بيزنەس تاۋەكەلگە تولى. ءتىپتى دايىن مودەل ۇسىناتىن فرانشيزانىڭ ءوزى تابىسقا كەپىلدىك بەرە المايدى. كاسىپتى ىلگەرىلەتۋ, دامىتۋ, ۇستاپ تۇرۋ – ءسىزدىڭ جاۋاپكەرشىلىگىڭىز. تابىستى بيزنەس دەگەنىمىز – ۇدايى وقۋ, وزگەرىستەرگە تەز بەيىمدەلۋ, جاڭا مۇمكىندىكتەر ىزدەۋ جانە ۇدەرىستەردى جاقسارتۋ. بيزنەس ۋاقىتتى عانا ەمەس, بار كۇش-جىگەرىڭدى جۇمساۋدى تالاپ ەتەدى. ول جەردە ءسىز 9-دان 6-عا دەيىن جۇمىس ىستەمەيسىز. تاۋلىك بويى تىنىم تاپپاي جۇرەسىز. بەلگىسىزدىكتەر مەن سترەسكە دايىنسىز با؟ ءوز بەتىڭىزشە شەشىم قابىلداي الاسىز با؟ ادەپكى قيىندىقتاردى جەڭە الاتىن رەسۋرس جەتكىلىكتى مە؟ مىنە, وسى سۇراقتارعا جاۋابىڭىز بولۋى وتە ماڭىزدى.
بيزنەستى جاڭا باستاعان كاسىپكەرلەر كوپ جاعدايدا مىناداي قاتەلىكتەرگە ۇرىنادى.
ماركەتينگتەن ۇنەمدەۋ. كوبى مۇنى اسا ماڭىزدى دەپ سانامايدى. سالدارىنان كليەنت ءسىزدىڭ بيزنەسىڭىز تۋرالى جەتكىلىكتى دەڭگەيدە حاباردار بولمايدى. ال كاسىپتى جارنامالاۋسىز, العا جىلجىتۋسىز ءوسۋ مۇمكىن ەمەس.
قارجى ەسەبىنىڭ بولماۋى. اقشا قالاي بولسا سولاي جۇمسالادى, ەشكىم كىرىس پەن شىعىس ەسەبىن جۇرگىزبەيدى. ەگەر ءار تيىننىڭ ەسەبىن بىلمەسەڭىز, وندا مينۋسقا كىردىم دەي بەرىڭىز.
كليەنتتى تۇسىنبەۋ. كوبى ءوزىنىڭ ماقساتتى اۋديتورياسىن زەرتتەمەي, بىلمەي جاتىپ بيزنەس اشا سالادى. اقىرىندا ساتىلىم دەڭگەيى وتە تومەن بولادى, كەيدە ءتىپتى تاۋارلار (قىزمەتتەر) مۇلدە وتپەي قالادى.
ءبىلىم الۋدى ەسكەرمەۋ. كەيبىر ادامدار ءبارىن بىلەمىن دەپ ويلايدى. الايدا جاڭا ءبىلىم مەن داعدىلاردى يگەرمەي, باسەكەگە قابىلەتتى بولۋ وتە قيىن.
شىعىنداردى جەتە باعالاماۋ. شىعىندار كوبىنەسە ءۇستىرت ەسەپتەلەدى, اسىرەسە ىسكە قوسقان كەزدە جانە العاشقى ايلاردا. سوندىقتان قاراجات جەتكىلىكسىز بولۋى مۇمكىن.
پەرفەكتسيونيزمگە ۇمتىلۋ. ۇنەمى جەتىلدىرىپ وتىرۋ جانە ءاردايىم ءبارىن كەرەمەت ىستەۋگە دەگەن ىنتا ادامدى تىعىرىققا تىرەيدى. ودان دا ءىستى تاۋەكەل ەتىپ باستاپ كەتىپ, ۇدەرىس بارىسىندا جەتىلگەن دۇرىس. قاتەلىكتەن ەشكىم دە قاشىپ قۇتىلا المايدى, بىراق شارۋاعا مەيلىنشە جاۋاپتى ءھام ساۋاتتى كەلەر بولسا, قاتەلىكتەردى ازايتۋعا بولادى.
