سۋرەت: it-guild.com
قارجى ۆيتسە-ءمينيسترى اسەت تۇرىسوۆتىڭ دەرەگى بويىنشا, قازىرگى ۋاقىتتا فيسكالدىق ورگانداردىڭ اقپاراتتىق جۇيەلەرىنە قاجەتتى دەرەكتەردى بەرۋ ءۇشىن Smart Data Finance, ءسااج جانە Keden سالىقتىق اقپاراتتىق جۇيەلەرىن التى مەملەكەتتىك ورگاننىڭ اقپاراتتىق جۇيەسىمەن ينتەگراتسيالاۋ جالعاسىپ جاتىر. جاڭا سالىق كودەكسىنىڭ قولدانىسقا ەنگىزىلۋىنە دەيىن جاڭا سالىق جۇيەسىن ەنگىزۋ بويىنشا بارلىق تەستىلىك جانە باسقا دا قاجەتتى راسىمدەردى ءبىتىرىپ ۇلگەرۋ ءۇشىن بارلىق ينتەگراتسيالىق جۇمىستى مۇمكىندىگىنشە تەزىرەك تياناقتاۋ قاجەت. كەڭەستە تولىققاندى ينتەگراتسياعا كەدەرگى كەلتىرەتىن بارلىق ماسەلە قارالدى, ونىڭ قورىتىندىسى بويىنشا ۆيتسە-پرەمەر مەملەكەتتىك ورگاندارعا بارلىق راسىمدىك ماسەلەنى ناۋرىز ايىنىڭ سوڭىنا دەيىن اياقتاۋدى تاپسىردى.
Smart Data Finance اج-نى ونەركاسىپتىك پايدالانۋعا بەرۋ «e-Tamga» ققس تولەم جۇيەسىنىڭ جۇمىسىن باستاۋ ءۇشىن نەگىز بولادى. بۇل جۇيە ساتىپ الۋشى مەن جەتكىزۋشى اراسىندا, سونداي-اق بيۋدجەتپەن ءوزارا ەسەپ ايىرىسۋ كەزىندە ققس تولەمىن جۇرگىزۋگە ارنالعان. جۇيەدەگى ققس بويىنشا بارلىق تولەم تەك ەلەكتروندىق شوت-فاكتۋرا نەگىزىندە جۇرگىزىلدى. بۇل ققس تولەۋدەن جالتارۋدى بولدىرمايدى. وسى جۇيەنىڭ ارقاسىندا ققس قايتارۋ قازىرگىدەي 150 كۇن ەمەس, 15 كۇن ىشىندە جۇزەگە اسىرىلادى. سونداي-اق ول ادال بيزنەستى جوسىقسىز تاۋەكەلدى كومپانيالاردان قورعاۋعا مۇمكىندىك بەرەدى.
بۇعان قوسا, سالىقتىق اكىمشىلەندىرۋدىڭ ينتەگراتسيالانعان جۇيەسىنىڭ ء(سااج) اج بازاسىندا قارجى مينيسترلىگى ءتسدياوم-مەن بىرلەسىپ سالىق تولەۋشىلەرگە قىزمەت كورسەتۋدىڭ پرواكتيۆتى سەرۆيستىك مودەلىن قۇرادى. ءسااج-داعى سالىق تولەۋشىنىڭ جەكە كابينەتى سالىق تولەۋشىلەرگە قىزمەتتەردى الۋعا جانە ەسەپتىلىكتى قاشىقتان تاپسىرۋعا, دەكلاراتسيالاردى كەزەڭ-كەزەڭىمەن, انىقتامالارمەن جانە دەرەكتەردى تەكسەرۋمەن تولتىرۋعا مۇمكىندىك بەرەدى. جۇيە ەكىجاقتى بايلانىستى قامتاماسىز ەتەدى: مەملەكەتتىك كىرىس ورگانىنىڭ حابارلاماسىنا جاۋاپ بەرۋگە جانە سالىق ورگانىنا بارماي-اق قۇجاتتاردى جۇكتەۋگە بولادى.
قازىردە توقساندا اياقتالۋى جوسپارلانعان ءسااج مودۋلدەرىن كەزەڭ-كەزەڭىمەن كوبەيتۋ ءجۇرىپ جاتىر. بولاشاقتا قىزمەت كورسەتۋ مودەلى بىرىڭعاي سالىق كومەكشىسىن ازىرلەۋ ءۇشىن جاساندى ينتەللەكت كومەگىمەن جەتىلدىرىلەدى. ۆيرتۋالدى سالىق كومەكشىسى بيزنەستى اشۋدان باستاپ جابۋعا دەيىن سالىقتىق قولداۋدى قامتاماسىز ەتىپ, ءاربىر سالىق تولەۋشىگە دەكلاراتسيانى الدىن الا تولتىرۋعا, قولايلى سالىق رەجىمىن تاڭداۋ بويىنشا ۇسىنىس بەرۋگە, دەكلاراتسيا تاپسىرۋ مەن سالىق تولەۋ مەرزىمى تۋرالى حابارلاۋعا كومەكتەسەدى.
سونىمەن قاتار تۇتىنۋشىنىڭ ءاربىر ساتىپ الۋ ءۇشىن فيسكالدىق چەكتەردى تالاپ ەتۋگە قاتىستى ءوز قۇقىعى تۋرالى حاباردار بولۋىن جاقسارتۋ ءۇشىن وسى كوكتەمدە قارجى مينيسترلىگى Salyq كەشبەك جوباسىن قايتا باستاۋدى جوسپارلاپ وتىر. وتكەن جىلى Salyq كەشبەك قاناتقاقتى تۇرعىدا سەمەي قالاسى مەن اقكول اۋدانىندا سىناقتان وتكىزىلدى. ونىڭ كومەگىمەن ساتىپ الۋشىلار فيسكالدىق چەك بەرۋ كەزىندە ساتىپ الۋ سوماسىنىڭ 2%-ىن الدى. قاناتقاقتى جوبانىڭ 5 ايىندا چەكتەر سانى 22%-عا, ال تاۋارلار مەن قىزمەتتەردىڭ جالپى قۇنى 132%-عا ءوستى. 75 ملن تەڭگە كەشبەك ەسەپتەلدى. اسەت تۇرىسوۆتىڭ حابارلاۋىنشا, 2025 جىلعى 15 ناۋرىزدان باستاپ بۇل جوبانى وسكەمەن (شقو), جەتىقارا (قوستاناي وبلىسى) جانە جاقسى اۋدانىنا (اقمولا وبلىسى) كەڭەيتە وتىرىپ, قايتا باستاۋ جوسپارلانىپ وتىر.
