فەستيۆالدىڭ اشىلۋىندا ءسوز سويلەگەن پرەمەر-ءمينيستردىڭ ورىنباسارى تامارا دۇيسەنوۆا جۇمىسشى ماماندىقتارى ەل ەكونوميكاسىنىڭ تىرەگى ەكەنىن اتاپ ءوتتى.
«بۇگىن جۇمىسشى ماماندىقتارىنىڭ قانشالىقتى وزگەرگەنىنە كۋا بولىپ وتىرمىز. بۇرىندارى بۇل ماماندىقتار اۋىر ءارى قاراپايىم ەڭبەكپەن بايلانىستى دەپ ەسەپتەلسە, قازىر جاعداي مۇلدە باسقا. وسى كۇنى جۇمىسشىلار زاماناۋي تەحنولوگيالاردى باسقاراتىن, ۇلكەن وندىرىستىك ۇدەرىستىڭ ماڭىزدى بولىگىنە اينالىپ وتىر. فەستيۆال جاستاردىڭ سۇرانىسقا يە ماماندىقتى تانىپ-بىلۋىنە, سول سالانى تاڭداۋىنا مۇمكىندىك بەرەدى», دەدى ۇكىمەت باسشىسىنىڭ ورىنباسارى.
اتالعان جيىندا وقۋ-اعارتۋ ءمينيسترى عاني بەيسەمباەۆ تەحنيكالىق جانە كاسىپتىك ءبىلىم جۇيەسىن ۇلكەن وزگەرىس كۇتىپ تۇرعانىن ايتتى.
«بيىل 1 قىركۇيەكتەن باستاپ كوللەدجدەردى قارجىلاندىرۋ كولەمى ەكى ەسەگە ۇلعايادى. قازىرگى ۋاقىتتا كوللەدجدەرگە 518 كاسىپورىن شەفتىك قامقورلىق كورسەتەدى, ال بولاشاقتا ولاردىڭ سانىن 4 مىڭعا دەيىن ارتتىرامىز. سونىمەن قاتار جۇمىسشى ماماندىقتارى جىلىندا ىسكە اسىرىلاتىن نەگىزگى ءىس-شارالاردىڭ ءبىرى – ەلىمىزدىڭ 10 كوللەدجىن ينتەرناتسيونالداندىرۋ بولماق. مۇنداعى نەگىزگى ماقسات — ولاردىڭ جاھاندىق دەڭگەيدە باسەكەگە قابىلەتتىلىگىن ارتتىرۋ جانە ءبىلىم باعدارلامالارىن حالىقارالىق ستاندارتتارعا سايكەستەندىرۋ. وسى ماقساتتا اتوم ەنەرگەتيكاسى سالاسىنىڭ ماماندارىن دايارلاۋدا ماجارستاننىڭ تاجىريبەسىن ەنگىزۋ, سونداي-اق قىتايدىڭ IT, درون قۇراستىرۋ, ماشينا جاساۋ سالاسىنداعى تاجىريبەسىن قولدانۋ جوسپارلانىپ وتىر», دەدى عاني بەيسەمباەۆ.
ءمينيستردىڭ ايتۋىنشا, بيىل استانادا تەحنيكالىق جانە كاسىپتىك ءبىلىم ۇيىمدارىنىڭ ستۋدەنتتەرىن قولداۋ ءارى دامىتۋ ماقساتىندا ۇلتتىق قۇزىرەتتىلىك ورتالىعى قۇرىلماق. مۇنداي ورتالىق قىتايدا, وڭتۇستىك كورەيادا جانە ءباا-دە تابىستى ناتيجە كورسەتىپ كەلەدى. ال وسى كۇزدە اقتاۋدا «TurkicSkills», ياعني تۇركىتىلدەس ەلدەر اراسىندا I كاسىبي شەبەرلىك چەمپيوناتى وتپەك.
ايتا كەتەيىك, «جۇمىسشى ماماندىقتارى قالاسىندا» سەگىز تاقىرىپتىق كوشە اشىلدى. اتاپ ايتساق, مۇندا تاۋ-كەن ءىسى جانە مەتاللۋرگيا, ماشينا جاساۋ جانە كولىك, ەنەرگەتيكتەر مەن مۇنايشىلار, اۋىل شارۋاشىلىعى مەن سۋ شارۋاشىلىعى ماماندارى, قۇرىلىسشىلار, قۇتقارۋشىلار, ءورت سوندىرۋشىلەر, مەديتسينا, تۋريزم, سونداي-اق بولاشاق ماماندىقتارىنا ارنالعان كوشەلەر بار. سونىمەن قاتار «جۇمىسشىلار قالاسىندا» 40 كرەاتيۆتى ءۇي تۇرعىزىلعان. ياعني فەستيۆالعا قاتىسۋشىلار ءتۇرلى كاسىپتىڭ ەرەكشەلىگىمەن تانىسىپ, زاماناۋي جابدىقتارمەن وزدەرى جۇمىس ىستەپ كورە الادى. بەس كۇن بويى قالا اۋماعىندا ءتۇرلى سەمينار مەن شەبەرلىك ءدارىسى, حاكاتون, كاسىپتەر شەرۋى, بوس ورىندار جارمەڭكەسى, ستارتاپتاردىڭ تۇساۋكەسەرلەرى, كونتسەرتتەر مەن ترەنينگتەر وتەدى. فەستيۆال بارىسىندا قوناقتار ءوندىرىس ۇدەرىسىنە تىكەلەي ارالاسىپ, وزدەرىن ناعىز ءوندىرىس جەلىسىندە وتىرعانداي سەزىنە الادى. سونىمەن بىرگە ماشينالار مەن قۇرىلعىلاردى قولمەن قۇراستىرىپ, جۇمىسشى ماماندىقتارىنىڭ قىر-سىرىن تۇسىنەدى. وقۋشىلار مەن ستۋدەنتتەر زاماناۋي تەحنولوگيالاردىڭ ماڭىزىن ۇعىنىپ, ەڭبەك نارىعىندا سۇرانىسقا يە جاڭا كاسىپتەرمەن تانىسادى.
