«SalSeri» سۋرەت گالەرەياسىنداعى كورمە – جىلدىڭ ەڭ ادەمى مەزگىلىنە ارنالىپ «كوكتەمنىڭ ويانۋى» دەپ اتالىپتى. كورمە – بەينەلەۋ شىعارماشىلىعى ارقىلى جاستاردى رۋحاني تاربيەلەۋدى, وتانعا, تۋعان ولكە – اۋىلعا, ەڭبەك ادامدارىنا دەگەن سۇيىسپەنشىلىكتى ارتتىرۋدى, ەستەتيكالىق مادەنيەتتى قالىپتاستىرۋدى كوزدەيدى.
اتالعان كورمەگە قاتىسقان 5 سۋرەتشى دە قازاقستاننىڭ ديزاينەرلەر وداعى مەن سۋرەتشىلەر وداعىنىڭ مۇشەلەرى ءارى شەتەلدەرگە دە ءبىرشاما بەلگىلى تۇلعالار. اتاپ ايتقاندا, نيۋ-يوركتە وتكەن «ارت-ەكسپو 2011» حالىقارالىق بايقاۋىنىڭ لاۋرەاتى, ەڭبەكتەرى بىرنەشە جيناق كىتاپقا ەنگەن سۋرەتشى باقىتنۇر بۋردەسبەكوۆ, ەۋرازيالىق ديزاينەرلەر وداعىنىڭ جانە رەسەي سۋرەتشىلەر كاسىپتىك وداعىنىڭ (پسحر) مۇشەسى, «ارتەكسپو نيۋ-يورك-2011» بايقاۋىنىڭ التىن مەدال يەگەرى, ۇلتتىق ديزاين اكادەمياسىنىڭ اكادەميگى, مادەنيەت قايراتكەرى تولەۋعازى بايعاليەۆ, قازاقستان مەن رەسەيدىڭ كورمەلەرى مەن كونكۋرستارىنىڭ قاتىسۋشىسى, جۇمىستارى قر مۇراجايلارىندا جانە اقش پەن ەۋروپاداعى جەكە كوللەكتسيالاردا قويىلعان تابىن قىلىشباي, «شابىت» حالىقارالىق شىعارماشىلىق جاستار فەستيۆالىنىڭ لاۋرەاتى, اقش-تاعى «New York realism fine art» كورمەسىنىڭ التىن مەدال يەگەرى, 2018 جىلى «عاجايىپ ادامدار» حالىقارالىق بايقاۋىنىڭ ءفيناليستى اتانىپ, كوزىن جۇمىپ سۋرەت سالعان سۋرەتشى رەنات ەلۋباي, قازاقستاننىڭ جانە رەسەيدىڭ كوركەمونەر كورمەلەرى مەن سيمپوزيۋمدارىنىڭ قاتىسۋشىسى, كىتاپتار بويىنشا يلليۋستراتسيالاردىڭ اۆتورى ادىلعالي باياندين قاتىسىپ, كارتينالارىن كورمەگە قويدى.
تاعىلىمدى شارانى ءماجىلىس دەپۋتاتى, «اۋىل» پارتياسىنىڭ توراعاسى سەرىك ەگىزباەۆ قۇتتىقتاۋ سوزىمەن اشتى.
«سىزدەردىڭ تۋىندىلارىڭىز كوپتەگەن شەتەلدىك كورمەلەردە ۇسىنىلدى, ال كەيبىرى اقش, ەۋروپا جانە باسقا دا شەت ەلدەردە ونەر باعالاۋشىلارىنىڭ جەكە كوللەكتسيالارىندا تۇر. شىعارمالارىڭىزدىڭ ارقاسىندا الەم قازاق تاريحىن, مادەنيەتىن, تۇرمىسىن, تابيعاتىن جانە قازىرگى زامانعى قازاقستاندى تانيدى», دەپ سۋرەتشىلەرگە ريزاشىلىعىن بىلدىرگەن «اۋىل» پارتياسى توراعاسى س.ەگىزباەۆ كورمەنى بىرلەسىپ ۇيىمداستىرعانى ءۇشىن استانا قالاسىنىڭ اكىمدىگىنە, سۋرەتشىلەرگە, سونداي-اق الاڭ ۇسىنىپ, كورمەنى بەزەندىرگەنى ءۇشىن ارىستان سماعۇلوۆ مىرزاعا جانە ونىڭ قىزمەتكەرلەرىنە العىس ايتتى.
