ءتۋرنيردى ۇيىمداستىرىپ وتىرعان سپورت ماماندارىنىڭ سوزىنشە جەرگىلىكتى جەردە وتەتىن وسىنداي جارىستاردىڭ ماڭىزى زور. سەبەبى, تۇرعىلىقتى جەرىنە قاراماستان تالابىن ۇشتاعان جاستاردىڭ سپورتقا دەگەن وڭ كوزقاراسى قالىپتاسىپ, بولاشاقتا ۇلكەن سپورتقا جولداما الاتىنى ءسوزسىز. بۇعان دالەل وسىعان دەيىن وتكىزىلگەن جەرگىلىكتى تۋرنيرلەردىڭ ناتيجەسىندە كەنشىلەر كەنتىنەن شىققان جاستار بۇگىنگى كۇنى ءباسى جوعارى دودالاردا بيىك بەلەستەردى باعىندىرىپ ءجۇر.
«الدىمەن, ءداستۇرلى ءتۋرنيردىڭ وتكىزىلۋىنە قولداۋ كورسەتكەن بارشا ازاماتتارعا زور العىس بىلدىرەمىز. جارىستى وتكىزۋدە باستى ماقسات رەتىندە قىسقى سپورت ءتۇرىن دامىتۋ جانە جاسوسپىرىمدەردىڭ قىسقى ۋاقىتتاعى دەمالىس ۋاقىتىن ارتتىرۋدى كوزدەپ وتىرمىز. تۋرنيرگە قاتىسقان «شاحتەر» كومانداسى جەزكەنت قالاسىندا عانا ەمەس وبلىستىق دەڭگەيدە ونەر كورسەتىپ جۇرگەن شايبالى حوككەي كومانداسى. بۇگىنگى كۇنى وسى كوماندادا ونەر كورسەتەتىن جەتكىنشەكتەردىڭ الداعى ۋاقىتتا ۇلكەن سپورتشى بولاتىنى انىق» دەيدى ءتۋرنيردى ۇيىمداستىرۋشى جاتتىقتىرۋشىلاردىڭ ءبىرى ايدوس ءتورتباي.
جاسوسپىرىمدەر اراسىنداعى شايبالى حوككەي ءتۋرنيرىنىڭ ناتيجەسىندە «شاحتەر» كومانداسى ءى ورىندى يەلەنسە, «باتىر» كومانداسى ءىى ورىن جانە «شاحتەر - 2» كومانداسى ءىىى ورىن الدى. جارىسقا قاتىسۋشىلار اتالعان ءتۋرنيردىڭ باس دەمەۋشىسى «شىعىستۇستىمەت» كومپانياسى تاعايىنداعان اسا باعالى سىيلىقتارعا يە بولىپ, العىس حاتتارمەن ماراپاتتالدى.
اباي وبلىسى
