قۇدايدىڭ جولى دەسەك تە, الماتىدا ءدىني ساپارلارعا بايلانىستى الاياقتىق جيىلەي باستاعان. بۇل تۋرالى وڭىرلىك كوممۋنيكاتسيالار قىزمەتىنىڭ ءباسپاسوز الاڭىندا قازاقستان تۋريستىك قاۋىمداستىعىنىڭ ديرەكتورى راشيدا شايكەنوۆا مالىمدەدى.
«سەنىم مەن اياۋشىلىق ادامداردىڭ ەڭ ءالسىز تۇسى. وسىنى پايدالاناتىن الاياقتار مەشىتتەر مەن تۋروپەراتورلاردىڭ اتىن جامىلىپ, ساداقا جينايدى, ناقتى اقپارات بەرمەي, جەكە شوتتارعا اقشا اۋدارۋدى سۇرايدى», دەيدى ر.شايكەنوۆا.
جالپى كەڭىنەن تارالعان الاياقتىق تاسىلدەرىنە جالعان ۆيزالار جاساۋ, جوق بيلەتتەردى ساتۋ مەن جوق تۇرعىن ۇيلەردى ساۋدالاۋ جاتادى. البەتتە, مۇنىڭ سالدارى اۋىر, ويتكەنى الدانعان ەل اقشاسىنان ايىرىلىپ قانا قويماي, شەكارادان دا وتە المايدى.
شايكەنوۆا قاجىلىقتى ۇيىمداستىرۋ جونىندەگى قىزمەتتەردى قازاقستان مۇسىلماندارى ءدىني باسقارماسىندا اككرەديتتەلگەن كومپانيالار عانا اتقارۋعا قۇقىلى ەكەندىگىن ەسكە سالا كەلە: «بۇگىندە وسىنداي 15 كومپانيا بار, ولاردىڭ ءتىزىمى قازاقستان مۇسىلماندارى ءدىني باسقارماسىنىڭ رەسمي سايتىندا ورنالاستىرىلعان. ۋمرا ءۇشىن سەرىكتەس تاڭداعاندا سەنىمدىلىگىنە, شارتتاردىڭ اشىقتىعى مەن زاڭدى جاۋاپكەرشىلىككە نازار اۋدارۋ كەرەك», دەدى.
الماتى پوليتسيا دەپارتامەنتى تەرگەۋ باسقارماسى باستىعىنىڭ ورىنباسارى قايرات قاسىمباەۆتىڭ ايتۋىنشا, بارلىق شاعىمدار جەكە قارالادى. قاجىلىققا جالعان دەلدالداردىڭ كەسىرىنەن ۇشىپ كەتە الماعان جەكەلەگەن جاعدايلار تەرگەلىپ, كىنالىلەر جاۋاپقا تارتىلادى.
الماتى پوليتسياسى مەملەكەتتىك جانە ءدىني مەكەمەلەرمەن, تۋريستىك قاۋىمداستىقتارمەن بەلسەندى تۇردە, بىرىگە قيمىلدايدى.
سوندىقتان سپيكەرلەر تۋروپەراتورلار تۋرالى مالىمەتتەردى الدىن الا تەكسەرىپ, بەيتانىس ادامدارعا قاراجات اۋدارماۋعا, الاياقتىقتىڭ ءىزى بايقالعان بويدا پوليتسياعا جۇگىنۋگە كەڭەس بەرىپ وتىر.
