«4LMNTS»
ماسەلەن, «4LMNTS» جوباسى – حالىقارالىق دەڭگەيدەگى مارافوندارعا قاتىسۋدى ارماندايتىن اۋەسقوي سپورتشىلارعا تاپتىرماس مۇمكىندىك. ال «AICA» ستارتابى – دىبىستى ماتىنگە اينالدىراتىن ءتيىمدى پلاتفورما. سونىمەن قاتار وكپەنىڭ قاتەرلى ىسىگىن ەرتە كەزەڭدە انىقتايتىن «Forus Data» جوباسى – مەديتسينالىق سالانى جاڭا دەڭگەيگە كوتەرۋگە باعىتتالعان تىڭ باستاما رەتىندە ەرەكشەلەنەدى. الەمنىڭ ەڭ ۇزدىك مارافوندارىندا باق سىناۋ – ءار سپورتسۇيەر جاننىڭ ارمانى. الايدا شەتەلدىك جارىستارعا تىركەلۋ, سلوت الۋ (جۇگىرۋ تاپسىرۋ), ۆيزا رەسىمدەۋ, جول جانە جاتىن ورىن ماسەلەسىن رەتتەۋ وڭاي شارۋا ەمەس. ءدال وسى تۇيتكىلدى شەشۋدى ماقسات ەتكەن جانات تۇرعىمباەۆ «4LMNTS» اتتى ەرەكشە ستارتاپ قۇردى. بۇل جوبا قازىر ەلىمىزدەگى جۇزدەگەن اۋەسقوي جەلاياقتىڭ الەمدىك دەڭگەيدەگى مارافوندارعا قاتىسۋىنا كەرەمەت جول اشىپ وتىر.
«4LMNTS» – حالىقارالىق مارافوندارعا قاتىسقىسى كەلەتىندەرگە تولىق قولداۋ كورسەتەتىن وتاندىق ستارتاپ. اتالعان اگەنتتىك ءوز كليەنتتەرىنە تىركەۋدەن باستاپ, ۆيزا, ۇشۋ بيلەتتەرى, قوناقۇي برونداۋ, ترانسفەر جانە جارىس الدىنداعى كەڭەستەرگە دەيىن بارلىق قاجەتتى قىزمەتتى ۇسىنادى. سپورتشىعا تەك دايىندالىپ, جۇگىرۋگە شىقسا بولعانى, قالعان بارلىق شارۋانى كوماندا اتقارادى.
ستارتاپتىڭ اتاۋى اعىلشىن تىلىندەگى «Four Elements» ء(تورت تابيعي ەلەمەنت) سوزىنەن الىنعان. بۇل – ادام مەن تابيعاتتىڭ, ەرىك-جىگەر پەن ءتوزىمنىڭ ۇيلەسىمىن جەتكىزەتىن اتاۋ. «4LMNTS» ارقىلى كوپتەگەن تانىمال مارافوندارعا قاتىسۋعا بولادى. اتاپ ايتساق, لوندون, نيۋ-يورك, بوستون, بەرلين, توكيو, چيكاگو مارافوندارى – «World Marathon Majors» دەپ اتالاتىن «ۇلكەن التىلىققا» كىرەدى. ولاردىڭ ارقايسىسىنا 54 مىڭ جەلاياق قاتىسا الادى.
ستارتاپ توبى مۇنىمەن توقتاماي, باسقا دا قالالارداعى مارافوندارعا, ترياتلون, ۋلترامارافون جانە ترەيل جارىستارىنا قاتىسۋ مۇمكىندىگىن ۇسىنىپ جاتىر. جوبانىڭ ەڭ ۇلكەن ەرەكشەلىگى – ءار قاتىسۋشىعا جەكە قولداۋ كورسەتۋ. ياعني جاپپاي توپپەن ەمەس, ناقتى ءار كليەنتپەن جەكە جۇمىس جۇرەدى. وسى ۋاقىتقا دەيىن «4LMNTS» ارقىلى جۇزدەن استام وتانداسىمىز الەمدىك مارافوندارعا قاتىسىپ, ەرەكشە اسەرمەن ورالعان. ولاردىڭ اراسىندا كاسىپكەرلەر دە, مۇعالىمدەر دە, ءتىپتى زەينەتكەرلەر دە بار. جۇگىرۋ — بارىنە ورتاق قۇندىلىق, ال بۇل ستارتاپ — سول ارماندى ىسكە اسىراتىن قۇرال.
