فوتو: ءماجىلىستىڭ ءباسپاسوز قىزمەتى
بۇگىندە جاسوسپىرىمدەردىڭ 74 پايىزى - TikTok-تى, 59 پايىزى – YouTube-تى, 57 پايىزى – Instagram-نىڭ تۇراقتى قولدانۋشىسى. ال ءاربىر بەسىنشى اتا-انا بالاسىنىڭ الەۋمەتتىك جەلىدە قانداي حابار جاريالايتىنىنان بەيحابار. اتا-انالاردىڭ 62%-ى بالالارىنىڭ ەكران الدىنداعى ۋاقىتىن باقىلاۋ ءۇشىن ەشقانداي ارنايى باعدارلاما مەن شەكتەۋ قولدانبايتىنىن العا تارتقان ءماجىلىس دەپۋتاتى جەلى جاستار اراسىنداعى دەپرەسسيانى كۇشەيتىنىن ايتىپ, ساۋال جولدادى.
«جەلىگە جەلىككەندەر پسيحولوگيالىق, فيزيكالىق, الەۋمەتتىك قيىندىققا تاپ كەلۋدە. مىسالى, گونكونگ قىتاي ۋنيۆەرسيتەتىنىڭ زەرتتەۋلەرى بويىنشا, ينتەرنەتكە تاۋەلدى جاسوسپىرىمدەر اراسىندا پسيحولوگيالىق اۋىتقۋلارعا تاپ بولۋ كورسەتكىشى 2,5 ەسە جوعارى. دەپرەسسياعا شالدىعۋ ىقتيمالدىعى 3 ەسە كوپ بولادى ەكەن. بۇگىندە الەۋمەتتىك جەلىنى شەكتەپ جاتقان ەلدەر از ەمەس. ولاردىڭ قاتارىنا قىتاي, وڭتۇستىك كورەيا, فرانتسيا, اقش, اۆستراليا جانە تاعى باسقا دامىعان ەلدەردى جاتقىزۋعا بولادى», دەپ مىسال كەلتىرگەن جارقىنبەك امانتاي ۇلى ماسەلەنى زاڭنامالىق نەگىزدە شەشۋدى ۇسىندى.
ء«بىرىنشى, ەلىمىزدىڭ وقۋ-اعارتۋ, مادەنيەت جانە اقپارات جانە تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىكتەرى ۆەدومستۆاارالىق توپ قۇرىپ, الەۋمەتتىك جەلىلەردىڭ وسكەلەڭ ۇرپاققا تيگىزەتىن زيانىن جان-جاقتى ساراپتاپ, سارالاپ, ارنايى زاڭ جوباسىن ازىرلەۋى قاجەت. ەكىنشى, الەۋمەتتىك جەلىلەر مەن ونلاين ويىنداردى پايدالانۋ بويىنشا جاس شەكتەۋلەرىن ەنگىزۋ, سونداي-اق, كامەلەتكە تولماعاندارعا گادجەتتەردى پايدالانۋ ۋاقىتىن بەلگىلەۋ بويىنشا ءتيىستى ۇسىنىس ازىرلەنۋى كەرەك. ءۇشىنشى, اتا-انالار ءۇشىن بالالارىنىڭ ينتەرنەت الەمىندەگى ءىس-ارەكەتتەرىن, وتكىزگەن ۋاقىتىن قاداعالاۋعا مۇمكىندىك بەرەتىن بىرىڭعاي مەملەكەتتىك باقىلاۋ جۇيەسىن قۇرۋدى ۇسىنامىن», دەدى دەپۋتات.
ماجىلىسمەن مۇنداي تاجىريبەنى قىتاي جانە فرانتسيا ۇكىمەتى قولدانىسقا ەنگىزگەنىن اتاپ ءوتتى. ال وڭتۇستىك كورەيا مەن كانادا ونداعان ساۋىقتىرۋ ورتالىعىن اشىپ, زاماناۋي گادجەتتەرگە تاۋەلدىلەردى ساۋىقتىرۋدى قولعا العانىن تىلگە تيەك ەتىپ, مۇنىڭ الدىن الۋعا شاقىردى.
