11 جاسار ءامىر بايقاۋدىڭ ءبىرىنشى كەزەڭىندە حالىق ءانى «اقەركە» مەن قىزىل تۇردالى ۇلىنىڭ «وي كوك» شىعارماسىن ورىنداپ, تىڭدارمان ريزاشىلىعىنا بولەندى. وسىلايشا, ول قازىلار القاسىنىڭ شەشىمىمەن سايىستىڭ ەكىنشى كەزەڭىنە جولداما الدى. فينالدا دا توسىلعان جوق. ءامىر ساحنادا حالىق ءانى «ون التى قىز» بەن عاريفوللا قۇرمانعاليەۆتىڭ ء«انشى داۋىسىن» اۋەلەتتى. ونىڭ سۇلۋ داۋسى, دومبىرا شەرتىسى تىڭدارماندى تارتىپ اكەتتى.
«بۇل بايقاۋ – ونەرلى ورەندەردىڭ ناعىز سىنالاتىن كەزى. بيىل العاش رەت ۇيىمداستىرىلعان سايىسقا رەسەي, تۇرىكمەنستان, ازەربايجان, بەلورۋسسيا, قىرعىزستان, وزبەكستان, ارمەنيادان ىرىكتەلگەن ۇمىتكەرلەر كەلدى. ارقايسىسى جەڭىستەن دامەلى. ءبىز ءداستۇرلى ءان اتالىمىندا باق سىناپ, 25 سايىسكەردىڭ ىشىنەن ۇزدىك ۇشتىككە ەندىك. ارينە, قۋانىشىمىزدا شەك جوق. ويتكەنى ءتول ونەرىمىزدى, دومبىرامىزدى وزگە جۇرتتار الدىندا ابىرويلى پاش ەتتىك. قازىر ەسترادالىق باعىتتاعى اقىلى فەستيۆالدار وتە كوپ. بىراق وسىنداي ناعىز كاسىبي جارىستار از. سونىڭ ىشىندە ءداستۇرلى اندەرگە باسىمدىق بەرەتىن حالىقارالىق بايقاۋلار جوقتىڭ قاسى. وسى سايىستا ءبىز دە وزگە جۇرتتىڭ ونەرىن كورىپ, ولارمەن پىكىر الماسىپ ءبىراز تاجىريبە جينادىق. الداعى ۋاقىتتا بۇدان بيىك بەلەستى باعىندىرامىز. ويتكەنى 6 جاسىنان قولىنا دومبىرا ۇستاپ, ءان سالعان ءامىردىڭ بولاشاعىنان ۇلكەن ءۇمىت كۇتەمىز», دەيدى جەڭىمپاز جەتەكشىسى, استانا قالاسى اكىمدىگىنىڭ «№1 بالالار مۋزىكا مەكتەبى» ءداستۇرلى ءان ماماندىعىنىڭ پەداگوگى احمەديار نۇرداۋلەت.