بولاشاقتا كوماندا مارافون ءتۋريزمىن كەڭەيتىپ, ورتالىق ازيا دەڭگەيىندە قىزمەت كورسەتۋدى كوزدەپ وتىر. سونىمەن قاتار جاسوسپىرىمدەرگە, مۇمكىندىگى شەكتەۋلى جاندارعا ارنالعان ارنايى باعدارلاما ازىرلەمەك.
ستارتاپتىڭ نەگىزىن قالاۋشى جانات تۇرعىمباەۆ ءوزى دە جۇگىرۋمەن اينالىساتىن اۋەسقوي سپورتشى. ونىڭ ايتۋىنشا, ەلىمىزدە ستارتاپ قوزعالىسىن دامىتۋعا قولايلى جاعداي جاسالعان.
«كەيىنگى جىلدارى اكسەلەراتور, حاكاتون جانە ينكۋباتورلار سياقتى ستارتاپتاردى قولداۋ ينفراقۇرىلىمدارى ايتارلىقتاي وسكەنى بايقالدى. «Astana Hub» جانە «Most Hub» سياقتى باستامالار ستارتاپتاردى قولداپ, ىنتالاندىرۋدا ماڭىزدى ءرول اتقارادى. ولار جوبالارعا قولداۋ كورسەتىپ, وقۋعا جاعداي جاساپ, مەنتورلىقپەن قامتاماسىز ەتەدى. بۇل ەلىمىزدەگى جاڭا يدەيالار مەن تەحنولوگيالاردىڭ دامۋىنا ۇلكەن ۇلەس قوسادى», دەيدى ول.
«AICA»
«AICA» ستارتابى دىبىس جازۋ جانە سويلەۋ اناليتيكاسى قىزمەتتەرىن ۇسىناتىن جاساندى ينتەللەكت پلاتفورماسىن جاساپ شىعاردى. ونىڭ نەگىزگى قىزمەتى دىبىستى ماتىنگە اينالدىرادى. بۇنىڭ پايداسى ۇشان-تەڭىز. ماسەلەن, بۇرىن تىلشىلەر سپيكەردىڭ پىكىرىن ديكتوفونعا جازىپ, كەيىن ونى ءوزى تىڭداپ, قاعازعا تۇسىرۋگە ءبىراز ۋاقىتىن سارپ ەتەتىن. ال قازىر «AICA»-نىڭ ارقاسىندا ءبىر ساعاتتىق اۋديونى ءبىر مينۋتتىڭ ىشىندە ماتىنگە اينالدىرۋعا بولادى. ورىسشا-قازاقشا ارالاسقان سوزدەردى باعدارلاما ءوزى-اق وڭدەپ جىبەرەدى. پلاتفورمانىڭ تاعى ءبىر قىزمەتى ءماتىندى دىبىستاي الادى.
«AICA»-نىڭ نەگىزىن قالاۋشىلاردىڭ ءبىرى نۇرلان ءجۇنىسوۆتىڭ ايتۋىنشا, ەلىمىزدە وسى قىزمەتتەرگە اي سايىن 100 مىڭنان استام سۇرانىس تۇسەدى. قازاق تىلىندەگى جاقسى قىزمەت جوقتىڭ قاسى. بۇل نارىق ەندى عانا قالىپتاسىپ جاتىر. دەگەنمەن قازىردىڭ وزىندە قولدانۋشىلار وسى پلاتفورما ارقىلى دىبىستىق حابارلامالاردى, جينالىستار مەن كونفەرەنتسيالاردىڭ اۋديوجازباسىن, لەكتسيالار مەن سەمينارلار اۋديوسىن, YouTube جانە باسقا پلاتفورمالارداعى جازبالاردى قارقىندى ترانسكريپتسيالاپ جاتقان كورىنەدى.
