فوتو:اقوردا
مەملەكەت باسشىسى سلوۆەن دەلەگاتسياسىنا قۇرمەت كورسەتىپ, قازاقستاننىڭ ەۋروپاداعى ۋاقىت سىنىنان وتكەن سەنىمدى سەرىكتەسى سلوۆەنيامەن ءوزارا ءتيىمدى ىنتىماقتاستىقتى دامىتۋعا بەيىل ەكەنىن راستادى.
ء«سىزدىڭ بۇل ساپارىڭىز ەكى ەل اراسىنداعى ءوزارا ىنتىماقتاستىققا تىڭ سەرپىن بەرۋ تۇرعىسىنان وتە ماڭىزدى. جاڭا عانا كوپتەگەن تاقىرىپتى, ونىڭ ىشىندە حالىقارالىق احۋالعا بايلانىستى كەيبىر نازىك ماسەلەلەردى تالقىلاعان اسا مازمۇندى كەزدەسۋ وتكىزدىك. ءبىز ەكىجاقتى ىقپالداستىقتى دامىتۋعا نيەتتى ەكەنىمىزدى قۋاتتادىق. ناقتى ناتيجەلەرگە قول جەتكىزۋ ءۇشىن بار كۇش-جىگەرىمىزدى جۇمسايمىز», دەدى قازاقستان پرەزيدەنتى.
قاسىم-جومارت توقاەۆ ەكىجاقتى قارىم-قاتىناستارعا تىڭ سەرپىن بەرەتىن باعىتتاردى اتاپ ءوتىپ, قازاقستاندا سلوۆەنيا بيزنەسىنە قولايلى جاعداي جاساۋعا نيەتتى ەكەنىن جەتكىزدى. بۇل ءۇشىن كاسىپكەرلىك قىزمەتتى رەتتەۋدىڭ اشىقتىعىن قامتاماسىز ەتۋ, ينۆەستيتسيانى قورعاۋ مەن ەكونوميكانى ءارتاراپتاندىرۋ كوزدەلىپ وتىر.
مەملەكەت باسشىسى استانادا وتەتىن قازاقستان-سلوۆەنيا بيزنەس-فورۋمىنا ەرەكشە ءمان بەرەتىنىن جەتكىزىپ, اتالعان جيىن ەكى ەلدىڭ ساۋدا-ينۆەستيتسيالىق بايلانىسىن ودان ءارى كەڭەيتەتىنىنە توقتالدى.
ناتاشا پيرتس-مۋسار استانادا قوناقجايلىق كورسەتكەنى ءۇشىن قاسىم-جومارت توقاەۆقا العىس ايتتى
«بۇل ساپار ەكونوميكالىق ىنتىماقتاستىعىمىزدى تەرەڭدەتۋگە سەپتىگىن تيگىزەدى دەپ ويلايمىن. اتالعان ماقساتتى ەكى ەل دە قولدايدى. بۇدان دا جوعارى جەتىستىكتەرگە جەتەتىنىمىزگە سەنىمدىمىن. وعان ءبىزدىڭ مول مۇمكىندىگىمىز بار. ەلدەرىمىز اراسىنداعى تاۋار اينالىمى جىل سايىن ارتىپ كەلەدى. ءوزىڭىز ايتقانداي, سلوۆەنيانىڭ قازاقستان ەكونوميكاسىنا سالعان ينۆەستيتسياسىنىڭ كولەمى 200 ميلليون دوللارعا جەتتى. بىراق الەۋەتىمىز بۇدان دا زور. وسى سەبەپتى استاناعا مەنىمەن بىرگە سلوۆەنيانىڭ جەتەكشى 25 كومپانياسىنان قۇرالعان ۇلكەن بيزنەس-دەلەگاتسيا كەلدى. مەن بۇعان قۋانىشتىمىن», دەدى سلوۆەنيا پرەزيدەنتى.
تاراپتار ساۋدا, ينۆەستيتسيا, كولىك-لوگيستيكا, ماڭىزدى مينەرالدار, تسيفرلاندىرۋ, جاساندى ينتەللەكت, دەنساۋلىق ساقتاۋ جانە تۋريزم سياقتى پەرسپەكتيۆتى سالالارداعى ىقپالداستىقتىڭ بىرقاتار ماسەلەسىن قاراستىردى.
