ەلىمىزدە مەملەكەت باسشىسىنىڭ باستاماسىمەن ونوماستيكا سالاسىن رەتكە كەلتىرۋ ءۇشىن اۋقىمدى جۇمىس باستالدى.
«كوشەلەر مەن ەلدى-مەكەندەرگە اتاۋ بەرۋ نەمەسە اتاۋلاردى وزگەرتۋ ماسەلەسىنە كەلگەندە جەرگىلىكتى اتقارۋشى ورگاندار كوپ قاتەلىك جىبەرگەن, بۇل رەتتە ءتىپتى, جەرلەستىك پەن تامىر-تانىستىققا جول بەرىلگەن. سوندىقتان بۇل ءىستى ورتالىقتاندىرۋ تۋرالى شەشىم قابىلداندى. دەپۋتاتتار باستاماعا قولداۋ ءبىلدىردى. سونىڭ ناتيجەسىندە بىزدە ونوماستيكا سالاسىنداعى جۇمىستىڭ بىرىڭعاي ءارى ناقتى رەگلامەنتى بار. الايدا ءتيىستى راسىمدەردى وزگەرتىپ قانا قويماي, سونىمەن بىرگە, بۇل جۇمىسپەن تياناقتى اينالىسۋ كەرەك. تاريحي ادىلدىك قاعيداتىن قاتاڭ ۇستانۋ قاجەت», دەدى پرەزيدەنت.
قاسىم-جومارت توقاەۆ ۇلىقتاۋعا ابدەن لايىق كورنەكتى تاريحي تۇلعالارىمىزدىڭ ەسىمىن ەل جادىندا ساقتاۋ – پەرزەنتتىك پارىزىمىز ءارى جالپىۇلتتىق بولمىسىمىزعا ءتان قاسيەت ەكەنىن باسا ايتتى. بىراق ونوماستيكانى «تاريحي ەڭبەگى» ەشقانداي ارحيۆ قۇجاتتارىمەن راستالماعان تۇلعالاردى ۇلىقتاۋ قۇرالى ەتۋگە بولمايدى.
«تاۋەلسىز قازاقستاندا جوعارى قىزمەت اتقارعان ازاماتتاردىڭ ءوزى كەڭەس ءداۋىرىنىڭ قايراتكەرلەرىن, سونىڭ ىشىندە اشارشىلىقتى ۇيىمداستىرۋعا قاتىسى بار ادامداردى اسىرە ماداقتاۋمەن اينالىسىپ ءجۇر. بۇل – وكىنىشتى ءارى تۇسىنىكسىز نارسە. جالپى بۇل جۇمىستى رەتكە كەلتىرۋ كەرەك», دەدى ەل پرەزيدەنتى.
ەل تاريحىندا ايرىقشا ءرول اتقارعان ايگىلى بابالارىمىزدىڭ ەسىمى كوپتەگەن ەلدى مەكەندەر مەن كوشەلەرگە بەرىلگەن.
«وتكەن زامان قايراتكەرلەرىنىڭ اتىن ەل جادىندا ساقتاۋ ماسەلەسىنە مەيلىنشە سالماقتى كوزقاراسپەن قاراعان ءجون. قالالار مەن كوشەلەردىڭ اتاۋىنان حالقىمىزدىڭ ءتول تاريحى كورىنىس تابۋى قاجەت. ءبىز ادەمى جەر-سۋ اتاۋلارىن جانە حالىق ىشىندە كەڭ تارالعان ءداستۇرلى اتاۋلاردى تولىق پايدالانباي ءجۇرمىز. بىراق اۋىل-ايماقتاردىڭ تاريحي تۇرعىدان ەسكىرگەن اتاۋلارىن وزگەرتۋ ماسەلەسىنە مۇقيات قاراعان ءجون. بۇل جەردە ەشقانداي ناۋقانشىلدىق بولماۋى كەرەك. حالىق اراسىندا جان-جاقتى ءتۇسىندىرۋ جۇمىسىن جۇرگىزىپ, تۇرعىنداردىڭ پىكىرىن ەسكەرۋ ماڭىزدى», دەدى ق.توقاەۆ.
پرەزيدەنتتىڭ ايتۋىنشا, قازىر ەلدى مەكەندەردىڭ اۋماعى ۇلعايىپ جاتىر, قالالاردا جاڭا اۋداندار بوي كوتەرىپ جاتىر. وسىعان بايلانىستى اتاۋى قايتالاناتىن نەمەسە مۇلدەم اتاۋى جوق مىڭداعان كوشە پايدا بولدى.
«بۇل جاعداي ءورت سوندىرۋشىلەرگە, ءتارتىپ ساقشىلارىنا, جەدەل جاردەم مەن باسقا دا قۇرىلىمدارعا قيىندىق تۋعىزادى. ەڭ الدىمەن وسىنداي كوشەلەردىڭ اتاۋىن رەتكە كەلتىرۋ قاجەت», دەيدى ەل پرەزيدەنتى.