«بۇل – اۋديوجازبانى, قوڭىراۋدى, سۇحباتتى جوعارى دالدىكپەن ماتىنگە جىلدام اينالدىرىپ بەرەتىن بىردەن-ءبىر ىڭعايلى قىزمەت. «AICA»-نىڭ ەڭ باستى ارتىقشىلىعى – قازاق ءتىلى مەن سويلەۋ ەرەكشەلىكتەرىنە نەگىزدەلگەن لوكاليزاتسيا. ەكى تىلدە سويلەسە, اۋىزەكى سلەنگ پەن ايماقتاعى ەرەكشەلىكتەر ارالاسسا, بۇل قىزمەت كورسەتۋدى الدەقايدا قيىنداتادى. الايدا ءارتۇرلى دىبىس پەن ينتوناتسيا پارامەترلەرىن تاڭداپ, ءتىپتى ەموتسيانى تانىپ, ءماتىندى قازاق, ورىس, اعىلشىن جانە وزبەك تىلدەرىندە كاسىبي اۋديوعا اينالدىرادى. بۇل قىزمەت وقۋ ماتەريالدارىن, جارناما روليكتەرىن جانە الەۋمەتتىك جەلىلەرگە ارنالعان كونتەنتتى جاساۋعا وتە قولايلى. سونىمەن قاتار پلاتفورما تەلەفون ارقىلى جاسالاتىن الاياقتىقتى انىقتايدى. بۇل كومپانيالارعا قىزمەتكەرلەردىڭ جۇمىسىن قاداعالاۋعا, كليەنتتەرگە نە قاجەت ەكەنىن تۇسىنۋگە كوپ كومەكتەسەدى. باسەكەلەستەرىمىز – رەسەيلىك جانە حالىقارالىق سەرۆيستەر, ويتكەنى نارىق جاڭادان پايدا بولىپ, ەندى قالىپتاسىپ جاتىر», دەيدى ول.
«AICA» كومانداسى بولاشاقتا پلاتفورمانىڭ مۇمكىندىگىن كەڭەيتۋدى جوسپارلاپ وتىر. ولار جاڭا تىلدەردى قوسىپ, اناليتيكالىق قۇرالداردى جەتىلدىرمەك جانە ءارتۇرلى سالالارعا بەيىمدەلگەن شەشىمدەر ۇسىنۋ ارقىلى كليەنتتەرگە كوبىرەك پايدا اكەلۋدى كوزدەيدى.
«Forus Data»
«Forus Data» ستارتابى وكپەنىڭ قاتەرلى ىسىگىن ەرتە انىقتايتىن جي مودەلىن جاساپ شىقتى. اتالعان جۇيە دارىگەردىڭ جۇمىسىن ايتارلىقتاي جەڭىلدەتەدى. سەبەبى ونى قولدانباسا دياگنوز قويۋعا 40-50 مينۋت ۋاقىت كەتەدى, ال نەيرون جەلى تالداۋ ساپاسىنىڭ دالدىگىن ساقتاي وتىرىپ, دياگنوزدى 10 مينۋتتا انىقتاپ بەرەدى.
جوبا اۆتورلارىنىڭ ايتۋىنشا, كوپتەگەن جاعدايدا ناۋقاستار دەر كەزىندە تەكسەرۋدەن وتپەيدى نەمەسە ادام فاكتورىنىڭ سالدارىنان ىسىك بەلگىلەرى بايقالماي قالۋى مۇمكىن. جي بولسا ەشتەڭەنى نازاردان تىس قالدىرمايدى, ميلليونداعان بەينەنى وڭدەپ, قاۋىپتى ايماقتاردى ءدال كورسەتەدى. مۇنداي تەحنولوگيالار دامىعان ەلدەردە كوپتەن بەرى قولدانىلىپ كەلەدى. ال «Forus Data» – ەلىمىزدە وسى باعىتتا تابىستى جۇمىس ىستەپ جاتقان العاشقى ستارتاپتاردىڭ ءبىرى.
جوبانىڭ نەگىزىن قالاۋشىلار – رۋسلان ورمانبەتوۆ پەن المات مەڭدەباەۆ. ەكەۋى دە مەديتسينا مەن تەحنولوگيانىڭ قيىلىسقان تۇسىنا قىزىعۋشىلىق تانىتىپ, ناقتى ماسەلەلەردى شەشۋگە باعىتتالعان ءونىم جاساۋدى كوزدەگەن.
«نەيرون جەلى سۇرىپتاۋدى باعدارشام جۇيەسىمەن جاسايدى. جاسىل ءتۇس ساۋ ادامداردى بىلدىرەدى. قىزىل ءتۇس – ونكولوگتىڭ شۇعىل كومەگىن قاجەت ەتەتىندەر. ال سارى ءتۇس جي-ءدىڭ كۇدىگىن, قوسىمشا باقىلاۋ مەن تەكسەرۋدى قاجەت ەتەتىندەردى بىلدىرەدى. باستى مىندەت – مۇنداي جاعدايلاردى مەديتسينانىڭ اقپارات جۇيەسىنە ەنگىزىپ, ءۇش-بەس ايدا باقىلاۋعا الۋ. ماقساتى – كەز كەلگەن وزگەرىستى دەر كەزىندە انىقتاۋ جانە اۋرۋدى توقتاتۋ ءۇشىن ءارى قاراي باقىلاۋ. نەيرون جەلىدەن وسىنداي بەلگى العان ونكولوگتەر مۇنى قوسىمشا زەرتتەي الادى», دەيدى المات مەڭدەباەۆ.
