قازاق ادەبيەتى مەن مادەنيەتىن دامىتۋدا جەمىستى ەڭبەك ەتىپ كەلە جاتقان ءسوز شەبەرى ءا.قايىربەكوۆتىڭ ءومىرى مەن شىعارماشىلىعىن ناسيحاتتاۋدى ماقسات تۇتقان ءىس-شارانى جۋرناليست, بەلگىلى قوعام قايراتكەرى ءامىرجان قوسان جۇرگىزىپ وتىردى. 22 جىل قازاق باسپاسوزىندە جان-جاقتى تانىلىپ, شيرەك عاسىر بويى قازاق ادەبيەتىنىڭ كلاسسيكتەرى ءسابيت مۇقانوۆ پەن عابيت مۇسىرەپوۆ مۋزەي كەشەنىن باسقارىپ كەلگەن اقىننىڭ رۋحانياتقا سىڭىرگەن ەڭبەگىن لايىقتى باعالاپ, قۇتتىقتاۋ حاتىن جولداعان مەملەكەت باسشىسى قاسىم-جومارت توقاەۆتىڭ لەبىزىن الماتى قالاسى اكىمىنىڭ ورىنباسارى ازامات قالدىبەكوۆ وقىپ بەردى. ء«سىز قازاق ادەبيەتىندە وزىندىك قولتاڭباسىمەن تانىلعان بەلگىلى اقىنسىز. شوقتىعى بيىك شىعارمالارىڭىز بەن تۋىندىلارىڭىز ۇلت رۋحانياتىن بايىتۋعا قىزمەت ەتىپ جاتىر. عىلىمي زەرتتەۋ جۇمىسىن جۇرگىزۋگە اتسالىسىپ, بۇقارالىق اقپارات قۇرالدارىنىڭ دامۋىنا ۇلەس قوستىڭىز. ءسىزدى 70 جاسقا تولعان مەرەيتويىڭىزبەن قۇتتىقتاي وتىرىپ, كوپ جىلدىق قاجىرلى ەڭبەگىڭىز ءۇشىن العىسىمدى بىلدىرەمىن» دەلىنگەن ەل پرەزيدەنتىنىڭ قۇتتىقتاۋ حاتىندا. شاھار اكىمىنىڭ ورىنباسارى ازامات بەسكەمپىر ۇلى قازاق ادەبيەتىنىڭ ءورىسىن كەڭەيتىپ, وقىرمانىنا كوركەم ءارى كەسەك دۇنيەلەر ۇسىنىپ كەلە جاتقان بايسالدى قالام يەسىن توسبەلگىمەن ماراپاتتادى. سونداي-اق بار سانالى عۇمىرىن ادەبيەتكە ارناعان قارىمدى قالامگەر, ادەبيەت زەرتتەۋشىسى, تاجىريبەلى سىنشى, دارىندى اۋدارماشىنى قۇتتىقتاعان مادەنيەت جانە اقپارات ءمينيسترى ايدا بالاەۆا مەن اباي وبلىسىنىڭ اكىمى بەرىك ءۋاليدىڭ دە ىقىلاسى حاتتارى ارقىلى مەرەيتوي يەسىنە جەتكىزىلدى.
پوەزيا – جۋرناليستيكا – عىلىم. بۇل ۇشتاعان – ادىلعازى قايىربەكوۆ شىعارماشىلىعىنىڭ اداستىرماس شامشىراعى, بۇلجىماس باعدارى. ادەبي جيىندا ءسوز العان ادەبيەت جانە ونەر ينستيتۋتىنىڭ ديرەكتورى كەنجەحان ماتىجانوۆ, «قازاق ادەبيەتى» گازەتىنىڭ باس رەداكتورى باۋىرجان جاقىپ, فيلولوگيا عىلىمدارىنىڭ دوكتورلارى قانسەيىت ابدەز ۇلى, نۇرداۋلەت اقىش, سۋرەتشى ەركىن نۇرازحان, بەلگىلى جۋرناليست قاينار ولجاي رۋحانيات ساردارىنىڭ ازاماتتىق بولمىسى, قالامگەرلىك كەلبەتى مەن تۇلعالىق قاسيەتىن ءار تاراپتان زەردەلەپ, تارقاتىپ جاتتى. اقىننىڭ انگە اۋەستىگىن, بەيمالىم بولىپ كەلگەن سازگەرلىك قىرىن بەلگىلى ءانشى ەركىن شۇكىمان ورىنداعان ء«ان-عۇمىر» ءانى ايگىلەدى.
