فوتو: عىلىم جانە جوعارى ءبىلىم مينيسترلىگى
قاڭتار ايىنداعى ۇبت-نى تاپسىرعان 164 مىڭعا جۋىق تالاپكەرلەردىڭ 76,81%-ى قازاق تىلىندە, 23,14%-ى ورىس تىلىندە, 89 ادام اعىلشىن تىلىندە تەستىلەۋدەن ءوتتى.
شەكتى بالدى 70,35%-عا جۋىق تالاپكەر جينادى. ورتاشا بالل - 65,81 بالدى قۇرادى. ەڭ جوعارى بالل – 139. جالپى 186 تالاپكەر 130-دان جوعارى بالل جينادى.
تەستكە قاتىسۋشىلاردىڭ باسىم بولىگى «ماتەماتيكا-فيزيكا», «بيولوگيا-حيميا», «ماتەماتيكا-ينفورماتيكا» كومبيناتسيالارىن تاڭداعان. ەڭ از تاڭدالعان كومبيناتسيا – «حيميا-فيزيكا», ونى 197 ادام تاپسىرعان.
قاڭتار ۇبت-سىنىڭ قورىتىندىسى بويىنشا تالاپكەرلەر «وقۋ ساۋاتتىلىعى» ءپانىن جوعارى دەڭگەيدە تاپسىرىپ, ورتاشا ەسەپپەن سۇراقتاردىڭ 75,43%-ىنا دۇرىس جاۋاپ بەرگەن. ال «فيزيكانى» تاپسىرعان تالاپكەرلەردىڭ 32,32% عانا تاپسىرمانى دۇرىس ورىنداعان, ولار ءۇشىن «ەلەكتروماگنيتتىك يندۋكتسيا» تاقىرىبى قيىن بولدى.
ەرەكشە ءبىلىم بەرۋ قاجەتتىلىكتەرى بار وقۋعا تۇسۋشىلەر ءۇشىن قولايلى جاعداي جاساۋدىڭ ارقاسىندا قاڭتار ۇبت-سىنا 392 تالاپكەر قاتىسقانىن ايتا كەتكەن ءجون.
ۇبت وتكىزۋ بارىسىندا 197 ەرەجە بۇزۋشىلىق انىقتالعان. ونىڭ ىشىندە 101 تالاپكەر سمارتفون جانە شپارگالكا سالىپ ءوتۋ ارەكەتى سالدارىنان تەست تاپسىرۋ مۇمكىندىگىنەن ايىرىلسا, تەستىلەۋ كەزىندە ەرەجەلەردى بۇزعانى ءۇشىن اۋديتوريادان 96 ادام شىعارىلعان.
رەسپۋبليكالىق كوميسسيا جۇمىسىن اياقتادى, تالاپكەرلەردىڭ سەرتيفيكاتتارى جەكە كابينەتتە قولجەتىمدى.
ايتا كەتسەك, 2025 جىلعى ۇبت اياقتالعاننان كەيىن كۇنتىزبەلىك جىلدىڭ 31 قازانىنا دەيىن تەستىلەۋدىڭ بەينەجازبالارىنا تالداۋ جۇرگىزىلەدى. تىيىم سالىنعان زاتتاردى پايدالانۋ نەمەسە ەرەجەلەردى بۇزۋ فاكتىلەرى انىقتالعان جاعدايدا ءتۇسۋشىنىڭ ۇبت ناتيجەلەرى جويىلادى.
ەستەرىڭىزگە سالايىق, قاڭتارداعى ۇبت-عا شارتتى تۇردە اقىلى نەگىزدە كۇندىزگى وقۋ نىسانى بويىنشا جوعارى وقۋ ورىندارىنا قابىلدانعان, جازعى ۇبت ناتيجەلەرى بويىنشا شەكتى بالل جيناماعاندار, شىعارماشىلىق ۇبت-دان باسقا دايىندىق باعىتتارىنا, پەداگوگيكالىق باعىتقا اقىلى نەگىزدە اۋىسقىسى كەلەتىندەر, سونداي-اق مەكتەپ بىتىرەتىن تۇلەكتەر جوعارى وقۋ ورىندارىنا اقىلى نەگىزدە ءتۇسۋ ءۇشىن قاتىسادى.
