بۇل تۋرالى ۇكىمەت وتىرىسىندا تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ مالىمدەدى. ءمينيستردىڭ ايتۋىنشا, جاڭا تسيفرلىق قىزمەت كۇتپەگەن جاعداي كەزىندە كولىك يەسىن جەدەل تۇردە حاباردار ەتۋدى كوزدەيدى. ول ءۇشىن جۇيەگە كولىكتىڭ مەملەكەتتىك ءنومىرىن ەنگىزىپ, ورىن العان جاعدايدى تاڭداۋ جەتكىلىكتى. سول مەزەتتە كولىك يەسىنە ءانونيمدى تۇردە حابارلاما جىبەرىلەدى. «بۇل سەرۆيس ءوزارا كومەك پەن ازاماتتىق جاۋاپكەرشىلىكتىڭ قۇرالىنا اينالادى دەپ ۇمىتتەنەمىز», دەدى جاسلان ماديەۆ. اتالعان قىزمەت «eGov» ءموبيلدى قوسىمشاسى, مەملەكەتتىك قىزمەتتەر پورتالى, سونىمەن قاتار ارنايى چات-بوتتار ارقىلى قولجەتىمدى بولادى.
بۇدان بولەك, «eGov» پورتالىندا جاڭا پايدالى فۋنكتسيا پايدا بولدى. ەندى كەز كەلگەن قولدانۋشى ءوز اتىنا قانشا SIM-كارتا مەن IMEI تىركەلگەنىن بىلە الادى. ول ءۇشىن تەك جسن ەنگىزۋ جەتكىلىكتى, جۇيە ادام اتىنا تىركەلگەن بارلىق ءنومىردى كورسەتەدى. جاسلان ماديەۆ بۇل قىزمەتتىڭ ىسكە قوسىلۋىنا قاتىستى پىكىر ءبىلدىرىپ, تەكسەرۋ كۇماندى نەمەسە ۇمىت قالعان نومىرلەردى انىقتاۋعا كومەكتەسەتىنىن اتاپ ءوتتى. «ەگەر كورسەتىلگەن نومىرلەر سانى ءسىز شىن مانىندە قولداناتىن نومىرلەرگە سايكەس كەلمەسە, بىردەن ءوزىڭىزدىڭ بايلانىس وپەراتورىڭىزعا جۇگىنىڭىز», دەدى مينيستر.
