اكۆارەل بوياۋى – كەسكىندەمەدەگى ەڭ كۇردەلى ادىستەردىڭ ءبىرى. ول مينيمالدى قۇرالدار مەن ماكسيمالدى مانەردى پايدالانا وتىرىپ, الەمدى بارلىق تۇستەردە, نازىك ءارى شىنايى تۇردە كورسەتە الادى. وسىناۋ جەڭىل ءارى قوزعالمالى كەسكىندەمە تەحنيكاسى ەرەكشە شەبەرلىك پەن شىدامدىلىقتى تالاپ ەتەتىنى تاعى بار. ۇيىمداستىرۋشىلار ءداستۇرلى جوبانىڭ اياسى جىلدان-جىلعا كەڭىپ, ۇسىنىلعان جۇمىستاردىڭ مازمۇن-مانەرى سالماقتانا تۇسكەنىن ايتادى.
«كەيىنگى كەزدەردە جەر-جەردە بەينەلەۋ ونەرىنىڭ بارلىق سالاسىن قامتىعان جەكە ادامداردىڭ كورمەلەرى ياكي توپتىق كورمەلەر ۇزدىكسىز ءوتىپ جاتىر. بۇل – حالىقتىڭ ونەرگە دەگەن قۇلشىنىسىن, الەمگە دەگەن كوزقاراسىن قالىپتاستىراتىن دۇنيەلەر. كورمە وتكىزۋشىلەر سانعا ەمەس, ساپاعا جۇمىس ىستەي باستادى. كورمەگە قويىلعان جۇمىستاردىڭ اراسىنان كوڭىلگە قوناتىن, جۇرەكتى قوزعايتىن تۋىندىلاردى كەزدەستىردىك. مۇندا كاسىبي شەبەرلەر دە, ونەردەن ورنەك ىزدەگەن جاس تالانتتار دا بار. مايلى بوياۋدا كەتكەن قاتەلىكتەردى قايتا تۇزەۋگە بولادى, ال اكۆارەلدە ول مۇمكىن ەمەس, ءبىر دەتالدان اۋىتقىپ كەتسەڭ, قايتا جازۋعا تۋرا كەلەدى. بۇل جانر سونىسىمەن كۇردەلى. بوياۋدىڭ ۇيلەسىمىن سەزىنبەسەڭ ءبارى بەكەر», دەيدى سۋرەتشى توققوجا قوجاعۇلوۆ.
ەلىمىزدە اكۆارەل كورمەلەرى سيرەك ۇيىمداستىرىلادى. سوعان قاراماستان وعان كەلۋشىلەر مەن اكۆارەل شەبەرلەرىنىڭ شىعارماشىلىعىنا قىزىعاتىندار از ەمەس. اكۆارەلدىك كەسكىندەمەنىڭ سان الۋان جانرلارى مەن مانەرىنىڭ تۇتاس سپەكترىن كورسەتەتىن جوبا ءساۋىردىڭ سوڭىنا دەيىن جالعاسپاق.
«بۇل – مۋزەيمەن بىرلەسكەن جوبامىز. كورمەگە 110 جۇمىس قويىلدى. ەڭ ەگدە سۋرەتشىمىز 84-تە بولسا, كورمەگە قاتىسۋشىلاردىڭ ەڭ جاسى ون سەگىزدە. ولاردى بىرىكتىرەتىن ورتاق قۇندىلىق – ونەرگە دەگەن سۇيىسپەنشىلىك. الماتىدا قانات قاققان جوبا تۇتاس رەسپۋبليكانى قامتىپ وتىر. تاۋەلسىزدىك العاننان بەرى اكۆارەل مەن كەسكىندەمەگە اسا ءمان بەرىلگەن جوق. سوندىقتان دا بۇل سالالارعا سۇرانىس تا از بولدى. كورمەنى ۇيىمداستىرۋداعى ماقساتىمىز وسىناۋ ەرەكشە جانردىڭ ءورىسىن كەڭەيتۋگە باعىتتالىپ وتىر», دەيدى جوبا جەتەكشىسى, «سۋرەتشىلەر اكادەمياسى» قق ۆيتسە-پرەزيدەنتى مارلان نىسانباەۆ.
كورمەگە قاتىسۋشىلاردىڭ قاتارىندا بەلگىلى سۋرەتشىلەر, ونەر قايراتكەرلەرى, ونەر اكادەمياسىنىڭ اكادەميكتەرى مەن سۋرەتشى-پەداگوگتەر بار.
الماتى
