فوتو: اشىق دەرەككوز
امال كۇنى ەرتە تاڭنان ەسىك اشىلىپ, ءتور كورىكتى بولادى. كىشى ۇلكەننىڭ الدىنا بارىپ, سالەم بەرىپ, ء«بىر جاسىڭ قۇتتى بولسىن!», «امال مەرەكەسى قۇتتى بولسىن!» دەپ اقجارما تىلەگىن ارنايدى. ال اق ساقالدى قاريالار مەن اق جاۋلىقتى انالار باتا بەرىپ, ەلدىڭ بىرلىگى مەن بەرەكەسىن تىلەيدى. بۇل كۇنى تەك قول الىسىپ, ءتوس قاعىستىرۋ ەمەس, جۇرەكتەن شىققان شىنايى ءسوز بەن مەيىرىمنىڭ تولقىنى ادامداردى جاقىنداستىرادى. جىل بويى كورىسپەگەن اعايىن قاۋىشىپ, بۇرىنعى وكپە-رەنىشىن كەشىرىپ, اق كوڭىلمەن جاڭا جىلدىڭ ەسىگىن اشادى.
ەرتەدە ءبىر دانا قاريا بولىپتى. ول ءار كوكتەم كەلگەن سايىن اۋىلداعى جاستاردى جيناپ:
– بالالارىم, كۇننىڭ شۋاعى جەردى جىبىتسە, ادام بالاسىنىڭ جۇرەگىن نە جىبىتەدى, بىلەسىڭدەر مە؟ – دەپ سۇراپتى.
جاستاردىڭ ءبىرى:
– جىلى ءسوز, اق تىلەك, – دەسە, ءبىرى:
– شىنايى كەشىرىم مەن مەيىرىم, – دەپ جاۋاپ بەرىپتى.
قاريا ك ۇلىمسىرەپ:
– دۇرىس ايتاسىڭدار, قاراقتارىم. كوكتەم تابيعاتتى تۇلەتەدى, ال امال – ادامنىڭ جانىن جاڭعىرتادى. كورىسۋ – تەك قول الىسۋ ەمەس, جۇرەكتىڭ تازارۋى, رەنىش پەن وكپەنى ۇمىتىپ, اعايىنمەن قايتا تابىسۋ. جانىڭداعى ادامعا جىلۋ سىيلاي الساڭ – ناعىز ادام بولعانىڭ, – دەپتى.
سودان بەرى بۇل ءسوز ەل ىشىندە دانالىققا اينالىپ, امال كۇنى ادامدار ءبىر-بىرىنە كەشىرىم مەن ىزگىلىك سىيلاپ, رەنىشتى ۇمىتىپ, جاڭا جىلدى اق كوڭىلمەن قارسى الۋدى ءداستۇر ەتكەن ەكەن.
سونىمەن قاتار بۇل كۇندى ۇلى دالا توسىندە ەركىن ءومىر سۇرگەن حالىقتىڭ تابيعاتپەن ۇيلەسىم تاپقان ءومىر سالتىنىڭ كورىنىسى دەسەكتە بولادى. سەبەبى قار ەرىپ, جەر بۋسانىپ, تىرشىلىك اتاۋلى قايتا تۇلەگەن شاقتا, ادامزات تا جانىن تازارتىپ, ىشكى دۇنيەسىن جاڭعىرتادى. جۇرەككە جىلىلىق ۇيالاتىپ, تاتۋلىق پەن مەيىرىم سالتانات قۇرعان وسىناۋ مەرەكە عاسىردان عاسىرعا جالعاسىپ, قازاق حالقىنىڭ رۋحاني بايلىعىن ەسەلەي ءتۇستى.
