سۋرەت: intlaffairs.hku.hk
شىنىندا دا, بۇگىنگى ءبىلىم سالاسىنىڭ كوشباسشىسىنا قانداي قۇزىرەت قاجەت, سونداي-اق وزىق تەحنولوگيانى, جاساندى ينتەللەكتىنى جانە ستراتەگيالىق وزگەرىستەردى باسقارۋدى ءبىلىم جۇيەسىنە قالاي ەنگىزۋگە بولادى؟ وسى سۇراقتارعا ء«بىلىم بەرۋدەگى وڭىرلىك كوشباسشىلىق: يننوۆاتسيالار جانە جاساندى ينتەللەكت ءىس-ارەكەتتە» اتتى كاسىبي دامۋ باعدارلاماسىنىڭ ساراپشىلارى جاۋاپ بەرەدى.
وقىتۋ كۋرسى قورقىت اتا اتىنداعى قىزىلوردا ۋنيۆەرسيتەتى مەن ءا.مارعۇلان اتىنداعى پاۆلودار پەداگوگيكالىق ۋنيۆەرسيتەتىمەن بىرلەسىپ وتكىزىلەدى. نەگىزگى سەسسيالاردى سەۋل ۇلتتىق ۋنيۆەرسيتەتىنىڭ ساراپشىلارى جۇرگىزەدى. جاڭا باعدارلاما وڭىرلىك ءبىلىم ءبولىمى جەتەكشىلەرىنىڭ باسقارۋ جانە كوشباسشىلىق داعدىلارىن دامىتۋعا باعىتتالعان. وعان 90-عا جۋىق وبلىستىق, قالالىق جانە اۋداندىق ءبىلىم بولىمدەرىنىڭ باسشىلارى, مەكتەپ جانە كوللەدج ديرەكتورلارى قاتىسادى.
NU ۆيتسە پروۆوستى, جوعارى ءبىلىم مەكتەبىنىڭ دەكانى ايدا ساعىنتاەۆانىڭ ايتۋىنشا, بۇگىندە ءبىلىم سالاسى دەربەستەندىرىلىپ, تسيفرلىق جانە ىقپالداستىق ارتا تۇسكەن.
«ەگەر بۇرىن وقۋ ۇدەرىسى بارلىعىنا بىردەي بولسا, قازىر ول وقۋشىنىڭ جەكە قاجەتتىلىگىنە بەيىمدەلگەن. ءبىر جاعىنان, تسيفرلاندىرۋ كلاسسيكالىق مەكتەپتىڭ اۋماعىن كەڭەيتتى. قازىر تەحنولوگيا, جي, ونلاين پلاتفورمالار وقىتۋدى ينتەراكتيۆتى جانە قولجەتىمدى ەتىپ وتىر. سونداي-اق مەنەدجەرلەرگە جاساندى ينتەللەكتىنى پايدالانۋ ترەند ەمەس. بۇل – جاڭا شىندىق», دەگەن ول جاساندى زەردە ارقىلى الىنعان اقپاراتتى مۇقيات تەكسەرىپ, تالداۋ قاجەتتىگىن ەسكە سالدى.
وقىتۋ كۋرسىنا ارنالعان باعدارلاما 10 مودۋلدەن تۇرادى. وندا ءبىلىم مەن تەحنولوگيا جانە مەنەدجمەنت سالاسىنداعى جەتەكشى ساراپشىلاردى بىرىكتىرىپ, قاتىسۋشىلارعا كوشباسشىلىق داعدىلاردى جەتىلدىرۋ, باسقارۋدىڭ يننوۆاتسيالىق قۇرالدارىن مەڭگەرۋ سەكىلدى ەرەكشە مۇمكىندىكتەر قاراستىرىلعان.
جوعارى ءبىلىم مەكتەبىنىڭ قاۋىمداستىرىلعان پروفەسسورى مير افزالدىڭ سوزىنە زەر سالساق, قاتىسۋشىلار كۋرس بارىسىندا كوشباسشىلىقتىڭ جاڭا تۇجىرىمداماسىمەن تانىسادى.
«بۇل الەمگە كۇرت وزگەرىس اكەلگەن جاساندى ينتەللەكت داۋىرىندە وتە قاجەت. جاساندى ينتەللەكتى وقۋ باعدارلاماسىنا, وقىتۋعا جانە مەكتەپتى باسقارۋعا كىرىكتىرىلمەي ەشقانداي ءبىلىم سالاسى دامىمايدى. سوندىقتان ءبىز ۇستاناتىن نەگىزگى تۇجىرىمداما: كوشباسشىلىق قىزمەت ەمەس, ول – تاجىريبە», دەدى پروفەسسور.
ايتا كەتەيىك, بۇل باعدارلاما «Academic Leadership Institute: Executive Academic Leadership Programme» جانە «Deans’ School» سياقتى تابىستى باستامالاردىڭ جالعاسى. بۇعان دەيىن وسى باعدارلاما شەڭبەرىندە وتاندىق جوعارى وقۋ ورىندارىنىڭ 80 رەكتورى مەن دەكانى بىلىكتىلىگىن جەتىلدىرگەن. جالپى العاندا, NU جوعارى ءبىلىم مەكتەبى قۇرىلعاننان بەرى 27 مىڭنان استام ءبىلىم سالاسىنىڭ قىزمەتكەرى كاسىبي دايارلىقتان وتكەن.
