فوتو: UPL.uz
جوبا Iman Chocolate & Fruits كومپانياسىنىڭ باستاماسىمەن جۇزەگە اسقان.
مۋزەيگە كەلۋشىلەرگە شوكولادتىڭ پايدا بولۋ تاريحىنان باستاپ, زاماناۋي كونديتەرلىك تەحنولوگيالارعا دەيىنگى دامۋ جولى تانىستىرىلادى. ەكسپوزيتسيادا ەجەلگى وركەنيەتتەردىڭ تاعام مادەنيەتى, سونىمەن قاتار الەمدىك ساۋلەت تۋىندىلارى مەن تاريحي تۇلعالاردىڭ شوكولادتان جاسالعان مۇسىندەرى قويىلعان.
بارلىعى 19 ەرەكشە ەكسپونات ۇسىنىلعان. ونىڭ ىشىندە 16-سىن مۋزەيى شەبەرلەرى قولدان دايىنداعان. كورمەدە تاشكەنت پەن سامارقاندتاعى ايگىلى مەدرەسەلەر, كەلتە مۇنارا, الىشەر ناۋاي مەن ءامىر تەمىردىڭ بەينەلەرى, سونداي-اق ءتاج-ماحال, ازاتتىق ءمۇسىنى, ەيفەل مۇناراسى, كوليزەي مەن تانوستىڭ قولى سياقتى جاھاندىق سيمۆولدار شوكولاد تۇرىندە جاسالعان.
850 كەلى شوكولاد جۇمسالعان بۇل تۋىندىلاردىڭ كوپشىلىگى قارا شوكولادتان دايىندالسا, ەكى ءمۇسىن اق شوكولادپەن بەينەلەنگەن. ءاربىر كومپوزيتسيانى جاساۋعا كەم دەگەندە جەتى كۇن كەتكەن. شوكولاد مۇسىندەرى ارنايى لاكپەن جابىلعان جانە قاجەتتى جاعدايدا ءبىر جىلعا دەيىن ساقتالادى.
مۋزەيدە شوكولاد ءوندىرىسىنىڭ بۇگە-شۇگەسىنە دەيىن كورسەتىلگەن ارنايى شەبەرحانا جۇمىس ىستەيدى. سونىمەن قاتار الداعى ۋاقىتتا تاجىريبەلى كونديتەرلەردىڭ قاتىسۋىمەن شەبەرلىك ساباقتارى دا وتەدى دەپ جوسپارلانىپ وتىر.
بۇل مادەني جوبا وزبەكستانداعى گاسترونوميالىق ءتۋريزمدى دامىتۋدىڭ جاڭا ءبىر باعىتىنا اينالىپ, ۇلتتىق ءتاتتى ونىمدەر ونەرىن كوپشىلىككە تانىتۋعا سەپ بولماق.
