فوتو: instagram.com/janibek_alimkhanuly
جانىبەك ءالىمحان ۇلى - اناۋەل نگاميسسەنگە جەكپە-جەك الدىنداعى سوڭعى ءباسپاسوز كونفەرەنتسياسىنا قاتىسىپ, دايىندىقتارى تۋرالى ايتىپ بەردى.
جانىبەك ءالىمحان ۇلى وسى كەزدەسۋگە تۇركىستان وبلىسىندا دايىندالعان. سپاررينگ قارسىلاستار رەتىندى جەرگىلىكتى بوكسشىلاردى تاڭداپ, تاجىريبە بولىسكەن. ول ەلىمىزدە وتەتىن جەكپە-جەگىنىڭ ايرىقشا ماڭىزدى ەكەنىن, تىڭعىلىقتى دايىندالعانىن اتاپ ءوتتى.
«72 كەلىدە 4 بەلبەۋدى جيناساق دەگەن ماقساتىمىز بار. قارسىلاسقا كەلەتىن بولساق, قارسىلاس اۋەسقوي, كاسىپقوي بوكستا جۇدىرىقتاسقان وتە تاجىريبەلى, جەڭىلىپ كورمەگەن بوكسشى قۇداي قالاسا باعىمىزدى وسى جەكپە-جەكتە سىناپ كورەمىز. قازاقستاندىقتار, جانكۇيەرلەر ۇلكەن بوكستى ساعىنىپ قالعان. ۇلكەن شوۋلار ەلىمىزدە بولماعان. سوندىقتان بارىمىزدى سالىپ ونەر كورسەتەمىز. ءبىز ءاردايىم قارسىلاس تاڭداماعانبىز جانە مىقتى بوكسشىلارمەن شىعۋدى ماقسات ەتىپ قويعانبىز. باستى ماقساتىم - ورتا سالماقتا ۇستەمدىك ەتۋ», دەدى ج. ءالىمحان ۇلى.
ال ونىڭ قارسىلاسى استاناعا جەكپە-جەككە 1 اپتا قالعاندا كەلىپتى. اناۋەل نگاميسسەنگە قازاق ەلى, قازاق بوكس مەكتەبى تۋرالى وڭ پىكىر ءبىلدىردى. سونداي-اق, جانىبەك ءالىمحان ۇلىنا قارسى بۇرىنعى قارسىلاستارىنا قاراعاندا كوبىرەك جاتتىعىپ, دايىندالعانىن جەتكىزدى.
«جانىبەك - مىقتى قارسىلاس. مەن ونىمەن جۇدىرىقتاسۋ ءۇشىن ادەتتەگىدەن ۇزاق دايىندالدىم بىراق وزىمە سەنىمدىمىن, دايىندىعىم دا جاقسى», دەدى فرانتسيالىق بوكسشى.
اۋقىمدى بوكس كەشىن ۇيىمداستىرۋشى Nomad پروموۋشەنى قازاقستاندا وسى فورماتتاعى بوكس كەشىن ۇيىمداستىرۋ وڭايعا سوقپاسا دا, العان باعىتتان تايماي جانكۇيەرلەردى قۋانتۋعا دايىن ەكەنىن تىلگە تيەك ەتتى.
«مۇحيتتىڭ ارعى جاعىنان بوكسشىلاردى الدىرۋ, دەڭگەيى جوعارى بوكس كەشىن ۇيىمداستىرۋ بارىسىندا بيۋروكراتيالىق كەدەرگىلەرگە تاپ بولساق تا, ونى شەشە بىلدىك. بۇل شارانىڭ جارنامالانۋى تۇرعىسىنان ءبىراز سىن ايتىلىپ جاتىر. دەسە دە ءبىز قازىر تاجىريبە جاساپ جاتىرمىز. كەلەسى رەتتە بارلىق سىن ەسكەرىلەدى. قازىر بوكس كەشىنە ارنالعان بيلەتتەردىڭ 50 پايىزدان كوبى ساتىلىپ كەتتى. سوڭعى ەكى كۇندە بيلەت الۋ بەلسەندىلىگى ارتاتىنان سەنىم مول», دەدى Nomad پروموۋشەنىنىڭ باس ديرەكتورى رۋستام قۋانىشاليەۆ.
