حالىقارالىق عارىش ستانساسىنا كەزەكتى, 73-ۇزاقمەرزىمدى ەكسپەديتسيامەن ۇشىرىلىم جاساعان كەمەنىڭ بورتىندا تاجىريبەلى كوماندير, بورتينجەنەر جانە ەكسپەديتسيا كومانديرى, «روسكوسموس» عارىشكەرى سەرگەي رىجيكوۆ, كەمەنىڭ ءبىرىنشى بورتينجەنەرى, ەكسپەديتسيا بورتينجەنەرى, «روسكوسموس» عارىشكەرى الەكسەي زۋبريتسكي جانە كەمەنىڭ ەكىنشى بورتينجەنەرى, NASA عارىشكەرى دجوناتان كيم بار. ۇشىرۋ ۇدەرىسى شتاتتىق رەجىمدە ءوتتى.
بايقوڭىرعا جۇمىس ساپارىمەن بارعان پارلامەنت دەپۋتاتتارى «ەلىمىزدەن ءتورتىنشى عارىشكەردى ۇشىرۋ قاجەت» دەگەن ۇسىنىس ايتىپ, بۇل ماقساتقا ارنايى جوبا ازىرلەۋ كەرەكتىگىن دە ۇسىندى. ساپار بارىسىندا دەپۋتاتتار كۇن تارتىبىندەگى نەگىزگى ءۇش ماسەلەنى قارادى. العاشقىسى — «بايتەرەك» عارىش كەشەنىندەگى كادر ماسەلەسى. قازىر كەشەندە 150-دەن اسا مامان جۇمىس ىستەيدى, ولاردىڭ 80 پايىزى — قازاقستان ازاماتتارى. الايدا الداعى ۋاقىتتا جۇمىس كۇشىن 500 ادامعا دەيىن ارتتىرۋ جوسپارلانىپ وتىر. مامانداردىڭ ايتۋىنشا, كادر تاپشىلىعىنا ەڭ الدىمەن جالاقىنىڭ تومەندىگى سەبەپ.
ايتا كەتەيىك, بيىل بايقوڭىردان ەلىمىز العاشقى زىمىرانىن ۇشىرادى. بۇل قادام «بايتەرەك» جوباسى اياسىندا جۇزەگە اسىرىلماق. قازىرگى تاڭدا عارىشتىق زىمىران كەشەنى قىزۋ دايىندىق ۇستىندە. كۇن تارتىبىندەگى ەكىنشى ماسەلە — تەحنيكالىق بازانى قالىپتاستىرۋعا قاتىستى بولدى. جيىن بارىسىندا ەلىمىزدەن تاعى ءبىر عارىشكەر دايارلاۋ جايى دا كوتەرىلدى. بۇل باعىتتا كوپ دايىندىق پەن ۋاقىت قاجەت ەكەنى ايتىلدى. دەپۋتاتتار الداعى ونجىلدىقتا ءتورتىنشى قازاق عارىشكەرىن عارىشقا اتتاندىرۋدى جوسپارلاپ وتىر. وسى كۇنى عارىشكەرلەردى ۇشىرۋ ىسىمەن رەسەي, اقش جانە قىتاي اينالىسىپ كەلەدى. بۇل تۇستا دەپۋتاتتار ەلىمىزدىڭ رەسەيمەن بىرلەسىپ جۇمىس ىستەۋى قاجەتتىگىن العا تارتتى. ال كۇن تارتىبىندەگى بارلىق ماسەلە ۇكىمەتكە جەتكىزىلمەك.
بۇدان بولەك, «سويۋز مس-27» عارىش كەمەسى باسقارىلاتىن ۇشىرىلىم قارساڭىندا «بايقوڭىر» عارىش ايلاعىندا «روسكوسموس» باسشىسى دميتري باكانوۆ پەن تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى اەروعارىش كوميتەتىنىڭ توراعاسى باۋبەك ورالماعامبەتوۆتىڭ كەزدەسۋى ءوتتى. تاراپتار «بايقوڭىر» عارىش كەشەنىنىڭ الداعى 70 جىلدىق مەرەيتويىن, عارىش ايلاعىنىڭ تۋريستىك الەۋەتىنىڭ مۇمكىندىگىن تالقىلاپ, بايقوڭىردىڭ قۇرىلعان كۇنىن بىرلەسە اتاپ وتۋگە كەلىستى. سونىمەن قاتار زىمىران ۇشىرۋ جانە عارىش كەشەنىن جاڭعىرتۋ باعىتىنداعى «بايتەرەك» بىرلەسكەن جوباسىن جۇزەگە اسىرۋ ماسەلەسىنە ەرەكشە نازار اۋدارىلدى.
تۋريزم جانە سپورت ۆيتسە-ءمينيسترى ەرجان ەركىنباەۆتىڭ ايتۋىنشا, ءاربىر زىمىران ۇشىرىلىمىنا 2 مىڭنان استام تۋريست كەلەدى.
«زىمىران ۇشىرىلىمىنا كەلەتىن بارلىق تۋريست ارنايى قاۋىپسىزدىك راسىمدەرىنەن وتەدى, جالپى جىلىنا ون شاقتى ۇشىرىلىم بولادى. بايقوڭىر عارىش ايلاعىنداعى تۇيتكىلدى ماسەلەنىڭ ءبىرى – جاتىن ورىنداردىڭ جەتكىلىكسىزدىگى. سوندىقتان زىمىران ۇشىرىلىمى كەزىندە بارلىق قوناقۇي لىق تولادى. ءتىپتى قوناقۇيلەردىڭ كوبىن زىمىراندى ۇشىرۋعا قاتىساتىن تەحنيكالىق قىزمەتكەرلەر يەلەنەدى», دەدى ەرجان ەركىنباەۆ ۇكىمەت وتىرىسىنان كەيىن وتكەن ءباسپاسوز ءماسليحاتىندا.
