« ۇلىتاۋ وبلىسىنداعى «جومارت» كەنىشىندە بولعان توتەنشە جاعداي ءبارىمىزدىڭ قابىرعامىزدى قايىستىرىپ جىبەردى. اپات سالدارىنان قازا تاپقان كەنشىلەردىڭ وتباسىلارى مەن جاقىندارىنا قايعىلارىنا ورتاقتاسىپ, كوڭىل ايتامىز.
وسى ماسەلەگە بايلانىستى مەملەكەت باسشىسى ۇكىمەتكە توتەنشە جاعدايدىڭ ءمان-جايىن مۇقيات تەكسەرۋدى جۇكتەدى. سونداي-اق سالالىق ۆەدومستۆولار مەن ءوڭىر اكىمدىگىنە مارقۇمداردىڭ وتباسىلارىنا قاجەتتى كومەك كورسەتۋ تاپسىرىلدى.
الداعى ۋاقىتتا ءتيىستى شارالار قولعا الىنىپ, وقيعانىڭ سەبەپتەرى انىقتالاتىن بولادى. ەندى ەشقاشان ەلىمىزدە مۇنداي قايعىلى جاعداي قايتالانباسىن دەپ تىلەيمىز», دەپ جازدى م.اشىمباەۆ ءوزىنىڭ Facebook پاراقشاسىندا.
ەسكە سالايىق, دۇيسەنبى كۇنى «قازاقمىس» كورپوراتسياسىنا قاراستى «جومارت» كەنىشىندەگى شاحتادا تاۋ جىنىسى وپىرىلعان. وقيعا سالدارىنان 7 شاحتا جۇمىسشىسى ءۇيىندى استىندا قالىپ قويعان.
بۇعان دەيىن «قازاقمىس كورپوراتسياسى» جشس «جومارت» كەنىشىندە بولعان قايعىلى وقيعانىڭ الدىن الا سەبەبىن اتاعان ەدى.