ايتا كەتەيىك, اتالعان كورمە «اۋىل» پارتياسىنىڭ ەڭبەك ادامدارىن قولداۋداعى ماڭىزدى ءرولىن كورسەتەدى, ال ونەر – ەڭبەك پەن جاسامپازدىقتى شابىتتاندىراتىن ءارى ادامداردى بايلانىستىراتىن دانەكەر سالا ەكەنى ءمالىم.
5 سۋرەتشىنىڭ ارقايسىسى جاڭارۋ ۋاقىتى, كوكتەم تاقىرىبىنا ءوز كوزقاراسىن بىلدىرەدى, ياعني, ولاردىڭ ارقايسىسىندا تەك وزىنە ءتان شىعارماشىلىق بەينەلەۋ ءتاسىلى بار. كارتينالار – تابيعات پەن تۋعان جەر, اۋىلعا دەگەن سۇيىسپەنشىلىك پەن جىلىلىققا تولى.
كورمەگە سۋرەتتەرى قويىلعان سۋرەتشىنىڭ ءبىرى, شارانىڭ اشىلۋىندا قۇتتىقتاۋ ءسوز سويلەگەن ادىلعالي ءبايانديننىڭ ايتۋىنشا اتالعان كورمەگە بارلىعى 50-گە جۋىق كارتينا قويىلعان.
«كورمەدەگى نەگىزگى تاقىرىپ – اۋىل. اۋىلدا تۋىپ وسكەندىكتەن وسى تاقىرىپ سالىستىرمالى تۇردە ايتقاندا بىزگە الدەقايدا جاقىن. ءوزىم 12 كارتينامدى قويدىم. ءبىرىنشى كارتينامدا وسىدان جۇزدەگەن جىلدار بۇرىنعى اتا- بابالارىمىزدىڭ ناۋرىزدى تويلاعانى, ياعني, اۋىلعا كەلە جاتقان قوناقتار, قازاندا ءپىسىرىلىپ جاتقان باۋىرساق پەن كوجە, ويناپ جۇرگەن بالالار جانە تاعى باسقا كورىنىستەردى بەينەلەدىم. ەكىنشى كارتينامدا زاماناۋي استانا مەن وسى جەردە كوشىپ جۇرگەن باياعى اتا-بابالارىمىزدىڭ كوشىن سۋرەتتەدىم. ءۇشىنشى كارتينامدا استاناداعى ناۋرىز مەيرامى, كيىز ۇيلەر, حالىقتىڭ دۋمانداتىپ جاتقان كورىنىسىن پاش ەتتىم. وسى تۇستا ايتايىن, جالپى كيىز ۇيلەر ناۋرىز مەيرامىندا عانا ەمەس, ءاردايىم تىگىلىپ تۇرسا, ەلوردامىزدىڭ وتە تاماشا سالتاناتتى كورىنىسىنىڭ ءبىرى بولار ەدى», دەدى ادىلعالي سارسەن ۇلى.
تۇيىندەي ايتقاندا, جالپى ادام بالاسىنىڭ, تۋعان ولكەنىڭ, اۋىلدىڭ, قازاق دالاسىنىڭ, تابيعاتتىڭ كوكتەمگى ويانۋىنىڭ سۇلۋلىلىق سىرلارىن كوركەمدىك شەبەرلىكپەن ءار ءتۇرلى ستيلدە بەينەلەگەن «كوكتەمنىڭ ويانۋى» كورمەسىن تاماشالاعان جۇرت اۋىلدارىنا ويشا ساياحاتتاپ, كوڭىلدەرىنە رۋحاني اسەر الىپ تارقاستى.
ايتا كەتەيىك, اتالعان كورمە 5 ناۋرىزعا دەيىن جالعاسادى.
