فوتو: اقوردا
ءوزارا الىس-بەرىستىڭ كولەمىن ارتتىرۋ ءۇشىن پرەزيدەنتتەر قۇزىرلى ورگاندارعا ناقتى شارالار قابىلداۋ تۋرالى تاپسىرما بەردى. سونداي-اق قاسىم-جومارت توقاەۆ قازاقستاننىڭ سۋ رەسۋرستارىن باسقارۋ ىسىندە سلوۆەن تاراپىنىڭ وزىق تاجىريبەسىن زەردەلەپ, بىرلەسە جۇمىس ىستەۋگە دايىن ەكەنىن جەتكىزدى.
بۇدان بولەك, تاراپتار مادەني-گۋمانيتارلىق ىقپالداستىق جايىندا دا پىكىر الماستى.
ء«بىلىم, عىلىم جانە مادەنيەت سالالارىنداعى قارىم-قاتىناستى جانداندىرۋعا مول مۇمكىندىك بار. جالپى سلوۆەنيانىڭ ءبىلىم بەرۋ جۇيەسى دۇنيە جۇزىندە وزىق جۇيە رەتىندە مويىندالعان. سوندىقتان ءبىز ەكى ەل ۋنيۆەرسيتەتتەرى اراسىندا بايلانىس ورناتۋعا مۇددەلىمىز. سلوۆەنيانىڭ يوجەف ستەفان ينستيتۋتى نازارباەۆ ۋنيۆەرسيتەتىمەن بايلانىس ورناتۋعا قىزىعۋشىلىق تانىتىپ وتىر. قازاقستان سلوۆەنيانىڭ جوعارى وقۋ ورىندارىمەن جانە زەرتتەۋ ورتالىقتارىمەن ىنتىماقتاستىقتى نىعايتۋعا دايىن», دەدى مەملەكەت باسشىسى.
تاراپتار حالىقارالىق جانە ايماقتىق وزەكتى ماسەلەلەردى تالقىلاپ, ۇستانىمدارىنىڭ ورتاق ەكەنىن جەتكىزدى.
«قازىرگى گەوساياسي جاعداي وتە كۇردەلى. پرەزيدەنت پيرتس-مۋسار ەكەۋىمىز الەمدەگى قاقتىعىستاردى بىرىككەن ۇلتتار ۇيىمى جارعىسى مەن حالىقارالىق قۇقىق قاعيداتتارىنا ساي بەيبىت جولمەن شەشۋ قاجەت ەكەنىن قۇپتادىق. كوپجاقتى قۇرىلىمدار اياسىنداعى ىقپالداستىقتى ودان ءارى كۇشەيتۋگە مۇددەلى ەكەنىمىزدى راستادىق. الماتىدا ورتالىق ازيا مەن اۋعانستان ءۇشىن ورنىقتى دامۋ ماقساتتارى جونىندەگى بىرىككەن ۇلتتار ۇيىمىنىڭ ايماقتىق ورتالىعىن اشۋ تۋرالى باستامانى قولداعان سلوۆەنيا تاراپىنا ريزاشىلىعىمدى بىلدىرەمىن. جالپى بۇگىنگى كەلىسسوزدەر جەمىستى بولدى دەپ كۇمانسىز ايتۋعا بولادى. وسى ساپاردىڭ ناتيجەسىندە قازاق-سلوۆەن ىقپالداستىعى نىعايىپ, جاڭا دەڭگەيگە كوتەرىلەدى دەپ سەنەمىن. بىرلەسكەن كۇش-جىگەرىمىزدىڭ ارقاسىندا ءبىز ورتاق ماقساتتارعا قول جەتكىزەمىز», دەدى قاسىم-جومارت توقاەۆ.
ناتاشا پيرتس-مۋسار سلوۆەنيا تاراپىنىڭ بارلىق باعىت بويىنشا ەكىجاقتى ىنتىماقتاستىقتى نىعايتۋعا دايىن ەكەنىن مالىمدەدى.
«بۇگىنگى كەزدەسۋلەر, جالپى بۇل ساپار سلوۆەنيا مەن قازاقستان اراسىنداعى قارىم-قاتىناستىڭ جاڭا پاراعىن اشادى دەپ ويلايمىن. ەكى ەل دە ءوزارا تۇسىنىستىك پەن قۇرمەتكە نەگىزدەلگەن حالىقارالىق قۇقىق, ورنىقتى دامۋ مەن سەرىكتەستىك قاعيداتتارىن قولدايدى. مەن بۇعان ريزامىن. كەلەشەكتە دە وسى باعىتتا جۇمىس ىستەي بەرەتىنىمىزگە سەنىمدىمىن», دەدى سلوۆەنيا پرەزيدەنتى.
