سۋرەت: rudpol.kz
مەملەكەت باسشىسى «Ana tili» گازەتىنە بەرگەن سۇحباتىندا: «تازا قازاقستان» ەكولوگيالىق جالپىۇلتتىق اكتسياسى قوعامعا ەكولوگيالىق مادەنيەتتىڭ جاڭا تالاپتارىن ەنگىزۋ يدەياسىنان باستاۋ الادى. حالىقتىڭ بۇل باستاماعا بارىنشا قولداۋ بىلدىرگەنىنە ءتانتىمىن. اسىرەسە جاستارعا ريزاشىلىعىمدى بىلدىرگىم كەلەدى. قازاقستان ازاماتتارى مۇنىڭ كەزەكتى ءبىر ناۋقان ەمەس, وزىق ويلى قوعام قالىپتاستىرۋ جولىنداعى يدەولوگيالىق پلاتفورما ەكەنىن ءتۇسىندى», دەپ اتاپ ءوتتى.
جاستار اراسىندا پاتريوتيزم قۇندىلىقتارىن دارىپتەپ, قورشاعان ورتاعا ۇقىپتى قاراۋ ءۇشىن «تازا قازاقستان» اكتسياسىن داستۇرگە اينالدىرۋ قاجەت. ەكولوگيانى ساقتاۋ مادەنيەتىن قالىپتاستىرۋ – ماڭىزدى ماسەلە. جينالعاندار وسى باعىتتا اتقارىلاتىن شارالارعا قاتىستى ويلارىن ورتاعا سالدى.
ءىس-شارانىڭ ماقساتى – ەكولوگيالىق مادەنيەتتى قالىپتاستىرۋ, نىعايتۋ, پاتريوتيزم قۇندىلىقتارىن دارىپتەۋ, سونداي-اق قورشاعان ورتاعا ۇقىپتى قاراۋ, اينالاداعى تابيعاتتى قورعاۋدى ناسيحاتتاۋ ماقساتىندا قوعامدا جاڭا يدەيالارعا جول اشۋ.
ەلوردادا Taza Astana الەۋمەتتىك جوباسى ىسكە قوسىلعان. جوبا قۇقىقتىق ءتارتىپ, اباتتاندىرۋ, كوگالداندىرۋ, سانيتارلىق تازالاۋ, كوپپاتەرلى تۇرعىن ۇيلەردىڭ, ءۇي جانىنداعى, كۆارتالىشىلىك, اۋلا اۋماقتارىنىڭ تازالىعى ماسەلەلەرى بويىنشا جۇيەلى جۇمىس جۇرگىزۋگە باعىتتالعان.
«ەكولوگيا جانە تابيعي رەسۋرستار مينيسترلىگىنىڭ 2024–2029 جىلدارعا ارنالعان تۇجىرىمداماسىندا ەكولوگيالىق ءبىلىم بەرۋ, ەكولوگيالىق ساۋات اشۋ, ونى اقپاراتتىق تاراتۋ كوزدەلگەن. ودان كۇتىلەتىن ماقسات, ناتيجە تۋرالى جاستارىمىزدى كەڭ كولەمدە تانىستىرىپ, ءارى قاراي سول باعىتتا جۇمىس ىستەگىمىز كەلەدى», دەدى ءىس-شارانىڭ ۇيىمداستىرۋشىسى جاننا شەرزاتقىزى.
