ءىس-شارانى اشا وتىرىپ, باس پروكۋرور بەرىك اسىلوۆ سوتتالعانداردىڭ قۇقىقتارىن, بوستاندىقتارىن جانە زاڭدى مۇددەلەرىن قۇرمەتتەۋ مەن قورعاۋ – بۇل زاڭنىڭ تىكەلەي تالابى ەكەنىن جانە ولاردىڭ وڭالۋى مەن قوعامدا قۇقىقتىق ءتارتىپتى ساقتاۋدىڭ ماڭىزدى اسپەكتىسى ەكەنىن اتاپ ءوتتى.
وتىرىسقا پارلامەنت دەپۋتاتتارى, وبلىس اكىمدەرى, ورتالىق مەملەكەتتىك ورگانداردىڭ, قىلمىستىق-اتقارۋ جۇيەسى كوميتەتىنىڭ, ۇلتتىق ۇلاننىڭ ءبىرىنشى باسشىلارى, ادام قۇقىقتارى جونىندەگى ۇلتتىق ورتالىقتىڭ وكىلدەرى, سونداي-اق وڭىرلەردە بەينەكونفەرەنتسيا بايلانىسى ارقىلى اۋماقتىق ۇيلەستىرۋ كەڭەستەرىنىڭ مۇشەلەرى قاتىستى.
سوڭعى جىلدارى قىلمىستىق-اتقارۋ جۇيەسىندە رەفورمالار جۇرگىزىلىپ, قوعامدىق باقىلاۋ كەڭەيتىلگەنى اتاپ ءوتىلدى. كولونيالاردا تولىق بەينەباقىلاۋ ەنگىزىلىپ (40 مىڭ بەينەكامەرا ورناتىلعان), سوتتالعانداردىڭ تىكەلەي ءوتىنىش بەرۋى ءۇشىن 600 ەلەكتروندىق تەرمينال قويىلعان.
2023 جىلدان باستاپ سوتتالعانداردى تۇزەۋ مەكەمەلەرىنە ءبولۋ تۇجىرىمداماسى وزگەرتىلدى. ەندى العاش رەت سوتتالعاندار قاج-ءنىڭ ورتاشا قاۋىپسىزدىك مەكەمەلەرىندە ۇستالسا, بۇرىن باس بوستاندىعىنان ايىرۋ جازاسىن وتەگەندەر – ەڭ جوعارى قاۋىپسىزدىك مەكەمەلەرىندە ورنالاستىرىلادى.
قابىلدانعان كەشەندى شارالار ازاپتاۋ تۋرالى سيگنالدار سانىن 5 ەسە ازايتۋعا مۇمكىندىك بەردى.
دەنساۋلىق ساقتاۋ مينيسترلىگى مەن جەرگىلىكتى اتقارۋشى ورگاندارمەن بىرلەسكەن جۇمىستاردىڭ ناتيجەسىندە جاڭا عيماراتتار مەن جابدىقتار ءبولىنىپ, تاۋلىك بويعى كەزەكشىلىك پەن تەلەمەديتسينا ەنگىزىلدى, سونداي-اق بارلىق سوتتالعاندار سكرينينگتەن ءوتتى.
سوتتالعانداردىڭ قۇقىقتارىن ساقتاۋ, ءبىلىم الۋعا قولجەتىمدىلىك, جۇمىسقا ورنالاستىرۋدى ۇيىمداستىرۋ, سىبايلاس جەمقورلىققا قارسى كۇرەس جانە قىلمىستىق جازانى ورىنداۋ جۇيەسىندە زاڭدىلىقتى قامتاماسىز ەتۋ ماسەلەلەرىنە ەرەكشە نازار اۋدارىلدى.
سونداي-اق قىلمىستىق-اتقارۋ جۇيەسىنىڭ الدىندا تۇرعان وزەكتى پروبلەمالار مەن قاۋىپ-قاتەرلەر تۋرالى باياندامالار تىڭدالدى. ولاردىڭ ىشىندە ۇيىمداسقان قىلمىستىق توپتاردىڭ قىزمەتىنە قارسى تۇرۋ, تىيىم سالىنعان زاتتاردى تاسىمالداۋعا جانە زاڭسىز اقشا اينالىمىنا جول بەرمەۋ ماسەلەلەرى قارالدى.
ۇيلەستىرۋ كەڭەسىنىڭ قورىتىندىسى بويىنشا قىلمىستىق-اتقارۋ جۇيەسىنىڭ تيىمدىلىگىن ارتتىرۋعا باعىتتالعان زاڭنامالىق تۇزەتۋلەردى قوسا العاندا, بار پروبلەمالاردى شەشۋ جولدارى ايقىندالدى.
