ميحايل ياكوۆلەۆيچ انتونيۋك 1935 جىلى 12 ناۋرىزدا ۋكرايناداعى ۆولىن وبلىسىنىڭ تۋليچەۆ اۋىلىندا دۇنيەگە كەلگەن. 1961 جىلى ول لۆوۆ قولدانبالى جانە ساندىك ونەر ينستيتۋتىنىڭ مونۋمەنتالدى ونەر فاكۋلتەتىن ءتامامداپ, سول جىلى-اق قازاقستانعا قونىس اۋدارادى. سودان بەرى تسەلينوگراد (قازىرگى استانا) قالاسىنداعى مونۋمەنتالدى ونەردىڭ دامۋىنا زور ۇلەس قوسىپ, قوعامدىق عيماراتتار مەن قۇرىلىستاردى ۆيتراجدار مەن موزايكا تۋىندىلارىمەن بەزەندىرگەن جەتەكشى شەبەرلەردىڭ بىرىنە اينالدى.
1963 جىلى ميحايل انتونيۋك كسرو سۋرەتشىلەر وداعىنا مۇشەلىككە قابىلدانىپ, كەيىننەن قازاقستان سۋرەتشىلەر وداعىنىڭ تسەلينوگراد بولىمشەسىن ۇيىمداستىرۋشىلاردىڭ ءبىرى بولدى. ونىڭ موزايكالىق جانە ۆيتراجدىق تۋىندىلارى قازاقستاننىڭ ءتۇرلى قوعامدىق جانە مادەني نىساندارىن كوركەيتىپ, ءوزى كوپتەگەن وبلىستىق, رەسپۋبليكالىق جانە بۇكىلوداقتىق كورمەلەرگە قاتىسقان. 1991 جىلى سۋرەتشىگە «قازاقستان رەسپۋبليكاسىنىڭ ەڭبەك سىڭىرگەن ونەر قايراتكەرى» قۇرمەتتى اتاعى بەرىلگەن.
كورمەنىڭ اشىلۋ سالتاناتىنا مادەنيەت پەن ونەر سالاسىنىڭ تانىمال وكىلدەرى قاتىستى. اتاپ ايتقاندا, «ەۋرازيا» تەلەارناسى باس ديرەكتورىنىڭ ءبىرىنشى ورىنباسارى سۆەتلانا جالماعامبەتوۆا, قازاقستاننىڭ ەڭبەك سىڭىرگەن قايراتكەرى, تاتارستاننىڭ حالىق سۋرەتشىسى, مەملەكەتتىك سىيلىقتاردىڭ لاۋرەاتى كاميل مۋللاشەۆ جانە قازاقستاننىڭ ەڭبەك سىڭىرگەن ساۋلەتشىسى, حالىقارالىق ساۋلەت اكادەمياسىنىڭ اكادەميگى ۆاسيلي توسكين. قوناقتار سۋرەتشىنىڭ كەڭەستىك كەزەڭدەگى شىعارماشىلىعى, موزايكالىق تۋىندىلارى مەن ۆيتراجدارى تۋرالى جىلى ەستەلىكتەرىمەن ءبولىستى.
كورمە كۋراتورى, سۋرەتشىنىڭ ۇلى ياروسلاۆ انتونيۋك: «اكەمنىڭ تۋىندىلارى — ءار ادامنىڭ ومىرىندەگى ماڭىزدى جانە وزگەرمەس ساتتەردى بەينەلەيدى», — دەپ كورەرمەندەردى ەكسپوزيتسيامەن جاقىنىراق تانىسۋعا شاقىردى.
ەكسپوزيتسيادا قازاق حالقىنىڭ تاريحى مەن ۇلتتىق بولمىسىن بەينەلەيتىن, ويۋ-ورنەك ەلەمەنتتەرىمەن كومكەرىلگەن كارتينالار, موزايكالار مەن ۆيتراجدار قويىلعان. بۇل تۋىندىلار — تەرەڭ ماعىناعا, كومپوزيتسيالىق ۇيلەسىمگە جانە كوركەمدىك ىرعاققا تولى.
ء«وز ءداۋىرىنىڭ سۋرەتشىسى» كورمەسى 2025 جىلعى 11 ءساۋىر مەن 11 ماۋسىم ارالىعىندا قر ۇلتتىق مۋزەيىنىڭ 7-قاباتىنداعى ۋاقىتشا كورمەلەر زالىندا كەلۋشىلەرگە ۇسىنىلادى.
