ەكو-حابپەن بىرگە ۇيىمداستىرىلعان باستامادا قالا مەيرامحانالارى, دۇكەندەرى جانە باسقا كومپانيالار پلاستيك قالدىقتاردى ازايتىپ, قايتا وڭدەۋ ءۇشىن بىرىكتى.
بيزنەستى ناۋقانعا تارتۋدا قالا كافەلەرى مەن مەيرامحانالارىندا ecocoin باعدارلاماسى ىسكە استى. قالا تۇرعىندارى ءبىر رەت قولدانىلاتىن پلاستيكالىق ىدىستارمەن ەمەس, ۇيدەن ءوز سۋسىندارىن اكەلدى. ەكولوگياعا قوسقان ۇلەسى ءۇشىن العىس رەتىندە قاتىسۋشىلارعا ەكو-حابتا قايتا وڭدەلگەن پلاستيكتەن جاسالعان كادەسىيلار مەن برەلوكتارعا ايىرباستاۋعا بولاتىن ارنايى ecocoin مونەتالارى تابىس ەتىلدى.
الماتى ەكو-حابىنىڭ نەگىزىن قالاۋشىلاردىڭ ءبىرى, ەكولوگ ەۆگەني مۇحامەدجانوۆتىڭ ايتۋىنشا, ecocoin ناۋقانى تۇتىنۋشىلار جاۋاپكەرشىلىگىن ارتتىرۋعا باعىتتالعان جۇمىستىڭ ءبىر بولشەگى عانا.
«تۇرعىندارعا قوقىس تاستاپ, قورشاعان ورتانى لاستاماۋ, قايتا وڭدەۋدەن الدەقايدا ءتيىمدى ەكەنىن ەسكەرتەمىز. بىرقاتار دامىعان ەلدەردە ءبىر رەتتىك ىدىستارعا تىيىم سالىنعان. الماتىدا دا وسى قاعيداتتاردى ەنگىزۋگە تىرىسامىز. الدا ecocoin جۇيەسىنە كافەلەر مەن مەيرامحانالاردا كوبىرەك تارتىپ, ناۋقانداتۋ مىندەتى تۇر. سونداي-اق زاتتاردىڭ, ياعني كيىم, اياق كيىم, تۇرمىستىق تەحنيكانىڭ قىزمەت ەتۋ مەرزىمىن ۇزارتۋ ءۇشىن ەكوكويندەردى كوتەرمەلەۋ مۇمكىندىگىن قاراستىرامىز. قالا تۇرعىندارى پلاستيك بۇيىمداردان قانشالىقتى باس تارتسا, قورشاعان ورتا سوعۇرلىم تازا بولادى. سوندىقتان ەكولوگياعا اركىمنىڭ قوسار ۇلەسى بار. ءاربىر ەكو باستاما سانالى تۇتىنۋ مادەنيەتىن قالىپتاستىرۋعا كومەكتەسەدى» دەيدى ول.
ەكو-حاب رەسايكلينگ پەن اپسايكلينگتى بەلسەندى تۇردە ناسيحاتتايدى. رەسايكلينگ جاڭا شيكىزاتتى قايتا وڭدەۋگە مۇمكىندىك بەرەدى, مىسالى, جاڭا ونىمدەر جاساۋ ءۇشىن پلاستيكالىق بوتەلكەلەردى ەرىتەدى. اپسايكلينگ ەسكى زاتتارعا جاڭاشا رەڭك بەرەدى, ياعني قايتا وڭدەلگەن ماتەريالداردان ەرەكشە زاتتار جاساۋعا بولادى.
ۇيىمداستىرۋشىلار تازالىق كومپانياسىن كەڭەيتىپ, ونى بيزنەستىڭ جاڭا سالالارىنا ەنگىزۋدى جوسپارلاپ وتىر.
