فوتو: Turizm jane sport ministrligi
2023 جىلى ۇلتتىق سپورت تۇرلەرىمەن تۇراقتى تۇردە شۇعىلدانۋشىلار سانى 619,2 مىڭ ادامدى قۇراسا, 2024 جىلى بۇل كورسەتكىش 666,1 مىڭ ادامعا جەتكەن. سپورتپەن اينالىساتىنداردىڭ جالپى سانىنىڭ 9,6%-ى ۇلتتىق سپورت تۇرلەرىمەن شۇعىلدانادى.
بۇگىندە ۇلتتىق سپورت تۇرلەرىنەن 16 555 ۇيىرمە جۇمىس ىستەيدى. سونىمەن قاتار كادر دايارلاۋ سالاسىندا 15 بالالار مەن جاسوسپىرىمدەر سپورت مەكتەپتەرى جانە 17 سپورت كلۋبى بار. كوماندالاردى دايارلاۋدى ۇيلەستىرۋدى سالا مينيسترلىگىنە قاراستى ۇلتتىق جانە ات سپورتى تۇرلەرى ورتالىعى جۇزەگە اسىرادى.
ءداستۇرلى سپورت تۇرلەرىن ناسيحاتتاۋدا ماڭىزدى ءرولدى اتقاراتىڭ ۇلتتىق سپورت قاۋىمداستىعى قۇرامىندا كوكپار, جامبى اتۋ, اۋدارىسپاق, تەڭگە ءىلۋ, بايگە, ساداق اتۋ, قۇسبەگىلىك, توعىزقۇمالاق, اسىق اتۋ, JORYQ ات سپورتى, ياعني 10 فەدەراتسيا جۇمىس ىستەيدى. ودان بولەك جاپپاي كوكپار, قازاق كۇرەسى جانە جەكپە-جەك فەدەراتسيالارى بار. ولاردىڭ ىشىندە ستراتەگيالىق ويلاۋ قابىلەتىن دامىتاتىن توعىزقۇمالاق, 159 مىڭنان استام ادام جاتتىعاتىن قازاق كۇرەسى جانە 78 مىڭنان استام قاتىسۋشىسى بار كوكپار سپورتى ەرەكشە مانگە يە.
بىلتىر 5-ءشى دۇنيەجۇزىلىك كوشپەلىلەر ويىندارى ءوتىپ, ەتنومادەني قوزعالىسقا, ۇلتتىق سپورت تۇرلەرىن دامىتۋعا دا تىڭ سەرپىن بەردى. سونداي-اق ەلدە جىل سايىن حالىقارالىق تۋرنيرلەردەن باستاپ اۋىل چەمپيوناتتارىنا دەيىنگى 1000-نان استام جارىس وتكىزىلەدى. سونداي-اق ءار 4 جىل سايىن ۇلتتىق سپورت تۇرلەرىنىڭ فەستيۆالى مەن «اقبيداي» رەسپۋبليكالىق اۋىل ويىندارى سياقتى ءىرى سپورتتىق ءىس-شارالار ۇيىمداستىرىلىپ كەلەدى.
