اتالعان باعدارلاما 10-11-سىنىپ وقۋشىلارىنا مەكتەپپەن قاتار كوللەدجدە كاسىپتىك ءبىلىم الۋعا مۇمكىندىك بەرەدى. وسىلايشا, جوعارى سىنىپ وقۋشىلارى تەوريالىق بىلىممەن قاتار, تاجىريبە جيناقتاپ, ەڭبەك نارىعىنا دايىن مامان رەتىندە شىعادى.
ەكسپەريمەنتتىك ءبىلىم باعدارلاماسى ەلورداداعى كاسىپتىك-تەحنيكالىق كوللەدج, سەرۆيس جانە تۋريزم كوللەدجى مەن تەحنيكالىق كوللەدجدە جۇزەگە استى.
كاسىپتىك-تەحنيكالىق كوللەدج ديرەكتورىنىڭ كاسىپتىك وقىتۋ بويىنشا ورىنباسارى ءنازيرا توعايباەۆا اتالعان باعدارلامانىڭ ەرەكشەلىگىنە توقتالدى.
«بۇل جوبانىڭ ەرەكشەلىگى مەكتەپ وقۋشىلارى 10-11-سىنىپتا وقىپ ءجۇرىپ-اق كوللەدجدەرگە بارىپ, قالاعان ماماندىقتارى بويىنشا كاسىبي ءبىلىم الا الادى. كاسىبي ءبىلىم الۋ ماقساتىندا ولار تەوريالىق جانە تاجىريبەلىك ءبىلىم الدى. وسىلايشا, وقۋشىلار مەكتەپ اتتەستاتىن الماي جاتىپ, بىلىكتىلىك تۋرالى ديپلوم الىپ وتىر. مەكتەپ وقۋشىلارى 11-سىنىپتان كەيىن جوعارى وقۋ ورنىنا وقۋعا تۇسپەي قالعان جاعدايلار بولادى. سول كەزدە ولار كەز كەلگەن جۇمىس ورنىنا تولىققاندى مامان رەتىندە جۇمىسقا كىرە الادى. وسىلايشا, ەلىمىزدە جۇمىسسىز جۇرگەن جاستاردىڭ سانى ازايادى», دەدى ن.توعايباەۆا.
ايتا كەتەيىك, ديپلوم الىپ وتىرعان مەكتەپ وقۋشىلارى «اۆتوموبيل كولىگىنە تەحنيكالىق قىزمەت كورسەتۋ, جوندەۋ جانە پايدالانۋ», «تاماقتاندىرۋدى ۇيىمداستىرۋ», «تىگىن ءوندىرىسى جانە كيىمدەردى ۇلگىلەۋ», سونداي-اق «دانەكەرلەۋ ءىسى» ماماندىقتارى بويىنشا ءبىلىم العان.
