ءبىلىم مەن سپورت – ەكى بولەك الەم بولىپ كورىنگەنىمەن, ايگۇل ەرجانوۆا بۇل ەكى سالانى شەبەر ۇيلەستىرىپ كەلەدى. ءسوزىمىز دالەلسىز ەمەس. وتىز جىلدان استام ۋاقىتىن ءبىلىم سالاسىنا ارناعان پەداگوگ بىلتىر مەملەكەت باسشىسىنىڭ قولىنان «قازاقستاننىڭ ەڭبەك سىڭىرگەن ۇستازى» مەدالىن الدى. ال بيىل 54 جاستاعى مۇعالىم كاسىبي سپورتشىلار قاتىسقان جارىستا 100 كيلو زىلتەمىردى كوتەرىپ, رەكوردتىق كورسەتكىش ورناتتى.
«وسى جارىسقا جيىرماعا جۋىق مەملەكەتتەن نەبىر مىقتى سپورتشىلار كەلگەن. ال ەل قۇراماسى بۇل جارىسقا العاش رەت قاتىسىپ وتىر. جەڭىس تۇعىرىنان كورىنگەنىمە, ارينە, قۋانىشتىمىن. مەن وقۋشىلارىما ادام مۇمكىندىگىنىڭ شەكسىز ەكەنىن كورسەتكىم كەلدى. ءبىلىم مەن سپورتتى قاتار الىپ جۇرۋگە ابدەن بولادى. ايتسام, سەنبەۋىڭىز مۇمكىن. ءوزىم بۇل سپورت تۇرىنە 52 جاسىمدا كەلدىم. كوپشىلىك ءۇشىن بۇل كەش باستالعان جول كورىنۋى مۇمكىن. بىراق ادام شىن قالاسا كوزدەگەن مەجەسىن باعىندىرا الادى», دەيدى ول.
ءيا, ايگۇل ەرجانوۆا بار-جوعى ءبىر جارىم جىل ىشىندە اۋىر اتلەتيكانى مەڭگەرىپ, الەمدىك ارەنالاردا توپ جاردى. وسى ۋاقىت ارالىعىندا, ءتىپتى, بىرنەشە مارتە الەم چەمپيونى اتانىپ ۇلگەردى جانە ول مۇنىمەن توقتاپ قالماق ەمەس. الداعى ۋاقىتتا سپورتشى مۇعالىم افريكادا وتەتىن حالىقارالىق جارىسقا قاتىسپاق.
ء«اربىر جارىس – جاڭا تاجىريبە, ءاربىر رەكورد – ءوز-ءوزىڭدى جەڭۋ. جەڭىس – تەك مەدال الۋ ەمەس. ەڭ باستىسى – سەنۋ, ارەكەت ەتۋ جانە ناتيجە ءۇشىن ايانباي ەڭبەكتەنۋ. بۇل – تەك سپورتتاعى ەمەس, ومىردەگى دە ۇلكەن قاعيدا», دەيدى چەمپيون مۇعالىم.
