فوتو: اشىق دەرەككوز
ۆەدومستۆونىڭ مالىمەتىنشە, اباي وبلىسىندا بار بولعانى 10 گەكتار ەگىستىك القابى بار شارۋا قوجالىعى جالعان شوت-فاكتۋرالاردى پايدالانا وتىرىپ, 2 مىڭ توننا كۇنباعىس تۇقىمىن ساتقان. بۇل رەتتە ءبىر گەكتاردىڭ ناقتى ونىمدىلىگى 1,3 توننا تۇقىمدى قۇراعان. وسىلايشا فەرمەر ساتىلىمدى 153 ەسە اسىرعان. كەيىنىرەك سالىق تولەۋشى ءونىمنىڭ ساتىلماعانىن جانە شوت-فاكتۋرالار الىنىپ تاستالعانىن مويىنداعان.
«تاۋارلار مەن قىزمەتتەرگە جازىلعان شوت-فاكتۋرالاردى تەكسەرۋ ناتيجەسىندە سالىق تولەۋشىلەر جۇمىسشىلارسىز, قاجەتتى ماتەريالدىق بازاسىز جانە ءۇشىنشى تۇلعالاردىڭ قىزمەتتەرىن تارتپاي قۇرىلىس قىزمەتتەرىن كورسەتەتىن جاعدايلار انىقتالدى. تاعى ءبىر مىسال – ءبىر ايدان از ۋاقىت بۇرىن قۇرىلعان كومپانيا اعىلشىن ءتىلى كۋرستارىنا 3,5 ملرد تەڭگە سوماسىندا شوت-فاكتۋرالار جازدى, ونى ول نەبارى 24 كۇندە وتكىزدى. كەيىننەن وسى كومپانيانى تىركەۋ جارامسىز دەپ تانىلدى», دەلىنگەن حابارلامادا.
ايتا كەتەيىك, ادال بيزنەستى قورعاۋ ءۇشىن مكك ەلەكتروندىق شوت-فاكتۋرالاردى (ەشف) جازىپ بەرۋ كەزىندە بيومەتريالىق سايكەستەندىرۋدى پايدالانۋ جونىندەگى پيلوتتىق جوبانى قوسا العاندا, تسيفرلىق شەشىمدەرگە باسا نازار اۋدارا وتىرىپ, الدىن الۋ شارالارىن ەنگىزەدى. قازىرگى ۋاقىتتا سايكەستەندىرۋدەن وتپەگەن 2 مىڭ ادامنىڭ ەشف جازىپ بەرۋ ارەكەتتەرىن بولدىرماۋعا مۇمكىندىك تۋدى.
بۇدان باسقا, جاڭا سالىق كودەكسىنىڭ جوباسىندا ققس اكىمشىلەندىرۋدى جاقسارتۋ ءۇشىن ەشف اۆتوماتتاندىرىلعان باقىلاۋىن ەنگىزۋ جوسپارلانعان.
«جۇيە ناقتى ۋاقىت رەجيمىندە دەرەكتەردى تالدايدى جانە سالىق تولەۋشىنىڭ ققس بالانسىن ەسەپتەيدى. ەگەر ەشف جازىپ بەرۋ زاڭدى شىعىندارمەن راستالماسا, قۇجاتتى سالىق تولەنگەننەن كەيىن عانا راسىمدەۋگە بولادى. بۇل ءتاسىل جالعان مامىلەلەردىڭ الدىن الادى, ال باقىلاۋ مەحانيزمى ادال قاتىسۋشىلاردى شەكتەمەي, تاۋەكەل توبىنداعى سالىق تولەۋشىلەرگە قولدانىلادى», دەپ حابارلادى مەملەكەتتىك كىرىستەر كوميتەتىنىڭ ءباسپاسوز قىزمەتى.
