فوتو: akorda.kz
ء«سىزدىڭ استاناعا العاشقى رەسمي ساپارىڭىز ەكى ەل اراسىنداعى ىنتىماقتاستىقتى ودان ءارى نىعايتۋ تۇرعىسىنان ماڭىزدى. ءبىزدىڭ ارميان حالقى مەن ءسىزدىڭ مەملەكەتكە دەگەن قۇرمەتىمىز بولەك», دەدى پرەزيدەنت.
قاسىم-جومارت توقاەۆ ەلىمىز بەيبىتشىلىك تۋرالى كەلىسىم جوباسى بويىنشا كەلىسسوزدەردىڭ اياقتالىپ, ەرەۆان مەن باكۋ اراسىنداعى مەملەكەتارالىق قارىم-قاتىناستىڭ جاندانۋىن قولدايتىنىن جەتكىزدى. پرەزيدەنتتىڭ پىكىرىنشە, بۇل ايتۋلى وقيعا ارمەنيا مەن ازەربايجان اراسىندا بەيبىت كەلىسىم ورناتۋعا نەگىز قالاپ, ايماقتىڭ قازاقستان جانە ورتالىق ازيا مەملەكەتتەرىمەن ىنتىماقتاستىعىن بەلسەندى تۇردە دامىتۋعا, سونداي-اق قاۋىپسىزدىكتى نىعايتۋعا ىقپال ەتەدى.
ءوز كەزەگىندە ارمەنيانىڭ سىرتقى ىستەر ءمينيسترى قوناقجايلىق تانىتقانى ءۇشىن ريزاشىلىعىن ءبىلدىردى.
ء«بىز ءسىزدىڭ ەكى ەل اراسىنداعى ىقپالداستىققا قاتىستى ۇستانىمىڭىزدى قولدايمىز», دەدى ارارات ميرزويان.
ول ارمەنيا مەن قازاقستاننىڭ سىرتقى ىستەر مينيسترلىكتەرى جانە باسقا دا ۆەدومستۆولارى قاسىم-جومارت توقاەۆتىڭ بىلتىر ەرەۆانعا جاساعان رەسمي ساپارى بارىسىندا قول جەتكىزىلگەن ۋاعدالاستىقتاردى جۇزەگە اسىرۋ بويىنشا جۇمىس ىستەپ جاتقانىن جەتكىزدى.
كەزدەسۋ بارىسىندا ساۋدا-ەكونوميكالىق, ينۆەستيتسيالىق, كولىك-لوگيستيكالىق, مادەني-گۋمانيتارلىق سالالارداعى ەكىجاقتى بايلانىستى ىلگەرىلەتۋ پەرسپەكتيۆاسى قاراستىرىلدى. قازاقستان پرەزيدەنتى وتاندىق بيزنەس وكىلدەرىنىڭ ارمەنياعا تاۋار تاسىمالىن 350 ميلليون دوللارعا دەيىن ۇلعايتۋعا دايىن ەكەنىن مالىمدەدى.