ەڭبەك جولىن س.مۇقانوۆتىڭ ادەبي-مەموريالدىق مۋزەي-ءۇيىنىڭ تۇڭعىش ەكسكۋرسيا جۇرگىزۋشىسى بولىپ باستاعان ءا.قايىربەكوۆ كەيىن ءتۇرلى اقپارات قۇرالدارىندا ەڭبەك ەتىپ, اسىرەسە ادەبيەت, مادەنيەت, ونەر تاقىرىپتارىنا كوبىرەك قالام تارتتى. ء«ار ماقالاسى ۋاقىت شاڭىنا كومىلىپ قالماي, بۇگىندە قايتالاپ وقۋعا جەتەلەۋىنىڭ ءبىر سىرى ءبىر كۇندىك ەمەس, وزەكتى, ماڭگىلىك ماسەلەلەردى, ۇلت مۇددەسىن, حالىق كوكەيىندەگى ويلاردى قاۋزاعانىندا دەپ بىلەمىز», دەيدى مودەراتور ءا.قوسان.
«ادىلعازى – ليريك اقىن. بىراق ليريكاسىنىڭ ارعى جاعىندا ۇلكەن فيلوسوفيالىق وي جاتادى. اقىن جان-جاقتى ءبىلىمدى بولماسا, جالعىز تالانت ازدىق ەتەدى. ادىلعازى جاسىنان ءبىلىم قۋىپ كەلەدى. اقىننىڭ ەنتسيكلوپەديالىق ءبىلىمىنىڭ ارقاسىندا ءسابيت مۇقانوۆ پەن عابيت مۇسىرەپوۆتىڭ ءومىرى مەن شىعارماشىلىعىن قامتىعان قانشاما ەڭبەك, ماقالالار جارىق كوردى. مۇسىرەپوۆتىڭ ءومىر جولىنىڭ دەرەكتەرىن, شىعارمالارىنىڭ جازىلۋ تاريحىن, حاتتارىن جيناقتاپ, كلاسسيك تۋرالى ەنتسيكلوپەديا قۇراستىرىپ شىعارۋ – ول تۋرالى تەرەڭ بىلەتىن ادامنىڭ عانا قولىنان كەلەتىن ءىس. م.اۋەزوۆتىڭ مۋزەي ۇيىنەن كەيىنگى كەڭەستىك كەزەڭدە جاساقتالعان مۋزەيلەردىڭ ءبىرى دە بىرەگەيى س.مۇقانوۆ پەن ع.مۇسىرەپوۆتىڭ مەموريالدى كەشەنىنە ادىلعازىنىڭ ديرەكتور بولۋى, سول قاراشاڭىراقتا تالماي, ماڭداي تەرىن سىپىرىپ قىزمەت ەتۋى مۋزەي مەرەيىن ۇستەم ەتە ءتۇستى», دەيدى مەرەكە قۇلكەنوۆ.
ءا.قايىربەكوۆ ادەبيەتىمىزدىڭ بيىك تۇلعالارى س.مۇقانوۆ پەن ع.مۇسىرەپوۆتىڭ ءومىرى مەن شىعارماشىلىعىنا قاتىستى 50-دەن اسا كىتاپتىڭ العىسوزىن جازعان, قۇراستىرۋشىسى, رەداكتورى, رەداكتسيا القاسىنىڭ مۇشەسى بولدى جانە قوس كلاسسيككە بايلانىستى 50-دەن اسا حالىقارالىق, رەسپۋبليكالىق عىلىمي كونفەرەنتسيالاردا بايانداما جاساعان. اقىننىڭ بەنەفيسىندە «ادىلعازىنىڭ ادەمى الەمى» اتتى بەينەبايان كورسەتىلدى. اقىن الپىس جاسىندا ونتومدىق شىعارمالار جيناعىن شىعارسا, 70 جاسىندا ءۇش كىتابىمەن وقىرمانى الدىندا ەسەپ بەرىپ وتىر. بەلگىلى قالامگەرلەر, ادەبيەت زەرتتەۋشىلەرى, مۋزەي قىزمەتكەرلەرى قاتىسقان بەنەفيستە «عازالعۇمىر», «كوك داپتەر» ماقالالار جيناعى مەن «بيبليوگرافيالىق كورسەتكىش» سياقتى جاڭا كىتاپتارىنىڭ جىبەكباۋى كەسىلىپ, كىتاپحاناعا تارتۋ ەتىلدى.
الماتى
