شاھاردا بىرىنەن سوڭ ءبىرى بوي كوتەرىپ جاتقان, وزگەشەلىگىمەن كوز تارتاتىن جاڭا ۇيلەرگە قونىستانۋ – اركىمنىڭ ارمانى. سول ارمانعا قالا حالقى بىرتىندەپ قول جەتكىزىپ جاتىر.
قالانىڭ «جاستار-3» شاعىن اۋدانىندا تۇرعىن ۇيلەر قۇرىلىسى وتكەن جىلدىڭ شىلدە ايىنان باستاپ جۇرگىزىلدى. كەزەكتە تۇرعاندارعا جالعا بەرىلەتىن 56 جاڭا ءۇي سالىنىپ, ساتىپ الىندى. بۇگىن كىلتتەرى تابىستالعان 23 ۇيدەن بولەك, 33 ءۇي اقپان ايىنىڭ سوڭىنا دەيىن قولدانىسقا بەرىلەدى. ءار ءۇيدىڭ جالپى اۋدانى 76 شارشى مەتر. جىل سوڭىنا دەيىن وسى تۇرعىن اۋداندا جەكە قۇرىلىس سالۋشىلار ەسەبىنەن تاعى 150-گە جۋىق ءۇي پايدالانۋعا بەرىلەدى دەگەن جوسپار بار.
«تۇرعىن ءۇي كەزەگىندە 10 جىلدان استام ۋاقىت تۇردىق. باسپانا جالداۋدىڭ قۇنى بىزدەي جاندارعا ارزانعا تۇسپەيدى, وعان قوسا ءجيى كوشۋدىڭ ءوز ماشاقاتى بار. اسىرەسە بالالارىم قينالىپ كەتەتىن. ەندى, مىنە, ءوز باسپانامىزعا قول جەتكىزدىك, قۋانىشىمىزدا شەك جوق», دەيدى التى بالانىڭ اناسى ينديرا يمانبولوۆا.
جۇرتتىڭ كوزقۋانىشىنا اينالعان تاڭعاجايىپ كەشەندەر مەن كوكپەن تالاسقان كورىكتى ۇيلەردىڭ كوپتەپ سالىنۋىنا قىستىڭ سۋىعى, جازدىڭ اپتاپ ىستىعىنا قاراماستان تەر توگىپ جۇرگەن قۇرىش قولدى قۇرىلىسشىلاردىڭ ءسىڭىرىپ جاتقان ەڭبەگى ەرەسەن. ولار ىسكەر دە قابىلەتتى مامان رەتىندە ەلدىڭ الەۋمەتتىك-ەكونوميكالىق دامۋىنا بارىنشا ۇلەس قوسىپ كەلەدى.
بۇعان دەيىن 49 كوپبالالى وتباسىنا «بەرەكە» كوتتەدج قالاشىعىنداعى تۇرعىن ۇيلەردىڭ كىلتى تابىستالعان ەدى. بۇل ءۇردىس وبلىستا الداعى ۋاقىتتا دا جالعاسادى. وبلىستىق قۇرىلىس باسقارماسى بەرگەن مالىمەتكە جۇگىنسەك, بيىل 298 نىساننىڭ قۇرىلىسى ءجۇرىپ, جىل سوڭىنا دەيىن ونىڭ 266-سى اياقتالىپ, پايدالانۋعا بەرىلمەك. اتاپ ايتقاندا, بارلىعى 375,0 مىڭ شارشى مەتر تۇرعىن ءۇي سالۋ كوزدەلگەن, ونىڭ 92,2 مىڭ شارشى مەترى بيۋدجەت قاراجاتى ەسەبىنەن بوي كوتەرىپ, سونىڭ ىشىندە 36,7 مىڭ شارشى مەترى جالعا بەرىلەتىن, 55,5 مىڭ شارشى مەترى نەسيەلىك باسپانا بولماق. «سامۇرىق-قازىنا» اق ەسەبىنەن 22,7 مىڭ شارشى مەتر, جەكە قۇرىلىس سالۋشىلار ەسەبىنەن 54,3 مىڭ شارشى مەتر, جەكە تۇرعىن ءۇي قۇرىلىسى ەسەبىنەن 205,8 مىڭ شارشى مەتر ءۇي تۇرعىزىلماق.
