ەسىرتكى ساتقانعا – اۋىر جازا

قاڭتار ايىندا جامبىل وبلى­سى­نىڭ پوليتسەيلەرى ەسىرتكى قىل­مىسىنىڭ 40 دەرەگىن انىقتادى. ونىڭ ىشىندە 8-ءى – اسا ءىرى كولەمدەگى ەسىرتكىنى زاڭسىز ساقتاۋ, ۇشەۋى – ەسىرت­كى ساتۋ, ەكەۋى – ەسىرتكى ءوسىرۋ, بىرەۋى – ەسىرتكىنى ناسيحاتتاۋ مەن جار­نا­مالاۋ دەرەگى. سونىمەن قاتار ۇيىم­داسقان قىلمىستىق توپقا قاتى­سۋدىڭ ءبىر فاكتىسى تىرەلگەن. سينتە­تيكالىق ەسىرتكى وندىرەتىن زەرتحانا ۇيىمداستىرعان ءتورت ادامعا قاتىس­تى قىلمىستىق ءىس قوزعالدى. ال تاراز قالاسىندا ءۇندى ماريحۋاناسىن وسىرەتىن زەرتحانا بەلگىلى بولىپ, قىزمەتى توقتاتىلدى. وبلىستىق دە­پار­تامەنت دەرەگىنشە, ءبىر عانا ايدىڭ ىشىندە زاڭسىز اينالىمنان 173 كيلودان اسا ءتۇرلى ەسىرتكى زاتى تاركىلەنگەن.

ءتارتىپ ساقشىلارىنىڭ ايتۋىنشا, سينتەتيكالىق پرەپاراتتاردىڭ تارالۋىنا قارسى كۇرەستىڭ ءتيىمدى ءادىسى – الەۋمەتتىك جەلىلەرگە مونيتو­رينگ جۇرگىزۋ. قاڭتار ايىن­دا «كيبەر­نادزور» ارقىلى 107 ين­تەر­نەت-سايت انىقتالىپ, بۇعاتتال­عان. دەگەنمەن ەسىرتكىمەن كۇرەستە قىل­مىستىڭ سالدارىمەن ەمەس, سەبەبىمەن جۇمىس ىستەپ, قۇقىق بۇزۋشىلىقتىڭ الدىن العان ءتيىمدى. وسىعان وراي جامبىلدىق ىشكى ىستەر ورگاندارى مۇد­دەلى ورگاندارمەن بىرلەسىپ جوعا­رى جانە ورتا وقۋ ورىندارىندا 113 پروفيلاكتيكالىق ءىس-شارا وتكىزىپ, بۇقارالىق اقپارات قۇرالدارى مەن الەۋمەتتىك جەلىدە 191 ماتەريال جاريالاعان.

ەلىمىزدىڭ تەرىسكەيىندەگى قىزىل­جارلىق ءتارتىپ ساقشىلارى دا كەيىنگى ون كۇن­نىڭ ىشىندە ماريحۋانا وسىرەتىن بەس زەرت­حانانى انىقتادى. «Polisia.kz» تاراتقان دەرەككە سۇيەنسەك, سولتۇس­تىك قازاقستان وبلىسى پد ەسىرتكى قىل­مىسىنا قارسى ءىس-قيمىل باسقار­ماسىنىڭ قىزمەتكەرلەرى ەسىرتكى فيتوزەرتحانالارىن انىقتاۋ جونىن­دەگى جۇمىستاردى كۇشەيتكەن. ناتي­جەسىندە, تاياۋ كۇندەرى قۇرامىندا ەسىرتكى بار وسىمدىكتەردى زاڭسىز ەگىپ-ءوسىر­دى دەگەن كۇدىكپەن پەترو­پاۆل قالاسىنىڭ 27 مەن 47 جاس ارا­لىعىنداعى بەس تۇرعىنى انىقتالدى. ولاردىڭ بارلىعى قىلمىس ۇستىن­دە, ناقتى دالەلمەن ۇستالدى. كۇدىك­تىلەردىڭ ۇيلەرىن تەكسەرۋ كەزىندە جارىقتاندىرۋ قۇرىلعىلارى مەن باسقا دا قاجەتتى قۇرال-جابدىق, تۇقىمدار مەن قاراسورا تۇپتەرى تابىلعان. پوليتسەيلەر ولاردان 22 ءتۇپ قاراسورا, 265 گرامعا جۋىق ماريحۋانا مەن گاشيش ەسىرتكى زاتتارىن تاركىلەدى. قازىرگى تاڭدا تەرگەۋ جۇمىستارى ءجۇرىپ جاتىر.

