وتىرىس بارىسىندا سەنات دەپۋتاتتارى «قازاقستان رەسپۋبليكاسىنىڭ ۇكىمەتى مەن وزبەكستان رەسپۋبليكاسىنىڭ ۇكىمەتى اراسىنداعى «ورتالىق ازيا» حالىقارالىق ونەركاسىپتىك كووپەراتسيا ورتالىعىنىڭ قىزمەتىن رەتتەۋ تۋرالى كەلىسىمدى راتيفيكاتسيالاۋ تۋرالى» زاڭدى قاراپ, ماقۇلدادى. ورتالىق شەكارالاس اۋماقتاردا ورنالاسقان جانە ونىڭ ءار بولىگى ءوز مەملەكەتىنىڭ قۇزىرىندا بولادى.
«ماقۇلدانعان زاڭ قازاقستان مەن وزبەكستان اراسىنداعى ونەركاسىپ سالاسىنداعى جاڭا كووپەراتسيا ورتالىعىنىڭ قۇقىقتىق نەگىزىن ايقىندايدى. سونىڭ اياسىندا «ورتالىق ازيا» حالىقارالىق ونەركاسىپتىك كووپەراتسيا ورتالىعىنىڭ مارتەبەسى, ونىڭ قىزمەت تۇرلەرى مەن قۇزىرەتى بەلگىلەندى. الداعى ۋاقىتتا زاڭ باۋىرلاس ەكى ەلدىڭ ىسكەرلىك بايلانىستارىن ارتتىرۋعا, سونداي-اق ساۋدا-ەكونوميكالىق قاتىناستارىن نىعايتۋعا وڭ ىقپال تيگىزەدى دەپ سەنەمىز», دەدى ماۋلەن اشىمباەۆ.
دەپۋتاتتار اتاپ وتكەندەي, ورتالىقتىڭ قىزمەتى تاراپتار مەملەكەتتەرىنىڭ شاعىن جانە ورتا ونەركاسىپتىك كاسىپورىندارىن حالىقارالىق قوسىلعان قۇن تىزبەگىنە ينتەگراتسيالاۋ ءۇشىن قولايلى جاعدايلار جاساۋعا باعىتتالعان. زاڭ نورمالارى شەكارا ماڭىنداعى اۋماقتاردىڭ وندىرىستىك بازاسىن پايدالانۋ تيىمدىلىگىن ارتتىرۋدى, ورتالىق تەرريتورياسىندا قۇرىلاتىن ونەركاسىپتىك كاسىپورىنداردىڭ ءوندىرىس پروتسەستەرىن وڭتايلاندىرۋدى, ولاردىڭ باسەكەگە قابىلەتتىلىگىن جوعارىلاتۋدى, سونداي-اق يننوۆاتسيالىق جانە عىلىمدى قاجەت ەتەتىن وندىرىستەردى دامىتۋدى كوزدەيدى.