وقۋ-اعارتۋ ۆيتسە-ءمينيسترى ەدىل وسپاننىڭ ايتۋىنشا, فەستيۆالدىڭ نەگىزگى ماقساتى – جۇمىسشى ماماندىقتارىنىڭ قازىرگى زامان تالابىنا ساي وزگەرگەنىن كورسەتۋ, اسىرەسە بالالار مەن جاستارعا تانىستىرۋ. ويتكەنى كوپشىلىك اراسىندا جۇمىسشى ماماندىقتارى اۋىر قارا جۇمىس دەگەن تۇسىنىك قالىپتاسقان. الايدا قازىرگى تاڭدا بۇل سالالار جوعارى تەحنولوگيالارمەن جابدىقتالىپ, اۆتوماتتاندىرىلعان, تسيفرلىق مۇمكىندىكتەرگە نەگىزدەلگەن. مىنەكي, وسى «جۇمىسشى قالاسىنا» كەلگەن قوناقتار ءارتۇرلى ماماندىقتىڭ جاڭا تەحنولوگيالارىمەن بايلانىسىن, ولاردىڭ ەڭبەك نارىعىنداعى ماڭىزىن جەتە ۇعىنادى.
«فەستيۆالعا 30 مىڭنان استام ادام, ونىڭ ىشىندە كوپتەگەن مەكتەپ وقۋشىلارى مەن ستۋدەنتتەر قاتىسادى دەپ كۇتىلىپ وتىر. ءبىرىنشى كۇننىڭ وزىندە 5 مىڭنان استام قوناق كەلىپ, ءتۇرلى ءوندىرىس سالاسىمەن تانىسىپ, وزدەرىن قىزىقتىرعان سۇراقتارعا جاۋاپ الدى. جاڭا وقۋ جىلىنان باستاپ كوللەدج ستۋدەنتتەرىنە بولىنەتىن مەملەكەتتىك قارجىلاندىرۋ ەكى ەسە وسەدى. ناقتىراق ايتساق, ءار ستۋدەنتتىڭ جان باسىنا شاققانداعى قارجىسى 412 مىڭ تەڭگەدەن 937 مىڭ تەڭگەگە دەيىن ۇلعايادى. قازىر ەلىمىزدە بىرنەشە كوللەدج مەن كاسىپورىندار اراسىندا جاڭا فورماتتاعى سەرىكتەستىك ورناتىلعان. مىسالى, «سارىارقااۆتوپروم» جانە قوستاناي مەملەكەتتىك كوللەدجى بىرلەسىپ, جىل سايىن 250 مامان دايارلايدى. ياعني ستۋدەنتتەر كوللەدجدە وقىپ ءجۇرىپ-اق كاسىپورىندا تاجىريبەدەن وتەدى. وقۋ بىتىرگەننەن كەيىن بىردەن جۇمىسقا ورنالاسادى. بۇل جۇيە ءبىلىم مەن تاجىريبەنى بىرىكتىرىپ, بىلىكتى ماماندار دايارلاۋعا مۇمكىندىك بەرەدى», دەيدى ۆيتسە-مينيستر.
ءيا, وسى كۇنى زاماناۋي تەحنولوگيالاردىڭ دامۋىنا بايلانىستى جۇمىسشى ماماندىقتارى دا وزگەرىسكە ۇشىراپ جاتىر. مىسالى, كەن ورىندارىن دروندار ارقىلى باقىلايتىن كۇنگە جەتتىك. بۇرىن شاحتەرلەر شاحتاعا ءتۇسىپ, قاۋىپتى جاعدايدا جۇمىس ىستەسە, ەندى بۇل ۇدەرىستى ۆيرتۋالدى كوزىلدىرىك پەن جاڭا تەحنولوگيالاردىڭ كومەگىمەن جەر ۇستىنەن باسقارۋعا بولادى. ودان بولەك, اۋىل شارۋاشىلىعىنداعى درون وپەراتورلارىنىڭ دا پايداسى ۇشان-تەڭىز. ويتكەنى بۇل قۇرىلعى ەگىستىك القاپتارىن باقىلاۋ, تىڭايتقىش سەبۋ, سۋارۋ جۇيەلەرىن قاداعالاۋ سياقتى جۇمىستاردى تىڭعىلىقتى اتقارادى. مىنەكي, «جۇمىسشى ماماندىقتارى قالاسىندا» وسى سەكىلدى زاماناۋي تەحنولوگيالار كوپشىلىككە تانىستىرىلدى.
ايتا كەتەيىك, اتالعان فەستيۆال — جۇمىسشى ماماندىقتارى جىلىنىڭ بەتاشارى ىسپەتتى. بۇل – بولاشاق مامانداردىڭ, جۇمىس بەرۋشىلەردىڭ, تەحنيكالىق جانە كاسىپتىك ءبىلىم ۇيىمدارىنىڭ ءوزارا ىنتىماقتاستىعى ءۇشىن قۇرىلعان الاڭ. فەستيۆالدىڭ بىرەگەي فورماتى قوناقتارعا ءارتۇرلى كاسىپتىڭ ەرەكشەلىكتەرىمەن تانىسۋعا جانە ينتەراكتيۆتى الاڭدار مەن مامانداندىرىلعان جابدىقتاردىڭ كومەگىمەن ەكونوميكانىڭ ءتۇرلى سالاسىندا وزدەرىن سىناپ كورۋگە مۇمكىندىك بەرەدى.