اقمولا وبلىسىنا قاراستى ششۋچينسك قالاسىندا جەرگىلىكتى پوليتسيا ءبولىمىنىڭ ەسىرتكى قىلمىسىنا قارسى ءىس-قيمىل بولىمشەسى قىزمەت­كەرلەرى دە قۇرامىندا ەسىرتكى بار وسىمدىكتەردى ءوسىرۋ ءۇشىن ءوز پاتەرىندە فيتوزەرتحانا ۇستاعان جەرگىلىكتى تۇرعىندى قۇرىقتادى. ول تىيىم سالىنعان زاتتىڭ ءوندىرىسىن جولعا قويۋ ءۇشىن ينتەرنەت ارقىلى قاجەتتى جابدىققا, اتاپ ايتقاندا فيتوبوكس, ديودتى شام, فيتولامپا, تاعى باسقا كەرەك-جاراققا تاپسىرىس بەرگەن. سونىمەن قاتار قاجەتتى تۇقىمدى ساتىپ الىپ, العاشقى ءونىمدى كۇتىپ وتىرعان جەرىنەن قولعا ءتۇستى.

ءتارتىپ ساقشىلارى ونىڭ ءۇيىن تەكسەرە كەلە سۇر-جاسىل ءتۇستى, وزىندىك ءيىسى بار قوراپتى تاۋىپ, تەرگەۋ ءىس-شارالارى بارىسىندا ونىڭ ماريحۋانا ەكەنىن انىقتادى. تاركىلەنگەن زاتتاردىڭ ناقتى قۇرامى مەن سالماعىن انىقتاۋ ءۇشىن ساراپتاماعا جىبەرىلدى.

وسى ورايدا پوليتسەيلەر 2025 جىلدان باستاپ ەلىمىزدە ەسىرتكى ءوندىرۋ ءۇشىن بەرىلەتىن جازا ءومىر بويىنا باس بوستاندىعىنان ايىرۋعا دەيىن قاتاڭداتىلعانىن ەسكە سالادى.

ال اباي وبلىسىنىڭ پوليتسيا قىزمەتكەرلەرى ۇقك دەپارتامەنتىمەن بىرلەسىپ, پروكۋراتۋرانىڭ ۇيلەستى­رۋىمەن ەلىمىزدىڭ وڭتۇستىك وڭىرىنەن ەسىرتكى جەتكىزۋدىڭ تۇراقتى ارناسىن جويۋ بويىنشا ءىس-شارا جۇرگىز­دى. ناتي­جەسىندە, اۆتوكولىكپەن ءىرى كولەم­دە ەسىرتكى تاسىمالداپ بارا جاتقان ءۇش جەرگىلىكتى تۇرعىندى ۇستاعان. ولاردان نارىقتاعى قۇنى 35 ملن تەڭگەنى قۇرايتىن 110 كيلودان اسا ماريحۋانا تاركىلەندى.

وسى فاكت بويىنشا اسا ءىرى كولەمدەگى ەسىرتكىنى زاڭسىز ساقتاۋ, تاسىمالداۋ جانە وتكىزۋ بويىنشا قىلمىستىق توپ جاساعان ءىس-ارەكەتكە قاتىستى سوتقا دەيىنگى تەرگەۋ باستالدى. كۇدىكتىلەر ۋاقىتشا ۇستاۋ يزولياتورىنا قامالدى. ايماقتا ەسىرتكىنىڭ زاڭسىز اينالىمىنا قارسى كۇرەس بەلسەندى تۇردە جالعاسىپ جاتىر.

ايتا كەتەيىك, ەلىمىزدىڭ زاڭناما­سىندا ەسىرتكى قىلمىستارىن جاساعا­نى ءۇشىن 14 جاستان باستاپ قىلمىستىق جازا تاعايىندالادى. بۇل – اسىرەسە اتا-انالار ءۇشىن ماڭىزدى ەسكەرتۋ. ولار بالالارىنىڭ قانداي ىسپەن شۇعىلدانىپ جۇرگەنىن ءجىتى قا­داعالاۋى قاجەت. ەگەر ءجاسوسپىرىمنىڭ قالتاسىندا نە كارتاسىندا ارتىق اقشا پايدا بولسا, ساباقتان كەيىن بەلگىسىز ىسپەن اينالىسىپ جۇرگەنى انىقتالسا, ونىڭ كۇدىكتى ءجۇرىس-تۇرىسىن تەكسەرۋ كەرەك. قىراعىلىق كەز كەلگەن قىلمىستىڭ الدىن الۋعا سەپتىگىن تيگىزەدى.