فەستيۆال اياسىندا مەكتەپ وقۋشىلارى مەن ولاردىڭ اتا-انالارىنا ەرەكشە كوڭىل ءبولىندى. 30 مىڭنان استام وقۋشى كاسىبي دياگنوستيكادان ءوتىپ, وزدەرىنىڭ قىزىعۋشىلىقتارى مەن قابىلەتتەرىن انىقتادى.
وقۋ-اعارتۋ ءمينيسترى عاني بەيسەمباەۆتىڭ ايتۋىنشا, اتالعان فەستيۆال بارىسىندا كوللەدجدەر مەن كاسىپورىندار 250-گە جۋىق ىنتىماقتاستىق تۋرالى مەموراندۋمعا قول قويعان. بۇل – راسىمەن ۇلكەن كورسەتكىش.
«جۇمىس بەرۋشىلەردىڭ بۇل ۇدەرىسكە بەلسەندى قاتىسۋى قۋانتادى. ءبىزدىڭ باستى باسىمدىعىمىز – ەڭبەك نارىعىندا سۇرانىسقا يە بىلىكتى مامانداردى دايارلاۋ. بۇل ءۇشىن ءبىز ينۆەستورلارمەن ءوزارا ىنتىماقتاستىقتى ارتتىرامىز. وسى باعىتتا 270-تەن استام مەملەكەتتىك كوللەدجدىڭ ماتەريالدىق-تەحنيكالىق بازاسىن جاڭارتۋ, سونداي-اق كوللەدجدەرگە شەفتىك قامقورلىق كورسەتەتىن كاسىپورىندار سانىن 4 مىڭعا دەيىن ارتتىرۋ جوسپارلانىپ وتىر», دەدى عاني بەيسەمباەۆ.
مينيستر ءسوز سوڭىندا فەستيۆالدى ۇيىمداستىرۋعا جانە جۇمىسشى ماماندىقتارىنىڭ بەدەلىن ارتتىرۋعا ۇلەس قوسقان بارلىق مينيسترلىككە, اكىمدىككە, ۇلتتىق كومپانيالارعا, كاسىپورىندارعا, كوللەدجدەرگە, بۇقارالىق اقپارات قۇرالدارى وكىلدەرىنە العىس ءبىلدىردى.
فەستيۆالدىڭ بەس كۇنىندە 30-دان استام كاسىپتىك باعدار بەرۋ شەبەرلىك سىنىپتارى, ماماندىق تاڭداۋعا قاتىستى 200-گە جۋىق قىزىقتى ويىندار ۇيىمداستىرىلىپ, 1000-نان استام جۇلدەلەر مەن سىيلىقتار ويناتىلدى. «بەيبىت اتوم» شەبەرلىك ساباعى اياسىندا بالالار اتوم ەنەرگياسى قولدانىلاتىن سالالار تۋرالى ءبىلدى, ال «بورتسەرىك مانسابى» اتتى شەبەرلىك ساباقتا «Air Astana» اۋە كومپانياسىنىڭ قىزمەتكەرلەرى ماماندىقتىڭ ارتىقشىلىقتارىن, بورتسەرىكتەر مەن ۇشقىشتارعا قويىلاتىن تالاپتار تۋرالى ايتىپ بەردى. مەتاللۋرگتەر كوشەسىندە ستۋدەنتتەر مەن وقۋشىلار گەولوگ, گەوفيزيك, كەنشى, وپەراتور رولىندە ءوزىن سىناپ كوردى. «ERG», «Kazakhmys», «Qarmet» سىندى ءىرى جۇمىس بەرۋشىلەر كورمەلەرىن ترەناجەر, ماكەت, سيمۋلياتور, VR-تەحنولوگيالارمەن جابدىقتاپ, قاتىسۋشىلارعا ماماندىقتاردىڭ قىر-سىرىنا تەرەڭ ۇڭىلۋگە مۇمكىندىك بەردى.
وسى كۇنى ەلىمىزدىڭ 772 كوللەدجىندە 556 مىڭ ستۋدەنت ءبىلىم الىپ جاتىر. مەملەكەت باسشىسىنىڭ قولداۋىمەن 2023 جىلدان باستاپ كوللەدج ستۋدەنتتەرىنىڭ شاكىرتاقىسى ەكى ەسە ءوستى. بيىل سۇرانىسقا يە ماماندىقتار بويىنشا تەگىن تەحنيكالىق جانە كاسىپتىك ءبىلىم الاتىن ستۋدەنتتەر سانى 153 مىڭعا جەتەدى, بۇل وتكەن جىلمەن سالىستىرعاندا 10 مىڭعا ارتىق. مەملەكەتتىك تاپسىرىستىڭ 70%-ى تەحنيكالىق ماماندىقتارعا بولىنەدى. ولاردىڭ قاتارىندا ماشينا جاساۋ, كولىك, ەنەرگەتيكا, IT, قۇرىلىس سالالارى بار.
