اقتوبە قالاسىندا ەلەك جانە قارعالى وزەندەرى جاعاسىندا ورنالاسقان 60 باۋ-باقشا ۇجىمىنىڭ تۇرعىن ۇيلەرىن سۋ باسۋ قاۋپى بار. ەگەر بىلتىرعىداي قار تەز ەرىپ, سۋ وزەن ارنالارىنان اسىپ, تۇرعىندارعا قاۋىپ توندىرەر بولسا, ادامداردى ۋاقىتشا ورنالاستىرۋعا 6 ەۆاكۋاتسيالىق ورتالىق دايىندالدى. بۇل كۇندەرى پەسچانكا وزەنىنىڭ جاعالاۋىن بەكىتۋ جۇمىستارى ءجۇرىپ جاتىر.
بىلتىرعى جاعداي بيىل قايتالانباۋى ءۇشىن وزەن سەڭدەرىن بۇزۋ جۇمىستارى ناۋرىزدىڭ العاشقى كۇندەرى باستالادى. تجد قىزمەتكەرلەرى اقتوبە قالاسى, ايتەكە بي, بايعانين, ىرعىز, مۇعالجار, ويىل, حرومتاۋ اۋداندارىندا دالالىق وزەندەرگە جارىلىس جۇمىستارىن جۇرگىزەدى. بۇل ەرىگەن قار سۋىمەن قوسىلعان وزەن مۇزدارىنىڭ كەدەرگىسىز ءوتىپ كەتۋىنە ىقپال ەتەدى. سونداي-اق الداعى اپتادا ارىقتار مەن كانالدار, بوگەتتەر, تاسجولدارداعى سۋ وتكەلدەرىن قار مەن مۇزدان, قوقىستان تازارتۋ جۇمىستارى باستالادى.
