ەڭ الدىمەن مينيستر «قازاقفيلم» جەرىنىڭ ساتىلۋى جونىندەگى اقپاراتتىڭ جالعان ەكەنىن مالىمدەدى. ول جەردىڭ كينوستۋديا يەلىگىندە قالا بەرەتىنىن جانە كينەماتوگرافيا مۇددەسى ءۇشىن پايدالانىلاتىنىن ايتتى.
ەكىنشى, كينوستۋديانى جوندەۋگە قوماقتى قارجى سالۋعا دايىن ينۆەستورلاردىڭ بار ەكەنى تۋرالى سوزگە قاتىستى جاۋاپ جازدى.
«بۇل اقپارات قوعامدا كەڭ تاراپ ءجۇر, الايدا مۇنداي مالىمدەمەلەردى قۇجاتتارمەن نەمەسە ناقتى كەپىلدىكتەرمەن راستاي المايتىن ادامدار جاساپ وتىر. مەملەكەت, ياعني مادەنيەت جانە اقپارات مينيسترلىگى ناقتى ينۆەستورلارمەن جۇمىس ىستەۋگە دايىن. دەگەنمەن ازىرگە ەشقانداي ناقتى ۇسىنىس, بىردە-ءبىر كەپىلدىك حاتى جوق. بارلىعى تەك اڭگىمە دەڭگەيىندە», دەدى بۇل تۋراسىندا مينيستر.
ءۇشىنشى, «قازاقانيماتسيا» شىعارماشىلىق بىرلەستىگىن استاناعا كوشىرۋ مۇمكىندىگى قاراستىرىلىپ جاتقانىن, ونىڭ جۇمىس ساپاسىنا كەدەرگى كەلتىرمەيتىنىن مالىمدەدى.
«وكىنىشكە وراي, كەيىنگى بەس جىلدا ەلىمىزدە ساپالى انيماتسيالىق فيلمدەر تۇسىرىلگەن جوق. وسىعان بايلانىستى انيماتسيالىق يندۋستريانى كرەاتيۆتى يندۋستريالار قورىنىڭ اياسىندا دامىتۋ ورىندى بولماق. قور قۇرىلىمىندا انيماتسيانى دامىتۋعا باعىتتالعان كرەاتيۆتى حاب جاساقتالىپ جاتىر», دەدى ا. بالاەۆا.
بۇعان قوسا پرەزيدەنت قول قويعان جاڭا زاڭعا سايكەس ەلىمىزدە فيلمدەردى قارجىلاندىرۋدىڭ جالپى كولەمىنىڭ كەمىندە 30%-ى جىل سايىن تىكەلەي «قازاقفيلمگە» باعىتتالاتىنى ايتىلدى.سونداي-اق مەملەكەتتىك قولداۋعا يە بولاتىن كينوجوبالاردى ىرىكتەۋدىڭ جاڭا ەرەجەلەرى بەكىتىلگەنى راستالدى.
«دەمەۋشىلەردى تارتۋدىڭ ارقاسىندا كينوستۋديادا سوڭعى 15 جىلدا جۇرگىزىلمەگەن جوندەۋ جۇمىستارى باستالدى. بۇل – ينفراقۇرىلىمدى جاڭعىرتۋدىڭ العاشقى كەزەڭى. ارينە, اڭگىمە ازىرگە كۇردەلى جوندەۋ تۋرالى ەمەس, بىراق بۇل – «قازاقفيلمدە» جۇمىس ىستەۋ ءۇشىن قالىپتى جاعداي جاساۋعا باعىتتالعان ناقتى قادامدار. اتاپ ايتقىم كەلەتىنى, «قازاقفيلم» تەك كينوتۋىندىلار عانا ەمەس, ەڭ الدىمەن – شارۋاشىلىق جۇرگىزۋشى كومپانيا جانە باسەكەگە قابىلەتتى نارىق قاتىسۋشىسى. ول جوعارى كاسىبي كينوونەردىڭ دامۋىنا لايىقتى جاعداي جاسايدى. سوندىقتان مينيسترلىك بۇل كاسىپورىندى رەجيسسەر نەمەسە اكتەر ەمەس, كينوستۋديا قىزمەتىن تابىستى ءارى ءتيىمدى جۇرگىزۋگە قابىلەتتى كاسىبي مەنەدجەر باسقارۋى ءتيىس دەگەن قاعيدانى بەرىك ۇستانادى.«قازاقفيلمنىڭ» تۇراقتى ءارى ءتيىمدى دامۋىن قامتاماسىز ەتۋ ءۇشىن مينيسترلىك جان-جاقتى قولداۋ كورسەتۋدى جالعاستىرا بەرەدى», دەدى ا. بالاەۆا.