ال رۋسلان ورمانبەتوۆتىڭ ايتۋىنشا, بۇل – تولىعىمەن وتاندىق جوبا.
«نەيرون جەلى اعزاداعى 3 ميلليمەتردەن اساتىن كۇدىكتى اۋرۋ وشاعىن تابا الادى. سەبەبى وسىنداي كىشكەنتاي نارسە اۋرۋدىڭ پايدا بولعانىنان حابار بەرۋى مۇمكىن. مودەل ءتىپتى راديولوگ كورمەۋى مۇمكىن كىشكەنتاي وزگەرىستى دە بايقايدى», دەيدى جوبا اۆتورى.
بۇگىنگى تاڭدا «Forus Data» جۇيەسى ەلىمىزدەگى 200-دەن استام مەديتسينا ۇيىمىنا ورناتىلعان. تاڭعالارلىعى – بۇل جۇيە ءاردايىم جاڭارىپ, جاڭا دەرەكتەر ارقىلى وزدىگىنەن جەتىلىپ وتىرادى. مۇنىڭ ارقاسىندا دياگنوز قويۋ دالدىگى دە ۇنەمى ارتىپ كەلەدى.
«Forus Data» كومانداسى دەربەس مەديتسينالىق مالىمەتتەردىڭ قاۋىپسىزدىگىن ءبىرىنشى ورىنعا قويادى. بارلىق دەرەك وڭدەۋ ۇدەرىسى شيفرلانعان تۇردە وتەدى, ال جۇيە ناۋقاستىڭ جەكە باسىنا قاتىستى مالىمەتتەردى انىقتاي المايدى. بۇل – حالىقارالىق تالاپتارعا ساي كەلەتىن ماڭىزدى شارتتاردىڭ ءبىرى.
سونىمەن قاتار كوماندا جاساندى ينتەللەكت ەشقاشان دارىگەردى الماستىرمايتىنىن, تەك قوسىمشا قۇرال ەكەنىن باسا ايتادى. قورىتىندى شەشىمدى — ارينە, مامان قابىلدايدى. بىراق جي جۇيەسى سول شەشىمگە نەگىز بولاتىن ماڭىزدى كومەكشى قۇرال بولا الادى.
ستارتاپ اۆتورلارىنىڭ ايتۋىنشا, «Forus Data» تەك وكپە وبىرىمەن شەكتەلىپ قالمايدى. قازىرگى تاڭدا ولار جۇرەك-قان تامىرلارى اۋرۋلارى مەن ءسۇت بەزى وبىرىن انىقتاۋعا ارنالعان الگوريتمدەر جاساۋ باعىتىندا جۇمىس ىستەپ جاتىر. سونىمەن قاتار شەتەلدىك نارىققا شىعۋ جوسپارى دا بار. رەسەي, تۇركيا, ورتالىق ازيا ەلدەرى, ءتىپتى ەۋروپا ەلدەرىنەن قىزىعۋشىلىق ءبىلدىرىپ وتىرعان سەرىكتەستەر جەتەرلىك.
ء«بىزدىڭ ماقسات – ەلىمىزدە عانا ەمەس, بۇكىل وڭىردە ساپالى ءارى قولجەتىمدى سكرينينگ قىزمەتىن ۇسىنۋ. بۇل ارقىلى مىڭداعان ادامنىڭ ءومىرىن ساقتاپ قالۋعا بولادى», دەيدى ستارتاپ وكىلدەرى.
«Forus Data» – بۇل جاي عانا تەحنولوگيالىق جوبا ەمەس. بۇل – ادامداردىڭ دەنساۋلىعى ءۇشىن كۇرەسەتىن, ناقتى ناتيجە بەرەتىن جۇيە. جاساندى ينتەللەكتىنى ءتيىمدى پايدالانۋ ارقىلى ولار ونكولوگيا سالاسىندا شىنايى وزگەرىس جاساپ جاتىر. وتاندىق ستارتاپتىڭ بۇل باستاماسى مەديتسينانىڭ جاڭا دەڭگەيگە كوتەرىلىپ كەلە جاتقانىن كورسەتەدى. تەك دياگنوز قويىپ قانا قويماي, ءومىردى ساقتاۋعا كومەكتەسەتىن تەحنولوگيا — ناعىز بولاشاقتىڭ مەديتسيناسى.
