ساۋلە مۇساەۆا الماتى تەحنولوگيالىق ينستيتۋتىن ءبىتىرىپ, ينجەنەر-تەحنولوگ ماماندىعىن العان. ەڭبەك جولىن ينجەنەر بولىپ باستاعان. كەيىن ەكونوميست, فابريكا ديرەكتورى قىزمەتىن اتقارىپ, زەينەتكەرلىككە شىققان. الايدا ۇيدە وتىرعاندى ءجون كورمەيدى.
«بالا كەزىمدە كولىك جۇرگىزۋگە قىزىعۋشىلىعىم ويانعان ەدى. العاشقى كولىگىمدى 1998 جىلى ساتىپ الدىم. سودان بەرى بىرنەشەۋىن اۋىستىردىم. زەينەتكە شىققاننان كەيىن ماقات اۋدانىنداعى كولىك جۇرگىزۋ مەكتەبىندە ساباق بەردىم», دەيدى س.مۇساەۆا.
تاجىريبەسى مول جۇرگىزۋشى كولىكتى وتە ساق جۇرگىزەدى. جول ۇستىندە جىلدامدىقتى اسىرمايدى. جاياۋ جۇرگىنشىلەرگە جول بەرەدى. رۋلدە وتىرعاندا تەلەفوندى قولىنا ۇستامايدى. ءتىپتى تەلەفونىنا قوڭىراۋ كەلىپ تۇرسا دا الاڭدامايدى.
«كولىك جۇرگىزۋ – تەك ءرۋلدى ۇستاپ, گاز باسۋ ەمەس. بۇل – ۇلكەن جاۋاپكەرشىلىك. كەيبىر جۇرگىزۋشىلەر اسىعىپ, جول ەرەجەسىن ەلەمەيدى. جولدا ءار سەكۋندتىڭ ماڭىزدى ەكەنىن ەسكەرۋ قاجەت. بولماشى قاتەلىكتىڭ سوڭى ورنى تولماس وكىنىشكە, ءتىپتى قايعىلى جاعدايعا سوقتىرۋى مۇمكىن. سوندىقتان ءاردايىم ەرەجە ساقتايمىن. وزگەلەرگە دە وسىنى كەڭەس رەتىندە ايتىپ جۇرەمىن», دەيدى ول.
زەينەتكەر جۇرگىزۋشىنىڭ پىكىرىنشە, ءار جۇرگىزۋشى جولداعى قاۋىپسىزدىكتى ساقتاۋعا مىندەتتى ەكەنىن ۇمىتپاعانى ءجون. جول ەرەجەسىن ساقتاۋ ارقىلى ءوزىنىڭ دە, وزگەلەردىڭ دە ءومىرىن ساقتايدى.
ماقات اۋداندىق پوليتسيا ءبولىمىنىڭ ۋچاسكەلىك ينسپەكتور, پوليتسيا مايورى سايفوللا قاپانوۆتىڭ ايتۋىنشا, ساۋلە مۇساەۆا – اۋدانداعى ەڭ ۇلگىلى جۇرگىزۋشىلەردىڭ ءبىرى. ونى جەرگىلىكتى تۇرعىندار جاقسى تانيدى.
«اۋدان تۇرعىندارى ساۋلە اپايدىڭ ۇقىپتىلىعى مەن سابىرلى مىنەزىن جوعارى باعالايدى. ويتكەنى بىردە-ءبىر رەت جول ەرەجەسىن بۇزعان ەمەس. مۇنداي تاجىريبەلى جۇرگىزۋشىلەر جاس بۋىنعا ۇلگى بولۋعا ءتيىس. كوكتەم مەرەكەسى قارساڭىندا اپامىزدى ارنايى قۇتتىقتاپ, العىسىمىزدى بىلدىردىك», دەدى س.قاپانوۆ.
اتىراۋ وبلىسى