شاعىن بيزنەستەگى كىشكەنتاي قاتەلىكتىڭ قۇنى وتە قىمبات. قازاقستان سياقتى شاعىن نارىقتا باسەكە قاتاڭ, ال كليەنت از, مۇندايدا ءاربىر قاتەلىك ابىرويعا, تابىس پەن بولاشاققا تىكەلەي اسەر ەتەدى. بيزنەس قۇلاسا, وندا ونى قايتا كوتەرۋ قيىنعا سوعادى. نارىق مۇندايدى كەشىرمەيدى, كليەنتتەر بولسا لەزدە بالاما نۇسقا تابا قويادى. شاعىن بيزنەستەگى قاتەلىك – ساباق قانا ەمەس, ءبارىن جوعالتىپ الۋ تاۋەكەلى. سوندىقتان جاۋاپكەرشىلىكتى سەزىنۋ, وزگەنىڭ تاجىريبەسىنەن ساباق الۋ, جەتى رەت ولشەپ, ءبىر رەت كەسۋ اسا ماڭىزدى.
ءبىر جاعىنان, ءبىزدىڭ ەلدەگى شاعىن بيزنەستى «تىرشىلىك ءۇشىن كۇرەس» دەپ سيپاتتاسا دا بولعانداي. ۇنەمى بولاتىن داعدارىس, وزگەرىس پەن قيىندىق قالىپتى نارسەگە اينالىپ كەتتى. دەۆالۆاتسيا مەن ينفلياتسيا بۇل كۇندە بيزنەستىڭ «اينىماس سەرىگىنە» اينالدى. شيكىزاتتىڭ دا, ارەندانىڭ دا باعاسى ءوسىپ جاتىر, ال تولەم قابىلەتى تومەندەۋدە. سەن بيۋدجەتكە ارقا سۇيەيسىڭ, الايدا بىرەر جىلدان سوڭ ول وزەكتىلىگىن جوعالتادى. ءوسىمنىڭ ورنىنا جاي عانا اقشاڭدى جەتكىزە العانىڭا ريزا بولاسىڭ. سالىقتىڭ وزگەرۋى, ۆاليۋتانىڭ قۇبىلۋى, نارىق بەلگىسىزدىگى سترەسس تۋعىزادى جانە ستراتەگيالىق ويلانۋدى شەكتەيدى. اقشا جەتىسپەۋشىلىگى دە – ۇلكەن ماسەلە. بانكتەردىڭ نەسيەسى قىمبات.
قازىر ساپالى ءونىم جاساۋ جەتكىلىكسىز. تۇتىنۋشىلار ەموتسيانى, اتموسفەرانى, ەرەكشە ءبىر سەزىمدەردى تالاپ ەتەدى. «ارزان ءارى ءدامدى» قاعيداسى قازىر جۇمىس ىستەمەيدى. سونىمەن قاتار ەڭ ۇلكەن پروبلەما – ادامدار. كادر تاپشىلىعى قاتتى سەزىلەدى. وقۋدى قاجەت ەتەتىندەرى دە كوپ. سوندىقتان ءبىز اۆتوماتتى تۇردە جۇمىس بەرۋشى عانا ەمەس, ۇستازعا دا اينالدىق.
مۇنىڭ ءبارى كاسىپكەرلەردىڭ كەلەشەككە كۇمانمەن قاراۋىنا الىپ كەلەدى. ءبىز العا جىلجىمايمىز, جاي عانا كەرى كەتپەۋگە تىرىسامىز. جاڭا جوبالار مەن جوسپارلار كەيىنگە ىسىرىلا بەرەدى. كاسىپكەر دامۋى ءۇشىن تۇراقتىلىق, بولجامدىلىق جانە بارەرلەردىڭ ازايۋى ماڭىزدى. سول كەزدە عانا بيزنەس ەكونوميكانىڭ قوزعاۋشى كۇشىنە اينالادى.
