەرتتەۋشىلەرگە عىلىمي جاريالانىمداردى ىزدەۋدەن باستاپ, h-يندەكس پەن اۆتورلىق پروفيل قۇرۋعا دەيىن كومەك كورسەتەدى.
ءبىلىم مەن عىلىمنان بولەك, ۋنيۆەرسيتەتتىڭ ءۇشىنشى ميسسياسى – قوعاممەن بايلانىس. وسى باعىتتا كىتاپحانا ءتۇرلى فورماتتاعى كەزدەسۋلەر ۇيىمداستىرادى. بۇل – ۋنيۆەرسيتەتتى تەك وقۋ ورنى ەمەس, مادەني-رۋحاني ورتالىق رەتىندە تانىتادى. بۇدان بولەك, كىتاپحانادا اعىلشىن ءتىلىن ۇيرەنۋگە ارنالعان ارنايى ورتا قالىپتاسقان. مۇندا تەك كىتاپ وقىپ قويماي, ءتۇرلى تاقىرىپتاعى كەزدەسۋ-كلۋبتارعا قاتىسىپ, تاجىريبە جيناۋعا بولادى.
كىتاپحانا – تەك عيمارات ەمەس, ونىڭ جۇرەگى – كىتاپحاناشى. بۇل ماماندىقتى پايدا كوزى ءۇشىن ەمەس, شىن نيەتپەن, جۇرەك قالاۋىمەن عانا تاڭدايدى. كوپتەگەن قىزمەتكەر وسى جەردە ەڭبەك جولىن باستاپ, زەينەتكە دە وسى مەكەمەدەن شىققان. راسىمەن, مۇنداي تۇراقتىلىق پەن ادالدىق – ناعىز كاسىبي جانكەشتىلىك.
ەۋرازيا ۇلتتىق ۋنيۆەرسيتەتىنىڭ عىلىمي كىتاپحاناسى – عىلىم مەن مادەنيەتتىڭ, تاريح پەن تەحنولوگيانىڭ توعىسقان ورنى. مۇندا ءار وقىرمان ءوزىن ىزدەنۋشى, زەرتتەۋشى, ويلانۋشى رەتىندە سەزىنەدى. سوندىقتان ونىڭ اسەرى بىردەن بايقالماۋى مۇمكىن, بىراق كىتاپ پەن كىتاپحانا ورتاسى ادامدى جان-جاقتى وسىرەدى.