قازىردە بيۋدجەت قاراجاتى ەسەبىنەن 115,3 مىڭ شارشى مەتر نەمەسە 1 472 پاتەرلى تۇرعىن ءۇيدىڭ قۇرىلىسى جۇرگىزىلىپ جاتىر. 140 ءۇيدىڭ 107-ءسى جەكە, قالعانى كوپقاباتتى باسپانا بولادى. اۋدانى 92,2 مىڭ شارشى مەتردى قۇرايتىن 1 204 پاتەرلى 133 تۇرعىن ءۇي ەل يگىلىگىنە بەرىلەدى دەپ كۇتىلىپ وتىر. ونىڭ ىشىندە اۋدانى 55,5 مىڭ شارشى مەتر نەمەسە 727 پاتەرگە ارنالعان 17 ءۇي نەسيەلىك باسپانا. قاراتال اۋدانى, ۇشتوبە قالاسىندا 60 پاتەرلى 1 ءۇي, كوكسۋ اۋدانى بالپىق بي اۋلىندا 60 پاتەرلى 2 ءۇي, جاركەنت قالاسىندا 120 پاتەرلى 2 ءۇي, تەكەلى قالاسىنداعى س.سەيفۋللين كوشەسى بويىندا 60 پاتەرلى 1 ءۇي سالىنىپ جاتىر. تالدىقورعان قالاسىندا 128 پاتەرلى 5 ءۇي, 110 پاتەرلى 3 ءۇي, 129 پاتەرلى 3 ءۇي تۇرعىزىلادى.
جالعا بەرىلەتىن باسپانالار دا رەتىمەن بوي كوتەرىپ كەلەدى. اۋدانى 36,7 مىڭ شارشى مەتردى قۇرايتىن 477 پاتەرلى 116 تۇرعىن ءۇيدىڭ قۇرىلىسى جۇرگىزىلىپ جاتىر. اتاپ ايتقاندا, وبلىس ورتالىعىندا 98 پاتەرلى 3 ءۇي, 72 پاتەرلى 2 ءۇي, 107 كوتتەدج سالىنادى. اقسۋ اۋدانىنداعى جانسۇگىر اۋىلىندا 60 پاتەرلى 1 ءۇي, سارقان قالاسىندا 120 پاتەرلى 2 ءۇي, سونداي-اق كوكسۋ اۋدانى بالپىق بي اۋىلىندا تاعى 20 پاتەرلى 1 ءۇي سالىنىپ, ەل يگىلىگىنە بەرىلەدى. «سامۇرىق-قازىنا» ۇاق» اق ەسەبىنەن اۋدانى 22,7 مىڭ شارشى مەترلىك 300 پاتەرگە ارنالعان 5 ءۇي تۇرعىزىلادى. ونىڭ ىشىندە كەربۇلاق اۋدانى سارىوزەك اۋىلىندا 60 پاتەرلى 1 ءۇي, تالدىقورعان قالاسىندا 240 پاتەرلى 4 ءۇي بوي كوتەرەدى.
ينجەنەرلىك-كوممۋنيكاتسيالىق جەلىلەردى دامىتۋ, جايلاستىرۋ جۇمىستارى دا رەتىمەن جۇزەگە اسىرىلادى. ينجەنەرلىك-كوممۋنيكاتسيالىق ينفراقۇرىلىمنىڭ 30 نىسانىن سالۋعا 7,3 ميلليارد تەڭگە قاراجات بولىنگەن. وسىلايشا, جىل سوڭىندا دەيىن 20 نىساننىڭ قۇرىلىسى اياقتالىپ, پايدالانۋعا بەرىلەدى.
وبلىس اكىمى ءباسپاسوز قىزمەتىنىڭ مالىمەتىنشە, بىلتىر تالدىقورعاندا 1 283 وتباسى تۇرعىن ۇيمەن قامتىلىپ, كەزەك 8,3%-عا تومەندەسە, وسى جىلى تاعى 1 483 وتباسى تۇرعىن ۇيگە قول جەتكىزەدى. 1041 پاتەرلىك 28 ءۇيدىڭ, 107 كوتتەدجدىڭ قۇرىلىسى اياقتالادى, حالىقتىڭ الەۋمەتتىك وسال توپتارىنا 300 پاتەر ساتىپ الىنادى. ءسويتىپ, 2023–2025 جىلدارى وبلىس ورتالىعىندا 5 مىڭعا جۋىق كەزەكتە تۇرعاندار تۇرعىن ۇيمەن قامتاماسىز ەتىلەدى.
جەتىسۋ وبلىسى
